കത്തിയമര്‍ന്ന ചാരത്തില്‍ നിന്ന് ഉയര്‍ത്തെഴുന്നേല്‍ക്കുന്ന ഫീനിക്‌സ് പക്ഷിയുടെ കഥ നിങ്ങള്‍ കേട്ടിരിക്കും. എന്നാല്‍ ഈ കഥ അനില്‍ അംബാനിയെ സംബന്ധിച്ച് യാഥാര്‍ത്ഥ്യമാകുകയാണ്.
ലോക കോടീശ്വര പട്ടികയിലെ ആറാം സ്ഥാനത്ത് നിന്ന് പാപ്പരത്വത്തിന്റെ പടുക്കുഴിയിലേയ്ക്ക് വീണ അംബാനി സഹോദരന്‍ വീണ്ടും ഉയരങ്ങള്‍ കീഴടക്കുന്ന തിരക്കിലാണ്.
പോര്‍ട്ട്‌ഫോളിയോയിലെ കമ്പനികളെ കടരഹിതമാക്കുന്നതിനൊപ്പം നിരവധി പുതിയ ബിസിനസ് ചുവടുവയ്പ്പുകളാണ് റിലയന്‍സ് ഗ്രൂപ്പ് നടത്തുന്നത്.
നിലവില്‍ അദ്ദേഹത്തിന്റെ പോര്‍ട്ട്‌ഫോളിയോയിലെ പ്രധാന സ്ഥാപനങ്ങളിലൊന്നായ റിലയന്‍സ് ഇന്‍ഫ്രയാണ് ശ്രദ്ധ ആകര്‍ഷിക്കുന്നത്. 9,831 കോടി രൂപ വിപണിമൂല്യമുള്ള റിലയന്‍സ് ഇന്‍ഫ്ര അതിന്റെ ബിസിനസ് പോര്‍ട്ട്‌ഫോളിയോ വര്‍ദ്ധിപ്പിക്കുന്നതിന്റെ ഭാഗമായി റിന്യൂവബിള്‍ എനര്‍ജി ഉപകരണങ്ങളുടെ നിര്‍മ്മാണത്തിലേയ്ക്ക് കടക്കുകയാണ്.
ബിസിനസിനെ മുന്നോട്ടുനയിക്കാന്‍ കമ്പനി ഇതിനകം തന്നെ പ്രധാന നിയമനങ്ങള്‍ നടത്തിക്കഴിഞ്ഞുവെന്നാണ് റിപ്പോര്‍ട്ട്.
പുനഃരുപയോഗ ഊര്‍ജ്ജ ഉ്പകരണ നിര്‍മ്മാണത്തിന്റെ ചീഫ് എക്സിക്യൂട്ടീവ് ഓഫീസറായി (സിഇഒ) ഇവാന്‍ സാഹയെയും, ബാറ്ററി മാനുഫാക്ചറിംഗ് സിഇഒ ആയി മുഷ്താഖ് ഹുസൈനെയും നിയമിച്ചിട്ടുണ്ട്.
മെട്രോ റെയിലുകള്‍, ടോള്‍ റോഡുകള്‍, വൈദ്യുതി വിതരണം എന്നിവയില്‍ ഇതിനോടകം പ്രവര്‍ത്തിക്കുന്ന റിലയന്‍സ് ഇന്‍ഫ്ര, രാജ്യത്തെ പ്രമുഖ അടിസ്ഥാന സൗകര്യ വികസന കമ്പനികളില്‍ ഒന്നാണ്.
പുനരുപയോഗ ഊര്‍ജ ഉല്‍പ്പാദന വ്യവസായത്തിലേയ്ക്കുള്ള റിലയന്‍സ് ഇന്‍ഫ്രയുടെ തന്ത്രപ്രധാനമായ കടന്നുവരവ് നിക്ഷേപകര്‍ക്കും ആവേശം പകരുന്നതാണ്.
രാജ്യത്ത് ഒരു സംയോജിത സോളാര്‍ നിര്‍മ്മാണ യൂണിറ്റ് സ്ഥാപിക്കാന്‍ കമ്പനി ലക്ഷ്യമിടുന്നുവെന്നാണ് അടുത്തവൃത്തങ്ങള്‍ നല്‍കുന്ന സൂചന.
സോളാര്‍ പാനലുകളുടെയും ഘടകങ്ങളുടെയും തദ്ദേശിയ ഉല്‍പ്പാദനം വര്‍ധിപ്പിക്കുക, ശുദ്ധമായ ഊര്‍ജ്ജത്തില്‍ സ്വയംപര്യാപ്തത പ്രോത്സാഹിപ്പിക്കുക എന്ന ലക്ഷ്യങ്ങളാണ് കമ്പനിക്കുള്ളത്. ഇതു സര്‍ക്കാര്‍ ലക്ഷ്യങ്ങളുമായി ഒന്നിച്ചുപോകുന്നവയുമാണ്.
അര്‍ദ്ധചാലകങ്ങളിലും, സോളാര്‍ സാങ്കേതികവിദ്യയിലും, ഉപകരണ രൂപകല്‍പ്പനയിലും 30 വര്‍ഷത്തിലേറെ പരിചയമുള്ള സാഹയാണ് കമ്പനിയുടെ സോളാര്‍ നിര്‍മ്മാണത്തിന് നേതൃത്വം നല്‍കുന്നതെന്നതും ശ്രദ്ധേയം തന്നെ.
വിക്രം സോളാര്‍, റിന്യൂ പവര്‍ തുടങ്ങിയ മേഖലകളിലെ മുന്‍നിര കമ്പനികളില്‍ പ്രവര്‍ത്തിച്ചിട്ടുള്ള അനുഭവ പരിചയം സാഹയ്ക്കുണ്ട്.
സംയോജിത ബാറ്ററി നിര്‍മ്മാണ യൂണിറ്റ് ഗ്രിഡ് ആപ്ലിക്കേഷനുകള്‍ക്കും, ഇലക്ട്രിക് മൊബിലിറ്റിക്കുമായി വിപുലമായ ഊര്‍ജ്ജ സംഭരണ സൊല്യൂഷനുകള്‍ വികസിപ്പിക്കുന്നതിലാകും ഇദ്ദേഹം ശ്രദ്ധ കേന്ദ്രീകരിക്കുക.
ഓട്ടോമോട്ടീവ്, റിന്യൂവബിള്‍ എനര്‍ജി, കണ്‍സ്യൂമര്‍ ഇലക്ട്രോണിക്‌സ്, പവര്‍ ടൂള്‍സ് മേഖലകളില്‍ 25 വര്‍ഷത്തെ വൈദഗ്ധ്യം ഉള്ള മറ്റൊരു പേരാണ് ഹുസൈന്‍. മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് ലിമിറ്റഡ്, ഇലോണ്‍ മസ്‌കിന്റെ ടെസ്ല തുടങ്ങിയ പ്രമുഖ സ്ഥാപനങ്ങളില്‍ ഹുസൈന്‍ നേതൃസ്ഥാനങ്ങള്‍ വഹിച്ചിട്ടുണ്ട്.
