മുംബൈ: വെള്ളിയാഴ്ച 4 ശതമാനം ഉയര്‍ന്ന് 14 വര്‍ഷ ഉയരമായ 468 രൂപയിലെത്തിയ ഓഹരിയാണ് ഓറിയണ്‍ പ്രോയുടേത്. വിപണി ദുര്‍ബലമാണെങ്കിലും കഴിഞ്ഞ 2 സെഷനുകളില്‍ 14 ശതമാനം ഉയരാന്‍ സ്റ്റോക്കിനായി. കമ്പ്യൂട്ടര്‍ സോഫ്റ്റ്‌വെയര്‍ സേവന ദാതാക്കളായ കമ്പനി, 2008 ജനുവരി തൊട്ട് മികച്ച പ്രകടനമാണ് കാഴ്ചവയ്ക്കുന്നത്.
കഴിഞ്ഞ 3 മാസത്തില്‍ ഓറിയണ്‍ പ്രോ ഓഹരി 83 ശതമാനമാണ് ഉയര്‍ന്നത്. ഒരു വര്‍ഷത്തില്‍ മള്‍ട്ടിബാഗര്‍ നേട്ടവും കൈവരിച്ചു. അതേസമയം ഈ കാലയളവില്‍ സെന്‍സെക്‌സ് യഥാക്രമം ആറ് ശതമാനം ഉയര്‍ച്ചയും 5 ശതമാനം താഴ്ചയുമാണ് കൈവരിച്ചത്.
ഇന്ത്യയിലെ ഏറ്റവും വലിയ പൊതുമേഖലാ ബാങ്കുകളിലൊന്നില്‍ നിന്ന് ഓര്‍ഡര്‍ നേടിയതിനെത്തുടര്‍ന്ന് കഴിഞ്ഞ രണ്ടാഴ്ചയ്ക്കിടെ സ്‌റ്റോക്ക് 20 ശതമാനം ഉയര്‍ന്നു. ഇത്തരത്തിലുള്ള നിരവധി ഓര്‍ഡറുകള്‍കൊണ്ട് സമ്പന്നമാണ് ഓഹരി. ബാങ്കുകളും സാമ്പത്തിക സ്ഥാപനങ്ങളും സാങ്കേതിക വിദ്യ സമ്പന്നമാകുന്ന കാലഘട്ടത്തില്‍ ഓഹരി മികച്ച പ്രകടനം തുടരുമെന്ന് ബിസിനസ് സ്റ്റാന്‍ഡേര്‍ഡ് റിപ്പോര്‍ട്ട് പറയുന്നു.
ബാങ്കിംഗ്, മൊബിലിറ്റി, പേയ്‌മെന്റുകള്‍, സര്‍ക്കാര്‍ ആവശ്യങ്ങള്‍ എന്നിവ നിറവേറ്റുന്ന ഒരു നൂതന സാങ്കേതിക പരിഹാര കമ്പനിയാണ് ഓറിയണ്‍പ്രോ. നിരന്തരമായ സാങ്കേതിക കണ്ടുപിടുത്തങ്ങളിലൂടെ, സ്മാര്‍ട്ട് സിറ്റി, സ്മാര്‍ട്ട് മൊബിലിറ്റി, ഡാറ്റാ സെന്റര്‍ കണ്‍സള്‍ട്ടിംഗ് തുടങ്ങിയ പുതിയ ബിസിനസ്സുകളിലേക്കും ഓറിയോണ്‍പ്രോ പ്രവേശിച്ചിട്ടുണ്ട്.
