മുംബൈ: മുകേഷ് അംബാനിയുടെ(Mukesh Ambani) റിലയന്‍സ് ഇന്‍ഡസ്ട്രീസ് ലിമിറ്റഡിന്(Reliance Industries Limited) കൂടുതല്‍ ഇളവുകള്‍ അനുവദിച്ച് സര്‍ക്കാര്‍.
അഡ്വാന്‍സ്ഡ് കെമിസ്ട്രി സെല്‍ (എസിസി/ACC) ബാറ്ററികള്‍ നിര്‍മ്മിക്കുന്നതിനാണ് ഇളവ്. 3,620 കോടി രൂപയുടെ ഇളവാണ് അനുവദിച്ചിട്ടുള്ളത്.
ക്വാളിറ്റി ആന്‍ഡ് കോസ്റ്റ് ബേസ്ഡ് സെലക്ഷന്‍ (ക്യുസിബിഎസ്/QCBS) മെക്കാനിസത്തെ അടിസ്ഥാനമാക്കിയുള്ള പ്രൊഡക്ഷന്‍ ലിങ്ക്ഡ് ഇന്‍സെന്റീവ് (പിഎല്‍ഐ/PLI) സ്‌കീമിന് കീഴിലാണ് പ്രഖ്യാപനം.
ഇതിന്റെ ഭാഗമായി 10 GWh അഡ്വാന്‍സ്ഡ് കെമിസ്ട്രി സെല്‍ ബാറ്ററി ശേഷിയുള്ള സ്റ്റോറേജ് പ്ലാന്റ് കമ്പനിക്കു ലഭിച്ചു. ആഭ്യന്തര ഉല്‍പ്പാദന ശേഷി വര്‍ധിപ്പിക്കുക, ഇറക്കുമതിയെ ആശ്രയിക്കുന്നത് കുറയ്ക്കുക, എസിസി ബാറ്ററി ഉല്‍പ്പാദനത്തില്‍ ഇന്ത്യയെ ആഗോള നേതാവായി ഉയര്‍ത്തുക എന്നിവയാണ് സര്‍ക്കാര്‍ പദ്ധതികളിലൂടെയും, ഇളവുകളിലൂടെയും ലക്ഷ്യമിടുന്നത്.
ഇന്ത്യന്‍ കേന്ദ്ര ഘനവ്യവസായ മന്ത്രാലയം (എംഎച്ച്‌ഐ) ആണ് അഡ്വാന്‍സ്ഡ് കെമിസ്ട്രി സെല്‍ ബാറ്ററി സംഭരണത്തിനുള്ള പ്രൊഡക്ഷന്‍ ലിങ്ക്ഡ് ഇന്‍സെന്റീവ് സ്‌കീമിന് കീഴില്‍ റിലയന്‍സിനെ വിജയകരമായ ലേലക്കാരനായി പ്രഖ്യാപിച്ചിരിക്കുന്നത്.
ഈ വര്‍ഷം ജനുവരി 24ന് പ്രഖ്യാപിച്ച 3,620 കോടി രൂപയുടെ പരമാവധി ബജറ്റ് അടങ്കലുള്ള 10 GWh എസിസി ഉല്‍പ്പാദന ശേഷിയുടെ റീ- ബിഡ്ഡിംഗ് പ്രക്രിയയില്‍ ഏഴ് കമ്പനികളില്‍ നിന്ന് മന്ത്രാലയം അപേക്ഷകള്‍ സ്വീകരിച്ചിരുന്നു.
എസിഎംഇ ക്ലീന്‍ടെക് സൊല്യൂഷന്‍സ് പ്രൈവറ്റ് ലിമിറ്റഡ്, അമര രാജ അഡ്വാന്‍സ്ഡ് സെല്‍ ടെക്‌നോളജീസ് പ്രൈവറ്റ് ലിമിറ്റഡ്, അന്‍വി പവര്‍ ഇന്‍ഡസ്ട്രീസ് പ്രൈവറ്റ് ലിമിറ്റഡ്, ജെഎസ്ഡബ്ല്യു നിയോ എനര്‍ജി ലിമിറ്റഡ്, ലൂക്കാസ് ടിവിഎസ് ലിമിറ്റഡ്, റിലയന്‍സ് ഇന്‍ഡസ്ട്രീസ് ലിമിറ്റഡ് എന്നിവരാണ് ലേലത്തില്‍ പങ്കെടുത്തത്.
ഏഴ് ബിഡുകളും വിലയിരുത്തിയ ശേഷം, ആര്‍എഫ്പി ആവശ്യകതകള്‍ക്ക് അനുസൃതമായി ആറ് കമ്പനികളെ സാമ്പത്തിക മൂല്യനിര്‍ണയത്തിനായി ഷോര്‍ട്ട്ലിസ്റ്റ് ചെയ്യുകയായിരുന്നു.
വൈദ്യുതോര്‍ജ്ജത്തെ ഇലക്ട്രോകെമിക്കല്‍ ആയോ കെമിക്കല്‍ എനര്‍ജിയായോ സംഭരിച്ച് ആവശ്യാനുസരണം വൈദ്യുതോര്‍ജ്ജമാക്കി മാറ്റാന്‍ കഴിയുന്ന പുതിയ തലമുറ സാങ്കേതികവിദ്യയാണ് അഡ്വാന്‍സ്ഡ് കെമിസ്ട്രി സെല്‍.
പുനരുപയോഗ ഊര്‍ജ മേഖലയില്‍ നൂതനത്വവും, സ്വാശ്രയത്വവും വളര്‍ത്തുന്നതിനുള്ള സര്‍ക്കാര്‍ നടപടികളുടെ ഭാഗമാണ് പുതിയ പദ്ധതി.
അഡ്വാന്‍സ്ഡ് കെമിസ്ട്രി സെല്ലുകള്‍ ഊര്‍ജമേഖലയില്‍ വന്‍ വിപ്ലവം സൃഷ്ടിക്കുമെന്നാണു വിലയിരുത്തല്‍. ലിഥിയം അയണ്‍ ബാറ്ററി മുതല്‍ മറ്റു ഊര്‍ജ സംഭരണ സിസ്റ്റങ്ങള്‍ക്കു അടിസ്ഥാനം കൂടിയാണ് എസിസി.
അതിനാല്‍ തന്നെ എസിസിയുടെ വികസനം ഇലക്ട്രിക് വാഹന മേഖല മുതല്‍ ഇലക്ട്രോണിക്സ് മേഖലയ്ക്കു വരെ പ്രധാനമാണ്.
പരമ്പരാഗത ലിഥിയം അയണ്‍ ബാറ്ററികളേക്കാള്‍ കൂടുതല്‍ സമയത്തേക്ക് കൂടുതല്‍ ഊര്‍ജ്ജം നല്‍കാന്‍ എസിസി ബാറ്റികള്‍ക്കാകും. ഉയര്‍ന്ന കാര്യക്ഷമതയാണ് എസിസി ബാറ്ററികളുടെ പ്രധാന പ്രത്യേകത.
ഇലക്ട്രിക് വാഹനങ്ങള്‍, പോര്‍ട്ടബിള്‍ ഇലക്ട്രോണിക് ഉപകരണങ്ങള്‍ പോലുള്ള ഉയര്‍ന്ന പ്രകടനവും, വിശ്വാസ്യതയും ആവശ്യമായ ആപ്ലിക്കേഷനുകളില്‍ എസിസി ബാറ്റികള്‍ അനുയോജ്യമാണ്.
