മുംബൈ: നാഷണൽ ഹൗസിംഗ് ബാങ്കിന്റെ (എൻഎച്ച്ബി) മുൻ മേധാവി ആർ വി വർമയെ ബാങ്കിന്റെ നോൺ എക്സിക്യൂട്ടീവ് ചെയർമാനായി വീണ്ടും നിയമിച്ച് എയു സ്മോൾ ഫിനാൻസ് ബാങ്ക്. തിങ്കളാഴ്ച ചേർന്ന ബോർഡ് യോഗമാണ് ഇത് സംബന്ധിച്ച തീരുമാനമെടുത്തതെന്ന് എയു സ്മോൾ ഫിനാൻസ് ബാങ്ക് റെഗുലേറ്ററി ഫയലിംഗിൽ അറിയിച്ചു.
രാജ് വികാഷ് വർമ്മയെ 2023 ഏപ്രിൽ 8 മുതൽ 2024 ജനുവരി 29 വരെ ബാങ്കിന്റെ പാർട്ട് ടൈം ചെയർമാനായി വീണ്ടും നിയമിക്കുന്നതിന് ബോർഡ് അംഗീകാരം നൽകി. നിയമനം റിസർവ് ബാങ്ക് ഓഫ് ഇന്ത്യയുടെ (ആർബിഐ) അംഗീകാരത്തിന് വിധേയമാണ് എന്ന് ബാങ്ക് കൂട്ടിച്ചേർത്തു.
പെൻഷൻ ഫണ്ട് റെഗുലേറ്ററി ആൻഡ് ഡെവലപ്‌മെന്റ് അതോറിറ്റിയുടെ (പിഎഫ്ആർഡിഎ) മുഴുവൻ സമയ അംഗമായി സേവനമനുഷ്ഠിച്ച വർമ, 2020 ഏപ്രിൽ 8-നാണ് ബാങ്കിന്റെ പാർട്ട് ടൈം ചെയർമാനായി ചുമതലയേറ്റത്. ഇന്ത്യയിലെ ജയ്പൂർ ആസ്ഥാനമായുള്ള ഒരു ഇന്ത്യൻ സ്മോൾ ഫിനാൻസ് ബാങ്കാണ് എയു സ്മോൾ ഫിനാൻസ് ബാങ്ക്. ഇത് വായ്പകൾ നിക്ഷേപങ്ങൾ പേയ്‌മെന്റ് ഉൽപ്പന്നങ്ങൾ സേവനങ്ങൾ എന്നിവ വാഗ്ദാനം ചെയ്യുന്നു.
