രാജ്യത്തെ വിദ്യാഭ്യാസ സമ്പ്രദായം നവീകരിക്കാൻ ഇന്ത്യയെ(India) മാതൃകയാക്കാൻ പാക്കിസ്ഥാനോട്(Pakistan) ഏഷ്യൻ ഡെവലപ്മൻ്റ് ബാങ്ക്(Asian Development Bank). ഇന്ത്യ നടപ്പാക്കുന്ന സമൂഹത്തിലെ എല്ലാവർക്കും ആജീവനാന്ത പഠനം എന്ന പദ്ധതി മാതൃകയാക്കാനാണ് ഏഷ്യൻ ഡെവലപ്മൻ്റ് ബാങ്ക് നിർദേശിച്ചത്.
ഔപചാരിക സ്‌കൂൾ വിദ്യാഭ്യാസം നഷ്‌ടപ്പെട്ട മുതിർന്നവരെയും നിരക്ഷരരെയും സഹായിക്കുന്നതിനായി ഇന്ത്യാ ഗവൺമെൻ്റ് ആരംഭിച്ച പദ്ധതിയാണിത്. മുമ്പ് വിദ്യാഭ്യാസം ലഭിക്കാതിരുന്നവർക്ക് വിദ്യാഭ്യാസം നേടാൻ യുഎൽഎസ്എസ്(ഉല്ലാസ്) എന്ന പദ്ധതി സഹായിക്കുന്നു.
അടിസ്ഥാന വിദ്യാഭ്യാസം, ഡിജിറ്റൽ സാക്ഷരത എന്നിവ സമൂഹത്തിൽ എല്ലാവർക്കും നൽകുകയാണ് പദ്ധതിയുടെ ലക്ഷ്യം. പദ്ധതിക്ക് കീഴിൽ രജിസ്റ്റർ ചെയ്തിരിക്കുന്ന സർക്കാർ, എയ്ഡഡ് സ്‌കൂളുകളിലൂടെയാണ് ഇത് നടപ്പിലാക്കുന്നത്.
ടിവി, റേഡിയോ, സെൽ ഫോൺ അധിഷ്‌ഠിത സൗജന്യ ഓപ്പൺ സോഴ്‌സ് ആപ്പുകൾ, പോർട്ടലുകൾ മുതലായവയിലൂടെ രജിസ്റ്റർ ചെയ്‌ത സന്നദ്ധപ്രവർത്തകർക്ക് എളുപ്പത്തിൽ ആക്‌സസ് ലഭിക്കും. എല്ലാ പഠനോപകരണങ്ങളും ഡിജിറ്റലായി തന്നെ ലഭിക്കും.
പ്രാദേശിക ഭാഷ
എൻസിഇആർടിയിലെ ദീക്ഷ പ്ലാറ്റ്‌ഫോം വഴി പ്രാദേശിക ഭാഷകളിൽ ഉള്ളടക്കം ലഭിക്കും.
സാക്ഷരത നേടിയാൽ സർക്കാരിൻ്റെ ഔദ്യോഗിക സർട്ടിഫിക്കറ്റ് ലഭിക്കും. പാക്കിസ്ഥാൻ്റെ വിദ്യാഭ്യാസ സംവിധാനം കാര്യക്ഷമമല്ലെന്നും ഇസ്ലാമാബാദ് ഒഴികെയുള്ള 134 ജില്ലകളും എല്ലാ സൂചകങ്ങളിലും പിന്നിലാണെന്നും എഷ്യൻ ഡെവലപ്മൻ്റ് ബാങ്ക് ചൂണ്ടിക്കാട്ടുന്നു.
വിദ്യാഭ്യാസം കുറഞ്ഞ ആളുകൾ തൊഴിലിടങ്ങളിൽ നേരിട്ട് പ്രവേശിക്കുന്നതായി അടുത്തിടെയുള്ള ഒരു റിപ്പോർട്ട് വെളിപ്പെടുത്തിയിരുന്നു. രാജ്യത്തെ പൗരന്മാർക്ക് ഗുണനിലവാരമുള്ള വിദ്യാഭ്യാല പരിശീലനം നൽകുന്നതിന് ഇന്ത്യയുടെ വിദ്യാഭ്യാസ പദ്ധതി മാതൃകയാക്കാൻ ബാങ്ക് നിർദേശിക്കുകയായിരുന്നു.
ഔപചാരിക സ്‌കൂൾ വിദ്യാഭ്യാസം നേടാത്തവരെ സഹായിക്കുന്നതിനായി 2023 ജൂലൈയിൽ ആണ് ഇന്ത്യാ ഗവൺമെൻ്റ്, സമൂഹത്തിലെ എല്ലാവർക്കുമായി ലൈഫ് ലോംഗ് ലേണിംഗ് ഓഫ് അണ്ടർസ്റ്റാൻഡിംഗ് എന്ന പദ്ധതി ആരംഭിച്ചത്. അക്ഷരാഭ്യാസമില്ലാത്തവരെ പ്രത്യേകിച്ച് മുതിർന്നവരെ സഹായിക്കുകയാണ് പദ്ധതിയുടെ ലക്ഷ്യം.
വിദ്യാഭ്യാസ സമ്പ്രദായം മെച്ചപ്പെടുത്തുന്നതിനും എല്ലാവർക്കും വിദ്യാഭ്യാസം നൽകുന്നതിനുമായി പാക്കിസ്ഥാൻ സഹായം തേടിയതിന് ഏഷ്യൻ ഡെവലപ്മൻ്റ് ബാങ്ക് നൽകിയ മറുപടിയായാണിതെന്നാണ് റിപ്പോർട്ടുകൾ.
ഇന്ത്യാ ഗവൺമെൻ്റിൻ്റെ പുതിയ കേന്ദ്രാവിഷ്‌കൃത പദ്ധതിയായ ഉല്ലാസ് പോലെയുള്ള അന്താരാഷ്ട്ര പദ്ധതികൾ പ്രയോജനപ്പെടുത്താൻ ആണ് എഡിബി നൽകിയ നിർദേശം. സെപ്തംബർ 16ന് എഡിബി പ്രസിഡൻ്റ് മസാത്സുഗു അസകാവ പാകിസ്ഥാൻ സന്ദർശിക്കുന്നതിന് മുമ്പായിരുന്നു എഡിബിയുടെ ഈ ശുപാർശ.
2023-ലെ ആസൂത്രണ കമ്മീഷൻ റിപ്പോർട്ടിലാണ് ഇസ്ലാമാബാദ് ഒഴികെയുള്ള 134 ജില്ലകളും വിദ്യാഭ്യാസത്തിന് പൊതുധനസഹായം നേടുന്നതിനുള്ള സൂചകങ്ങളിൽ പിന്നിലാണെന്ന് സൂചിപ്പിക്കുന്നത്.
രാജ്യത്ത് സ്‌കൂൾ ഇല്ലാത്ത സ്ഥലങ്ങളിലെ 2.6 കോടി കുട്ടികൾക്ക് വിദ്യാഭ്യാസം നൽകുന്നതിനായി പാകിസ്ഥാൻ കഴിഞ്ഞ ആഴ്ച വിദ്യാഭ്യാസ അടിയന്തരാവസ്ഥ പ്രഖ്യാപിച്ചിരുന്നു.
