![](https://www.livenewage.com/wp-content/uploads/2024/07/keltron.webp)
തിരുവനന്തപുരം: സംസ്ഥാന വ്യവസായവകുപ്പിനു കീഴിലുള്ള കെൽട്രോണിന് പ്രതിരോധ മേഖലയിൽ നിന്ന് കരാർ ലഭിച്ചു. കെൽട്രോണ് ഉപകമ്പനിയായ കുറ്റിപ്പുറം കെൽട്രോണ് ഇലക്ട്രോ സെറാമിക്സ് ലിമിറ്റഡിന് 17 കോടി രൂപയുടെ ഓർഡറാണ് ലഭിച്ചത്.
നാവികസേനയുടെ പ്രധാന പദ്ധതികളിലൊന്നായ എഎസ്ഡബ്ല്യു ഷാലോ വാട്ടർ ക്രാഫ്റ്റിലെ സോണാറുകൾക്ക് ആവശ്യമായ ട്രാൻസ്ഡ്യൂസർ എലമെന്റുകൾ നിർമിച്ചു നൽകുന്നതിനാണ് ബംഗളൂരുവിലെ ഭാരത് ഇലക്ട്രോണിക്സ് ലിമിറ്റഡ് മുഖേന ഓർഡർ ലഭിച്ചിരിക്കുന്നത്.
ഓർഡറിന്റെ അടിസ്ഥാനത്തിൽ 2000ലധികം ട്രാൻസ്ഡ്യൂസർ എലമെന്റുകൾ കെഇസിഎൽ നിർമിച്ചു നൽകും. പ്രതിരോധ ഇലക്ട്രോണിക്സ് മേഖലയിൽനിന്നും കെഇസിഎല്ലിന് ലഭിക്കുന്ന ഏറ്റവും വലിയ ഓർഡർ ആണിതെന്ന് വ്യവസായ മന്ത്രി പി. രാജീവ് പറഞ്ഞു.
സമുദ്രത്തിനടിയിലുള്ള ശബ്ദ തരംഗങ്ങളിലൂടെ മറ്റു കപ്പലുകളുടെയും അന്തർവാഹിനികളുടെയും സാന്നിധ്യം തിരിച്ചറിയുന്നതിനായി ഉപയോഗിക്കുന്ന ഉപകരണങ്ങളായ ഹൈഡ്രോഫോണുകളുടെ പ്രധാന ഘടകമാണ് ട്രാൻസ്ഡ്യൂസറുകൾ.
രാജ്യത്ത് ആഭ്യന്തരമായി ട്രാൻസ്ഡ്യൂസറുകൾ നിർമിക്കുന്ന പൊതുമേഖലാ സ്ഥാപനമാണ് കെഇസിഎൽ.