മുംബൈ: മൂന്ന് അദാനി ഗ്രൂപ്പ് ഓഹരികള്‍ വെള്ളിയാഴ്ച റെക്കോര്‍ഡ് ഉയരം കൈവരിച്ചു. അദാനി പവര്‍, അദാനി എന്റര്പ്രൈസസ്, അദാനി ട്രാന്‍സ്മിഷന്‍ എന്നീ ഓഹരികളാണ് കുതിപ്പ് നടത്തിയത്. അപ്‌സൈഡ് ഗ്യാപ്പില്‍ ഓപ്പണ്‍ ചെയ്ത ശേഷം ഓഹരികള്‍ എക്കാലത്തേയും ഉയരം കീഴടക്കുകയായിരുന്നു.
അദാനി പവര്‍:പതിവായി പുതിയ ഉയരങ്ങള്‍ താണ്ടുകയാണ് ഈ അദാനി ഗ്രൂപ്പ് ഓഹരി. ഈ ആഴ്ചയിലെ 4 സെഷനുകളിലും റെക്കോര്‍ഡ് നിലവാരമുണ്ടാക്കിയ ഓഹരിയ്ക്ക് മൂന്ന് സെഷനുകളില്‍ അപ്പര്‍ സര്‍ക്യൂട്ടിലെത്താന്‍ സാധിച്ചു. ഒരു മാസത്തിനുള്ളില്‍ 40 ശതമാനത്തിലധികം, ആറുമാസത്തില്‍ 50 ശതമാനം എന്നിങ്ങനെയാണ് ഓഹരിയുടെ വളര്‍ച്ചാ തോത്. കഴിഞ്ഞ ഒരു വര്‍ഷത്തില്‍ നിക്ഷേപകര്‍ക്ക് ഏകദേശം 440 ശതമാനത്തിന്റെ റിട്ടേണാണ് ഓഹരി നല്‍കിയത്.
അദാനി ട്രാന്‍സ്മിഷന്‍: ഗ്യാപ്പ് അപ്പ് ഓപ്പണിംഗ് നടത്തി 3,694 രൂപയുടെ റെക്കോര്‍ഡ് ഉയരം കുറിക്കാന്‍ വെള്ളിയാഴ്ച അദാനി ട്രാന്‍സ്മിഷന്‍ ലിമിറ്റഡ് ഓഹരികള്‍ക്കായി. കഴിഞ്ഞ 4 ട്രേഡ് സെഷനുകളില്‍, മൂന്ന് തവണയും ആജീവനാന്ത ഉയരത്തിലെത്തിയ ഓഹരിയാണിത്. കഴിഞ്ഞ ഒരു മാസത്തിനുള്ളില്‍ ഈ ഓഹരി 21 ശതമാനത്തിലധികം ഉയര്‍ന്നു. ആറ് മാസത്തില്‍ 95 ശതമാനം, 2022 ല്‍ 110 ശതമാനത്തിലധികം, ഒരുവര്‍ഷത്തില്‍ 225 ശതമാനം എന്നിങ്ങനെ ആദായം നിക്ഷേപകന് സമ്മാനിക്കാനും ഓഹരിയ്ക്കായി.
അദാനി എന്റര്പ്രൈസസ്: തുടര്‍ച്ചയായ ആറു സെഷനുകളില്‍ റെക്കോര്‍ഡ് ഉയരത്തിലെത്തിയ മള്‍ട്ടിബാഗര്‍ ഓഹരിയാണിത്. വെള്ളിയാഴ്ച ഗ്യാപ്പ്അപ്പ് ഓപ്പണിംഗ് നടത്തിയ ഓഹരി എന്‍എസ്ഇയില്‍ പിന്നീട് 3,258.90 രൂപ എന്ന റെക്കോര്‍ഡ് ഉയരം താണ്ടുകയായിരുന്നു. ഈ ആഴ്ചയില്‍ 12 ശതമാനത്തിലധികം റിട്ടേണ്‍ നല്‍കിയ ഈ അദാനി ഗ്രൂപ്പ് സ്‌റ്റോക്ക് കഴിഞ്ഞ ഒരു മാസത്തിനുള്ളില്‍ 30 ശതമാനത്തിലധികവും ആറ് മാസത്തിനിടെ, 90 ശതമാനത്തിലധികവും കഴിഞ്ഞ ഒരു വര്‍ഷത്തിനിടെ 125 ശതമാനവും ഉയര്‍ന്നു.
