മുംബൈ: ഓഹരി വിപണി(Stock Market) റെഗുലേറ്ററായ സെബിയുടെ(Sebi) വിലക്ക് നേരിടുന്ന അനിൽ അംബാനിക്ക്(Anil Ambani) ആശ്വാസമായി പുതിയ കരാർ. അനിൽ അംബാനിയുടെ റിലയൻസ് പവർ(Reliance Power) ആണ് 500 മെഗാവാട്ടിന്റെ വലിയ ബാറ്ററി സംഭരണ കരാർ സ്വന്തമാക്കിയത്.
കരാർ കമ്പനിയുടെ പുനഃരുപയോഗ ഊർജ, സംഭരണ മേഖലയിലേക്കുള്ള പ്രവേശനം ശക്തിപ്പെടുത്തുന്നു.
സെബി നടപടിക്കു ശേഷം കടുത്ത സമ്മർദം നേരിടുന്ന അനിൽ അംബാനിക്കും, അദ്ദേഹത്തിന്റെ കമ്പനികൾക്കും ഊർജം പകരുന്നതാണ് പുതിയ നടപടിയെന്നു വിദഗ്ധർ പറയുന്നു.
സോളാർ എനർജി കോർപ്പറേഷൻ ഓഫ് ഇന്ത്യ (SECI) നടത്തിയ ഇ- റിവേഴ്‌സ് ലേലത്തിലൂടെയാണ് കമ്പനി കരാർ നേടിയത്. 2024 സെപ്റ്റംബർ 11 -ന് ആയിരുന്നു ലേലം നടന്നത്.
രാജ്യത്തുടനീളം ഊർജ്ജ സംഭരണ ശേഷി വർദ്ധിപ്പിക്കുന്നതിനുള്ള എസ്ഇസിഐയുടെ നീക്കത്തിന്റെ ഭാഗമാണ് നടപടി. മത്സരാധിഷ്ഠിത ബിഡ്ഡിംഗിൽ റിലയൻസ് പവർ പ്രതിമാസം 3.81999 ലക്ഷം രൂപ മെഗാവാട്ട് താരിഫ് ബിഡ് സമർപ്പിച്ചായിരുന്നു നേട്ടം കണ്ടത്.
താരിഫ് അടിസ്ഥാനമാക്കിയുള്ള മത്സരാധിഷ്ഠിത ബിഡ്ഡിംഗ് പ്രക്രിയയ്ക്ക് കീഴിൽ ‘ഓൺ ഡിമാൻഡ്’ ഉപയോഗത്തിനായി ബിൽഡ്- ഓൺ- ഓപ്പറേറ്റ് (BOO) മോഡലിലായിരുന്നു ലേലം.
മൊത്തം 1,000 മെഗാവാട്ട് സ്റ്റാൻഡ് എലോൺ BESS യൂണിറ്റുകൾ സ്ഥാപിക്കുന്നത് കരാറിൽ ഉൾപ്പെടുന്നു. വമ്പൻ ഡീൽ സ്വന്തമാക്കിയതോടെ ഇന്നലെ റിലയൻസ് പവർ ഓഹരികൾ ഒരിടവേളയ്ക്കു ശേഷം അപ്പർ സർക്യൂട്ട് നേട്ടം കൈവരിച്ചിരുന്നു.
തിങ്കളാഴ്ച കമ്പനിയുടെ വിപണി മൂല്യം 12,344 കോടി രൂപയിലെത്തി. 52 ആഴ്ചയിലെ ഓഹരിയുടെ മികച്ച ഉയരും 38.11 രൂപയാണ്. ഇക്കാലയളവിലെ മോശം പ്രകടനം 15.55 രൂപയാണ്. ഒരു വർഷത്തിനിടെ ഓഹരി നിക്ഷേപകർക്ക് 61 ശതമാനം നേട്ടം നൽകിയിട്ടുണ്ട്.
റിലയൻസ് പവർ സമർപ്പിച്ച പുതിയ താരിഫ് ബെഞ്ച്മാർക്ക്, ഇന്ത്യയിലെ നാളിതുവരെയുള്ള 400 കെവി ലെവലിലുള്ള BESS ടെൻഡറുകൾക്കുള്ള ഏറ്റവും കുറഞ്ഞ നിരക്കുകളിൽ ഒന്നാണ്.
പദ്ധതിയുടെ ഡെലിവറി പോയിന്റ് 400 കെവി ഫത്തേഗഡ് (ATL) PS, രാജസ്ഥാൻ ആയിരിക്കും.
ബാറ്ററി എനർജി സ്റ്റോറേജ് പർച്ചേസ് എഗ്രിമെന്റ് പ്രാബല്യത്തിൽ വരുന്ന തീയതി മുതൽ 24 മാസമായിരിക്കും മുഴുവൻ ശേഷിയും ഷെഡ്യൂൾ ചെയ്തു കമ്മീഷൻ ചെയ്യാനുള്ള സമയക്രമം.
