പ്രതിസന്ധികൾ നേരിടുന്ന അനിൽ അംബാനിയുടെ കമ്പനിക്ക് പുതിയ ഡീൽ ലഭിച്ചു. ജെഎസ്ഡബ്ല്യു റിന്യൂവബിൾ എനർജിയുടെ 132.9 കോടി രൂപയുടെ ഓർഡറാണ് അനിൽ അംബാനിയുടെ റിലയൻസ് പവർ നേടിയത്.
മഹാരാഷ്ട്രയിൽ 45MW വിൻഡ് പവർ പ്രൊജക്ടുമായി ബന്ധപ്പെട്ടതാണ് ഓർഡർ. കഴിഞ്ഞ ഏതാനും ആഴ്ച്ചകളിൽ വില കുതിച്ചിരുന്ന റിലയൻസ് പവർ അതിന് ശേഷം ഇടിവ് നേരിട്ടിരുന്നു. 2020 മാർച്ചി്‍ 1.13 രൂപയായിരുന്നു ഈ ഓഹരിയുടെ വില. എന്നാൽ ഇപ്പോഴത്തെ ഓഹരിവില 26.05 രൂപയാണ്.
ഐസിഐസിഐ ബാങ്ക്, ആക്സിസ് ബാങ്ക്, ഡിബിഎസ് ബാങ്ക് എന്നിവടങ്ങളിലെ കടബാധ്യത തീർത്ത് ഒരു തിരിച്ചുവരവിനുള്ള ശ്രമമാണ് റിലയൻസ് പവർ നടത്തുന്നത്. ഇതിനായി 400 കോടി രൂപയുടെ കടമാണ് കമ്പനി തിരിച്ചടച്ചത്. ഇതിലൂടെ ആകെ കടബാധ്യതയുടെ 30-35% പേയ്മെന്റ് നടത്തി.
ജെസി ഫ്ലവേഴ്സ് അസറ്റ് റീ കൺസ്ട്രക്ഷൻ സെറ്റിൽമെന്റുമായി ബന്ധപ്പെട്ട് 2100 കോടി രൂപയുടെ കടം തിരിച്ചടടയ്ക്കാനും റിലയൻസ് പവർ ശ്രമിക്കുന്നുണ്ട്. ഈ വർഷത്തിന്റെ തുടക്കത്തിൽ THDC ഇന്ത്യയുടെ 128.39 കോടി രൂപയുടെ ഓർഡറുകളും റിലയൻസ് പവർ നേടിയിരുന്നു.
കടബാധ്യതയിൽ നിന്ന് കരകയറാൻ ഊർജ്ജിതശ്രമം നടത്തുന്ന അനിൽ അംബാനിക്ക് കഴിഞ്ഞ ദിവസത്തെ സുപ്രീം കോടതി ഉത്തരവ് തിരിച്ചടി നൽകിയിരുന്നു. റിലയൻസ് ഇൻഫ്രാസ്ട്രക്ചറിന്റെ മെട്രോ വിഭാഗമായ ഡൽഹി എയർപോർട്ട് മെട്രോ എക്സ്പ്രസ് പ്രൈവറ്റ് ലിമിറ്റഡും, ഡൽഹി മെട്രോ കോർപ്പറേഷനും തമ്മിലുള്ള തർക്കത്തിൽ ആർബിട്രേഷൻ തുകയായി DAMEPLന് ലഭിക്കാനിരുന്ന 8000 കോടി രൂപ DMRC നൽകേണ്ടതില്ലെന്ന് കോടതി വിധിച്ചു. മാത്രമല്ല DMRC നൽകിയ 3300 കോടി രൂപ അനിൽ അംബാനിയുടെ കമ്പനി തിരികെ നൽകാനും ഉത്തരവിട്ടിരുന്നു.
ഇത് കൂടാതെ, അനിൽ അംബാനി നേതൃത്ത്വം നൽകുന്ന റിലയൻസ് ക്യാപിറ്റൽ, ഹിന്ദുജ ഗ്രൂപ്പിന് കീഴിലുള്ള ഇൻഡസ് ഇൻഡ് ഇന്റർനാഷണൽ ഹോൾഡിങ്സുമായി നടത്താൻ തീരുമാനിച്ച ഇടപാടുമായി ബന്ധപ്പെട്ടും പ്രതിസന്ധി നേരിടുന്നു.
കടം കയറിയ റിലയൻസ് ക്യാപിറ്റലിന്റെ 9650 കോടി രൂപയുടെ ഏറ്റെടുക്കൽ നടപടികൾ ഇൻഷുറൻസ് മാനദണ്ഡങ്ങൾ പാലിക്കാതെയാണെന്ന് ഇൻഷുറൻസ് റെഗുലേറ്ററായ IRDAI വിലയിരുത്തിയത് കഴിഞ്ഞ ദിവസമാണ്.
ഇത്തരം തിരിച്ചടികൾക്കിടെ തന്റെ കമ്പനികൾക്ക് പുതിയ ഓർ‍ഡറുകൾ ലഭിക്കുന്നത് അനിൽ അംബാനിയെ സംബന്ധിച്ച് നിലവിലെ സാഹചര്യത്തിൽ ആശ്വാസകരമാണ്.
