മുംബൈ: നിയന്ത്രണങ്ങൾക്ക് വിധേയമായി അനിൽ അംബാനിയുടെ റിലയൻസ് സെക്യൂരിറ്റീസിന്റെ നിയന്ത്രണത്തിൽ നിർദ്ദേശിച്ചിരിക്കുന്ന മാറ്റങ്ങൾക്ക് വിപണി റെഗുലേറ്ററായ സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ (സെബി) അനുമതി നൽകിയതായി റിപ്പോർട്ട്.
പേരന്റായ റിലയൻസ് ക്യാപിറ്റലിലെ പ്രൊമോട്ടർ ഗ്രൂപ്പിലെ മാറ്റത്തിന് മുന്നോടിയായി നിയന്ത്രണത്തിൽ മാറ്റത്തിനായി സെബിയുടെ മാർക്കറ്റ് ഇന്റർമീഡിയറീസ് ഡിപ്പാർട്ട്മെന്റിനോട് കമ്പനി നേരത്തേ അഭ്യർത്ഥിച്ചിരുന്നു.
അനിൽ അംബാനിയുടെ കടക്കെണിയിലായ റിലയൻസ് ക്യാപിറ്റലിനെ ഏറ്റെടുക്കാനുള്ള ലേലത്തിൽ അടുത്തിടെ ഹിന്ദുജ ഗ്രൂപ്പ് ലക്ഷ്യം കണ്ടിരുന്നു. ഹിന്ദുജ ഗ്രൂപ്പിൽ നിന്ന് 9,650 കോടി രൂപയുടെ ബൈഔട്ട് ഓഫർ ആണ് റിലയൻസ് ക്യാപിറ്റൽ നേടിയത്.
റിലയൻസ് ക്യാപിറ്റലിനെയും അതിന്റെ ഓപ്പറേറ്റിംഗ് കമ്പനികളെയും റീബ്രാൻഡ് ചെയ്യുന്നതിനുള്ള നടപടികൾ ഹിന്ദുജ ഗ്രൂപ്പ് ആരംഭിച്ചതായും റിപ്പോർട്ടുണ്ട്.
ഹിന്ദുജ ഗ്രൂപ്പിന്റെ ഉടമസ്ഥതയിലുള്ള IndusInd International Holdings (IIHL) ആണ് ഇൻസോൾവൻസി ആൻഡ് ബാങ്ക്റപ്സി കോഡിന്റെ (IBC) കോർപ്പറേറ്റ് ഇൻസോൾവൻസി റെസൊല്യൂഷൻ പ്രൊസീഡിംഗ്സ് (CIRP) പ്രക്രിയയ്ക്ക് കീഴിൽ റിലയൻസ് ക്യാപിറ്റലിനെ വിജയകരമായി സ്വന്തമാക്കിയത്.
റിലയൻസ് ക്യാപിറ്റലിന്റെ ഉടമസ്ഥതയിലുള്ള ഓഹരികൾ, ഹിന്ദുജയുടെ നേതൃത്വത്തിലുള്ള ഏഷ്യാ എന്റർപ്രൈസസിന് കൈമാറുന്നതിന് എൻഎസ്ഇ, ബിഎസ്ഇ, എംസിഎക്‌സ്, എൻസിഡിഎക്‌സ് എന്നിവയിൽ നിന്ന് അനിൽ അംബാനിയുടെ റിലയൻസ് സെക്യൂരിറ്റീസിന് അനുമതി ലഭിച്ചെന്നും റിപ്പോർട്ടുകൾ വ്യക്തമാക്കുന്നു.
പാപ്പരത്ത നിയമത്തിന് കീഴിൽ സ്വന്തമാക്കിയ റിലയൻസ് ക്യാപിറ്റലിനായി ഹിന്ദുജ ഗ്രൂപ്പ് ഫണ്ട് കണ്ടെത്താനുള്ള ശ്രമത്തിലാണെന്നും അടുത്ത വൃത്തങ്ങൾ വ്യക്തമാക്കുന്നു. മൂന്നു ജാപ്പനീസ് ബാങ്കുകളിൽ നിന്നായി 8,000 കോടി രൂപ വായ്‌പെയടുക്കാനാണു ശ്രമം.
ജാപ്പനീസ് ബാങ്കുകളായ മിസുഹോ, എസ്എംബിസി, എംയുഎഫ്ജി എന്നിവയുമായി ഹിന്ദുജ ഗ്രൂപ്പ് ചർച്ചകൾ നടത്തിവരികയാണ്. ഇടപാട് അവസാനിപ്പിക്കുന്നതിന് പാപ്പരത്വ കോടതി നിശ്ചയിച്ചിരിക്കുന്ന മെയ് 27 -ന് മുമ്പ് വായ്പ ഉറപ്പാക്കാനാണ് ഗ്രൂപ്പ് ശ്രമിക്കുന്നുത്.
റിലയൻസ് ക്യാപിറ്റൽ ഡീലോടെ, ലൈഫ്, ജനറൽ, ഹെൽത്ത് ഇൻഷുറൻസ് ബിസിനസുകളിലേക്ക് ഹിന്ദുജ ഗ്രൂപ്പിന് പ്രവേശനം ലഭിക്കും. കമ്പനി ഉടനെ മ്യൂച്വൽ ഫണ്ട് രംഗത്തേക്കും പ്രവേശിച്ചേക്കുമെന്നു ചില സംസാരമുണ്ട്.
എന്തായാലും നിലവിലെ നടപടികൾ അനിൽ അംബാനിക്ക് മികച്ച ആശ്വാസം പകരുമെന്ന കാര്യത്തിൽ തർക്കമില്ല.
