ചൈനയുടെ കേന്ദ്രബാങ്കായ പീപ്പിൾസ് ബാങ്ക് ഓഫ് ചൈന (The People’s Bank of China – PBoC) ഇന്ത്യൻ ഓഹരികൾ ഹോൾഡ് ചെയ്യുന്നത് തുടരുന്നു. ഏകദേശം 25,000 കോടി രൂപയുടെ ഓഹരികളാണ് കൈവശം വെച്ചിരിക്കുന്നതെന്ന് മിന്റ് റിപ്പോർട്ട് ചെയ്യുന്നു.
റിപ്പോർട്ടിലെ വിവരങ്ങളാണ് ഇവിടെ നൽകിയിരിക്കുന്നത്. ഇന്ത്യയിലെ പ്രമുഖ കമ്പനികളായ ടിസിഎസ്, ഇൻഫോസിസ്, ഹിന്ദുസ്ഥാൻ യുണീലിവർ, വേദാന്ത, ഐസിഐസിഐ ബാങ്ക് അടക്കമുള്ള 20 കമ്പനികളിലാണ് നിക്ഷേപം നടത്തിയിരിക്കുന്നതെന്ന് റെഗുലേറ്ററി ഫയലിങ് വിവരങ്ങൾ വ്യക്തമാക്കുന്നു.
ഇന്ത്യ-ചൈന ബന്ധം, കഴിഞ്ഞ മൂന്ന് വർഷങ്ങളായി മെച്ചപ്പെട്ട നിലയിലല്ല. ഈ സാഹചര്യത്തിലും ഇന്ത്യൻ കമ്പനികളിൽ ചൈനീസ് കേന്ദ്രബാങ്ക് നിക്ഷേപം തുടരുന്നു എന്നതാണ് ശ്രദ്ധേയം.
ഇന്ത്യൻ കമ്പനികളിൽ പീപ്പിൾസ് ബാങ്ക് ഓഫ് ചൈനയ്ക്ക് ഏറ്റവുമധികം നിക്ഷേപമുള്ളത് ഇൻഫോസിസ്, ഐസിഐസിഐ ബാങ്ക് എന്നീ കമ്പനികളിലാണ്. ഇൻഫോസിസിൽ 4,678 കോടി രൂപയുടെ നിക്ഷേപമാണുള്ളത്. ഇത് ഏകദേശം 0.8% ഓഹരി പങ്കാളിത്തമാണ്.
ഐസിഐിഐ ബാങ്കിന്റെ 4,583 കോടി രൂപയുടെ ഓഹരികളാണ് ചൈനീസ് കേന്ദ്രബാങ്ക് ഹോൾഡ് ചെയ്യുന്നത്. ഇത് 0.7% പങ്കാളിത്തമാണ്. മൂന്നാമതായി ഏറ്റവുമധികം നിക്ഷേപമുള്ളത് ടിസിഎസിലാണ്. ഈ കമ്പനിയിൽ 0.24% പങ്കാളിത്തമാണ് നേടിയിരിക്കുന്നത്. ഏകദേശം 3,157 കോടി രൂപയുടെ നിക്ഷേപമാണിത്.
ബജാജ് ഫിനാൻസിൽ 0.4% ഷെയർ ഹോൾഡിങ്ങാണ് പീപ്പിൾസ് ബാങ്കിനുള്ളത്. 1,928 രൂപയുടെ ഓഹരികളാണ് ഹോൾഡ് ചെയ്യുന്നത്. ഹിന്ദുസ്ഥാൻ യുണിലിവറിൽ 0.31% ഓഹരിപങ്കളിത്തമാണുള്ളത്. 1,774 കോടി രൂപയാണ് ഓഹരികളുടെ മൂല്യം.
മാരുതി സുസുക്കിയിൽ 1,080 കോടി രൂപയുടെ ഓഹരികൾ ഹോൾഡ് ചെയ്യുന്നു. 0.34% പങ്കാളിത്തമാണിത്. ഏഷ്യൻ പെയിന്റ്സിൽ 1,053 കോടി രൂപയുടെ 0.35% ഹോൾഡിങ്ങാണ് ചൈനീസ് കേന്ദ്രബാങ്കിനുള്ളത്. ടാറ്റ സ്റ്റീൽ, കൊടക് മഹീന്ദ്ര ബാങ്ക് എന്നിവയും പീപ്പിൾസ് ബാങ്കിന്റെ പോർട്ഫോളിയോ ഓഹരികളാണ്.
പീപ്പിൾസ് ബാങ്ക്, തങ്ങളുടെ ഇന്ത്യൻ കമ്പനികളിലെ നിക്ഷേപം 1 ശതമാനത്തിൽ താഴെയാക്കി നിർത്താൻ ജാഗ്രത പുലർത്തുന്നതായി വിദഗ്ധർ ചൂണ്ടിക്കാട്ടുന്നു. ഇന്ത്യയിലെ പബ്ലിക് കമ്പനികളിൽ 1 ശതമാനത്തിൽ താഴെയുള്ള ഓഹരിപങ്കാളിത്തം പബ്ലിക്കായി വെളിപ്പെടുത്തേണ്ടതില്ല എന്ന നിയമമുള്ളതിനാലാണ് ഇത്.
2020ൽ ഹൗസിങ് ഡെവലപ്മെന്റ് ഫിനാിൻസ് കോർപ്പറേഷനിൽ (ഇപ്പോൾ എച്ച്ഡിഎഫ്സി ബാങ്കിൽ ലയിച്ചു) ചൈനീസ് കേന്ദ്രബാങ്കിന് 1 ശതമാനത്തിൽ കൂടുതൽ നിക്ഷേപമുണ്ടെന്ന വിവരം വാർത്തയായതിനെ തുടർന്ന് എച്ച്ഡിഎഫ്സി ഓഹരിവിലകളിൽ ഇടിവ് നേരിട്ടിരുന്നു. തുടർന്ന് പീപ്പിൾസ് ബാങ്ക് എച്ച്ഡിഎഫ്സിയിലെ ഓഹരി പങ്കാളിത്തം 1 ശതമാനത്തിൽ താഴെയാക്കി കുറച്ചിരുന്നു.
മറ്റ് രാജ്യങ്ങളിലെ നിക്ഷേപവുമായി താരതമ്യം ചെയ്യുമ്പോൾ പലവിധ കാരണങ്ങളാൽ ചൈനീസ് കേന്ദ്രബാങ്കിന് ഇന്ത്യയിലുള്ള നിക്ഷേപം കുറവാണെന്ന് വിലയിരുത്തലുണ്ട്. ഇന്ത്യൻ ഓഹരിവിപണികൾ ആകർഷകമാകുമ്പോൾ കൂടുതൽ വിദേശ നിക്ഷേപം വരുന്നത് സ്വാഭാവികമാണെന്നും വിദഗ്ധർ ചൂണ്ടിക്കാട്ടുന്നു.
MCA ഫയലിങ് പ്രകാരമുള്ള വിവരങ്ങളാണ് ഇവിടെ നൽകിയിരിക്കുന്നത്. പാർട്ടിസിപ്പേറ്ററി റൂട്ട് അടക്കമുള്ള പരോക്ഷ മാർഗങ്ങളിലൂടെയുള്ള നിക്ഷേപം ഇവിടെ പരിഗണിച്ചിട്ടില്ല. ചൈനീസ് ബാങ്കിന് സെബിയുടെ പോർട്ഫോളിയോ ഇൻവെസ്റ്റർ റൂൾ ആണ് ബാധകമായിട്ടുള്ളത്.
