മുംബൈ: ഇന്ത്യയിലെ ഏറ്റവും വലിയ ഡെവലപ്പർ, ലിക്വിഡ് സ്റ്റോറേജ് സൗകര്യങ്ങളുടെ ഓപ്പറേറ്ററായ ഇന്ത്യൻ ഓയിൽടാങ്കിംഗ് ലിമിറ്റഡിന്റെ (IOTL) 49.38 ശതമാനം ഇക്വിറ്റി ഓഹരി ഏറ്റെടുക്കാൻ ഒരുങ്ങി ഇന്ത്യയിലെ ഏറ്റവും വലിയ ട്രാൻസ്പോർട്ട് യൂട്ടിലിറ്റിയായ അദാനി പോർട്ട്സ് ആൻഡ് സ്പെഷ്യൽ ഇക്കണോമിക് സോൺ ലിമിറ്റഡ് (APSEZ).
ഓഹരി ഏറ്റെടുക്കലിനായി കമ്പനി ഓയിൽടാങ്കിംഗ് ഇന്ത്യ ജിഎംബിച്ചുമായി ഒരു നിശ്ചിത കരാറിൽ ഏർപ്പെട്ടു. ഐഒടിഎല്ലിന്റെ 71.57% അനുബന്ധ സ്ഥാപനമായ ഐഒടി ഉത്കൽ എനർജി സർവീസസ് ലിമിറ്റഡിന്റെ 10% അധിക ഇക്വിറ്റി ഓഹരി ഏറ്റെടുക്കുന്നതും ഈ കരാറിൽ ഉൾപ്പെടുന്നു.
ഈ ഇടപാടിലൂടെ അദാനി പോർട്ട്സിന്റെ എണ്ണ സംഭരണശേഷി 200% കുതിച്ച് 3.6 ദശലക്ഷം കെഎൽ ആയി ഉയരും. കൂടാതെ ഇതോടെ അദാനി പോർട്ട്സ് ഇന്ത്യയിലെ ഏറ്റവും വലിയ മൂന്നാം കക്ഷി ദ്രാവക സംഭരണ കമ്പനിയായി മാറും. ആഗോളതലത്തിൽ തന്നെ ഏറ്റവും വലിയ ട്രാൻസ്പോർട്ട് യൂട്ടിലിറ്റി ആകാനുള്ള കമ്പനിയുടെ ലക്ഷ്യങ്ങൾക്ക് അനുസൃതമാണ് ഈ ഇടപാട് എന്ന് അദാനി പോർട്ട്സ് സിഇഒ കരൺ അദാനി പറഞ്ഞു.
1,050 കോടി രൂപയ്ക്കാണ് ഇന്ത്യൻ ഓയിൽടാങ്കിംഗിന്റെ 49.38% ഓഹരികൾ അദാനി പോർട്ട്സ് ഏറ്റെടുത്തത്. കഴിഞ്ഞ 26 വർഷത്തിനിടെ പെട്രോളിയം ഉൽപന്നങ്ങൾ സംഭരിക്കുന്നതിനായി 2.4 ദശലക്ഷം കെഎൽ ശേഷി ഉള്ള ആറ് ടെർമിനലുകളുടെ ഒരു ശൃംഖല ഐഒടിഎൽ നിർമ്മിച്ചിട്ടുണ്ട്. മഹാരാഷ്ട്രയിലെ നവഘർ ടെർമിനൽ, ഛത്തീസ്ഗഡിലെ റായ്പൂർ ടെർമിനൽ, ബൂട്ട് ടെർമിനൽ, ഗോവ ടെർമിനൽ എന്നിവയാണ് കമ്പനിയുടെ ഉടമസ്ഥതയിലുള്ള സൗകര്യങ്ങൾ.
