വീണ്ടും ലോകത്തെ അമ്പരപ്പിച്ച് ഏഷ്യന്‍ അതിസമ്പന്നന്‍. വെറും 120 മണിക്കൂറില്‍ 35,860 കോടി രൂപയുടെ ആസ്തി വര്‍ധനയാണ് മുകേഷ് അംബാനിയുടെ റിലയന്‍സ് സാമ്രാജ്യം നേടിയത്.
ഇതോടെ 17.48 ലക്ഷം കോടി രൂപ വിപണി മൂല്യമുള്ള അദ്ദേഹത്തിന്റെ റിലയന്‍സ് ഇന്ത്യയിലെ ഏറ്റവും മൂല്യമുള്ള കമ്പനിയെന്ന ഖ്യാതി അരക്കിട്ട് ഉറപ്പിച്ചു. കഴിഞ്ഞ വാരം, തിങ്കള്‍ മുതല്‍ വെള്ളി വരെയുള്ള 5 ട്രേഡിംഗ് സെഷനുകളില്‍, കൃത്യമായി പറഞ്ഞാല്‍ 120 മണിക്കൂറില്‍ 35,860.79 കോടി രൂപയുടെ വിപണി മൂല്യമാണ് വര്‍ധിച്ചത്.
ഓഹരി വിപനികളിലെ ഈ തകര്‍പ്പന്‍ പ്രകടനം മുകേഷ് അംബാനിയുടെ വ്യക്തിഗത ആസ്തിയിലും കുതിപ്പിന് വഴിവച്ചു. കഴിഞ്ഞ വാരം സമ്മര്‍ദം നേരിട്ട ഇന്ത്യന്‍ ഓഹരി സൂചികകളെ വിജയവഴിയില്‍ തിരിച്ചെത്തിച്ചതിലും റിലയന്‍സ് ഓഹരികള്‍ക്കു വലിയ പങ്കുണ്ട്.
റിപ്പോര്‍ട്ടുകള്‍ പ്രകാരം 67 വയസുകാരനായ മുകേഷ് അംബാനിയുടെ നിലവിലെ ആസ്തി 101.6 ബില്യണ്‍ ഡോളര്‍ ആണെന്ന് ഫോര്‍ബ്‌സ് വ്യക്തമാക്കുന്നു. ഫോര്‍ബ്സിന്റെ ലോക ശതകോടീശ്വര പട്ടികയില്‍ നിലവില്‍ 18 -ാം സ്ഥാനത്താണ് അദ്ദേഹം.
മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് ഏറ്റവും മൂല്യമുള്ള ആഭ്യന്തര സ്ഥാപനമായി തുടരുന്നു. ടാറ്റ കണ്‍സള്‍ട്ടന്‍സി സര്‍വീസസ് (ടിസിഎസ്), എച്ച്ഡിഎഫ്‌സി ബാങ്ക്, ഭാരതി എയര്‍ടെല്‍, ഐസിഐസിഐ ബാങ്ക്, ഇന്‍ഫോസിസ്, എസ്ബിഐ, എല്‍ഐസി, ഐടിസി, ഹിന്ദുസ്ഥാന്‍ യൂണിലിവര്‍ തുടങ്ങിയവരാണ് വിപണിമൂല്യത്തില്‍ റിലയന്‍സിന് പിന്നിലുള്ളത്.
വെള്ളിയാഴ്ച റിലയന്‍സ് ഓഹരി വില 1.63% (20.70 രൂപ) ഉയര്‍ന്ന് 1,291.50 രൂപയിലാണ് വ്യാപാരം അവസാനിപ്പിച്ചത്. കമ്പനിയുടെ ഗ്രീന്‍ എനര്‍ജി വികസനങ്ങളാണ് നേട്ടത്തിനു വഴിവച്ചത്. അടുത്ത 10- 5 വര്‍ഷത്തിനുള്ളില്‍ 80 ബില്യണ്‍ യുഎസ് ഡോളര്‍ പുനഃരുപയോഗ ഊര്‍ജത്തിനായി നിക്ഷേപിക്കുമെന്നും, റിഫൈനറിക്ക് അടുത്തായി ഒരു പുതിയ സമുച്ചയം നിര്‍മ്മിക്കുമെന്നും ഫോര്‍ബ്‌സ് റിപ്പോര്‍ട്ട് ചെയ്യുന്നു.
നിലവില്‍ റിലയന്‍സ് പോര്‍ട്ട്‌ഫോളിയോ ശക്തിപ്പെടുത്തുന്ന തിരക്കിലാണ് അംബാനി. ഇതിന്റെ ഭാഗമായി വന്‍ ഏറ്റെടുപ്പുകളും, സഹകരണങ്ങളുമാണ് കമ്പനി പ്രഖ്യാപിക്കുന്നത്. 2023 -ല്‍ മക്കളായ ഇഷ അംബാനി, ആകാശ് അംബാനി, അനന്ത് അംബാനി എന്നിവരെ അദ്ദേഹം റിലയന്‍സിന്റെ ബോര്‍ഡില്‍ എത്തിച്ചിരുന്നു.
ആകാശ് ജിയോയുടെ തലപ്പത്താണ്. ഇഷ റീട്ടെയില്‍, സാമ്പത്തിക സേവനങ്ങളുടെ മേല്‍നോട്ടം വഹിക്കുന്നു. ആനന്ദിനാണ് എനര്‍ജി ബിസിനസിന്റെ ചുമതല.
റിലയന്‍സ് ഇന്‍ഡസ്ട്രീസ്: ഒറ്റനോട്ടത്തില്‍
- നിലവിലെ ഓഹരി വില: 1,292 രൂപ
- 52 വീക്ക് ഹൈ/ ലോ: 1,609 രൂപ/ 1,198 രൂപ
- സ്‌റ്റോക്ക് പിഇ: 25.8
- ബുക്ക് വാല്യൂ: 606 രൂപ
- ഡിവിഡന്റ്: 0.39%
- ആര്‍ഒസിഇ: 9.61%
- ആര്‍ഒഇ: 9.25%
- മുഖവില: 10 രൂപ
