ജ്വല്ലറി ബിസിനസ് ആരംഭിച്ചിരിക്കുകയാണ് ആദിത്യ ബിർള ഗ്രൂപ്പ്. ജ്വല്ലറി റീട്ടെയിൽ ബിസിനസിൻ്റെ ഭാഗമാകുന്നതിനായി ബിർള ഗ്രൂപ്പ് 5000 കോടി രൂപയാണ് നിക്ഷേപിക്കുന്നത്.
അടുത്ത 5 വർഷത്തിനുള്ളിൽ ദേശീയ തലത്തിലെ മുൻനിര സ്ഥാപനങ്ങളിലൊന്നായി മാറുകയാണ് ലക്ഷ്യം. ഇന്ത്യയിലെ റീട്ടെയിൽ ജ്വല്ലറി മേഖലയിൽ വിപ്ലവകരമായ മാറ്റങ്ങൾ ലക്ഷ്യമിട്ടാണ് ആദിത്യ ബിർള ഗ്രൂപ്പും ഈ രംഗത്തേക്ക് കടന്നു വരുന്നത്.
ആഗോള തലത്തിൽ തന്നെ ഏറ്റവും സാധ്യതകളുള്ള ജ്വല്ലറി റീട്ടയിൽ വിഭാഗമാണ് ഇന്ത്യയിലേത്. ഈ വിഭാഗത്തിലേക്കും ബിർള ഗ്രൂപ്പ് കടന്ന് വരുന്നത് റീട്ടെയിൽ രംഗത്ത് നിർണായകമാകും.
പെയിന്റ്, ജ്വല്ലറി എന്നീ മേഖലകളിലായി പുതിയ രണ്ടു ബ്രാൻഡുകൾ ഈ വർഷം ആദിത്യ ബിർള ഗ്രൂപ്പ് അവതരിപ്പിച്ചിരുന്നു. ഫാഷൻ റീട്ടെയിൽ, ലൈഫ് സൈ്റ്റൽ മേഖലകളിൽ 20 വർഷത്തിലേറെയായി ബിർള ഗ്രൂപ്പിന് സാന്നിധ്യമുണ്ട്.
റീട്ടെയിൽ, ഡിസൈൻ, ബ്രാൻഡ് മാനേജ്മെന്റ് എന്നിവ ജ്വല്ലറി ബിസിനസിനും സഹായകപരമാകുമെന്ന് കരുതുന്നതായി ബിർള ഗ്രൂപ്പ് ചെയർമാൻ ആദിത്യ ബിർള പറയുന്നു. ഇന്ദ്രിയ എന്ന ബ്രാൻഡിന് കീഴിലാകും ജ്വല്ലറി ബിസിനസ് ഏകോപിപ്പിക്കുക.
ഡൽഹി, ഇൻഡോർ, ജയ്പുർ എന്നിവിടങ്ങളിലായി ഒരേ സമയം നാലു സ്റ്റോറുകളാവും ആരംഭിക്കുക. അടുത്ത 6 മാസത്തിനുള്ളിൽ 10ലേറെ നഗരങ്ങളിലേക്കു പ്രവർത്തനം വ്യാപിപ്പിക്കും.
ദേശീയ ബ്രാൻഡുകളുടെ സ്റ്റോറുകളുടെ ശരാശരി വലുപ്പത്തേക്കാൾ കൂടിയ വിസ്തൃതിയിലാകും സ്റ്റോറുകൾ എന്നാണ് സൂചന.
7000 ചതുരശ്ര അടിയിലേറെയുള്ള സ്റ്റോറുകളിലാവും വിപുലമായ സേവനങ്ങൾ ലഭ്യമാക്കുക. തുടക്കത്തിൽ 15000 ക്യൂറേറ്റഡ് ജ്വല്ലറികൾ വിപണിയിൽ അവതരിപ്പിക്കും. 5000ലേറെ എക്സ്ക്ലൂസീവ് ഡിസൈനുകൾ ലഭ്യമാകും.
ഓരോ 45 ദിവസത്തിലും പുതിയ കളക്ഷൻ അവതരിപ്പിക്കാനാണ് ഗ്രൂപ്പ് ലക്ഷ്യമിടുന്നത്. ജ്വല്ലറി മേഖലയിലെ സാങ്കേതികവിദ്യയിലും, ഉപഭോക്തൃ അനുഭവങ്ങളിലും പുതിയ മാറ്റം കൊണ്ടുവരാൻ കമ്പനി ശ്രമിക്കും.
ബിർള കോർപ്പറേഷൻ ഓഹരികൾ മുന്നേറുമോ?
മൾട്ടിനാഷണൽ കമ്പനിയാണ് ആദിത്യ ബിർള ഗ്രൂപ്പ്. ലോഹങ്ങൾ, സിമൻ്റ്, തുണിത്തരങ്ങൾ, കാർഷിക ബിസിനസുകൾ, ടെലികമ്മ്യൂണിക്കേഷൻ, ഐടി, ധനകാര്യ സേവനങ്ങൾ എന്നിങ്ങനെ വിവിധ ബിസിനസുകളാണ് കമ്പനിക്ക് കീഴിലുള്ളത്. എന്നാൽ ബിർള കോർപ്പറേഷൻ ലിമിറ്റഡ് ഓഹരി ആദിത്യ ബിർള ഗ്രൂപ്പിൻേറതല്ല.
എം.പി ബിർള ഗ്രൂപ്പിൻ്റെ കീഴിലുള്ള ഒരു കമ്പനിയാണിത്. ജ്യൂട്ട് നിർമാതാക്കളായ കമ്പനിയും സിമൻ്റ് ലിനോലിയം തുടങ്ങി വിവിധ ബിസിനസുകൾക്ക് നേതൃത്വം നൽകുന്നു. 1998-ൽ ആണ് ബിർള കോർപ്പറേഷൻ ലിമിറ്റഡ് എന്ന് കമ്പനി പേരു മാറ്റിയത്.
ആദിത്യ ബിർള ഗ്രൂപ്പ് ലിസ്റ്റഡ് കമ്പനികൾ
ആദിത്യ ബിർള കാപിറ്റൽ, ആദിത്യ ബിർള ഫാഷൻ ആൻഡ് റീട്ടെയിൽ, ആദിത്യ ബിർള സൺലൈഫ്, ആദിത്യ ബിർള മണി ലിമിറ്റഡ്, ഗ്രാസിം, ഹിൻഡാൽകോ, വോഡഫോൺ ഐഡിയ, അൾട്രാടെക്ക് സിമന്റ് എന്നിവയാണ് ആദിത്യ ബിർള ഗ്രൂപ്പിന് കീഴിലുള്ള ലിസ്റ്റഡ് കമ്പനികൾ.
