യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (UIDAI), സൗജന്യമായി ആധാർ പുതുക്കുന്നതിനുള്ള തിയ്യതി ദീർഘിപ്പിച്ചു. 2025 ജൂൺ 14 വരെയാണ് കാലാവധി നീട്ടി നൽകിയിരിക്കുന്നത്.
തുടക്കത്തിൽ 2024 ജൂൺ 14 ആയിരുന്നു കാലാവധി. പീന്നീട് ഇത് 2024 സെപ്തംബർ 14, 2024 ഡിസംബർ 14 എന്നിങ്ങനെ നീട്ടി നൽകിയിരുന്നു. സമയപരിധി അവസാനിക്കാനിരിക്കെയാണ് പുതിയ തീരുമാനം.
നിലവിൽ 2025 ജൂൺ 14 വരെ ആധാർ വിവരങ്ങൾ സൗജന്യമായി അപ്ഡേറ്റ് ചെയ്യാമെന്നും, ഇത് ദശലക്ഷക്കണക്കിന് ആധാർ ഉപയോക്താക്കൾക്ക് ഗുണകരമാകുമെന്നും UIDAI ട്വീറ്റ് ചെയ്തു.
ഈ സൗജന്യ സേവനം myAadhaar portal വഴി മാത്രമായിരിക്കും ലഭ്യമാവുക. ആളുകൾ തങ്ങളുടെ ആധാർ സംബന്ധമായ വിവരങ്ങൾ അപ്ഡേറ്റ് ചെയ്യേണ്ടതാണെന്നും UIDAI അറിയിച്ചു.
ഓൺലൈൻ അപ്ഡേറ്റ്
നിങ്ങളുടെ ആധാർ വിവരങ്ങൾ ഓൺലൈനായും, ഓഫ് ലൈനായും എത്തരത്തിൽ അപ്ഡേറ്റ് ചെയ്യാമെന്ന് താഴെ വിശദീകരിക്കുന്നു.
- UIDAI സെൽഫ് സർവീസ് പോർട്ടൽ സന്ദർശിക്കുക
- ആധാർ നമ്പർ, ക്യാപ്ച്ച കോഡ്, രജിസ്റ്റേർഡ് മൊബൈൽ നമ്പറിൽ ലഭിക്കുന്ന ഒ.ടി.പി എന്നിവ ഉപയോഗിച്ച് ലോഗിൻ ചെയ്യുക
- Document Update സെക്ഷനിൽ പോയി നിലവിലുള്ള വിവരങ്ങൾ വെരിഫൈ ചെയ്യുക
- ഡ്രോപ് ഡൗൺ മെനു ഉപയോഗിച്ച് യോജിച്ച ഡോക്യുമെന്റ് ടൈപ്പ് തെരഞ്ഞെടുക്കുക. വെരിഫിക്കേഷനു വേണ്ടി സ്കാൻ ചെയ്ത കോപ്പികൾ അപ് ലോഡ് ചെയ്തു നൽകുക
- തുടർന്നു ലഭിക്കുന്ന സർവ്വീസ് റിക്വസ്റ്റ് നമ്പർ നോട്ട് ചെയ്തു വെക്കുക. ആധാർ ആപ്ലിക്കേഷന്റെ സ്റ്റാറ്റസ് ട്രാക്ക് ചെയ്യുന്നതിനായി ഈ നമ്പർ പ്രയോജനപ്പെടുത്താം.
ഓഫ് ലൈൻ അപ്ഡേറ്റ്
ബയോമെട്രിക് സംബന്ധമായ് മാറ്റങ്ങൾക്കായി ആധാർ എന്റോൾമെന്റ് സെന്റർ/ആധാർ സേവാ കേന്ദ്ര സന്ദർശിക്കാവുന്നതാണ്. ഇത്തരത്തിൽ ഫിംഗർ പ്രിന്റ്, ഐറിസ് സ്കാൻ, ഫോട്ടോഗ്രാഫുകൾ തുടങ്ങിയവയാണ് അപ്ഡേറ്റ് ചെയ്യാൻ സാധിക്കുക. ഇതിനായി താഴെ നൽകിയിരിക്കുന്ന കാര്യങ്ങൾ പിന്തുടരുക
- UIDAI വെബ്സൈറ്റിൽ നിന്ന് അപ്ഡേറ്റ് ഫോം ഡൗൺലോഡ് ചെയ്തെടുക്കുക
- ആവശ്യമായ രേഖകൾ നൽകി ഫോം ഫിൽ ചെയ്യുക, തുടർന്ന് അടുത്തുള്ള കേന്ദ്രത്തിൽ നൽകുക
- വെരിഫിക്കേഷനു വേണ്ടി ബയോമെട്രിക് വിവരങ്ങൾ നൽകുക
- കേന്ദ്രത്തിൽ നിന്ന് Update Request Number (URN) ഉൾപ്പെടുന്ന സ്ലിപ്പ് കൈപ്പറ്റുക. ഈ നമ്പർ ഉപയോഗിച്ച് അപേക്ഷയുടെ സ്റ്റാറ്റസ് പരിശോധിക്കാം.
