ന്യൂഡൽഹി: ആയുഷ്മാൻ വയ വന്ദന കാർഡിനായി എൻറോൾ ചെയ്തത് ഏകദേശം 25 ലക്ഷം മുതിർന്ന പൗരന്മാരെന്ന് കേന്ദ്ര ആരോഗ്യ കുടുംബക്ഷേമ മന്ത്രാലയം. 70നും അതിന് മുകളിലും പ്രായമുള്ളവരാണ് എൻറോൾ ചെയ്തത്.
ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജന (AB-PMJAY) യുടെ ഭാഗമായി ഇക്കഴിഞ്ഞ ഒക്ടോബർ 29നാണ് ആയുഷ്മാൻ വയ വന്ദന കാർഡ് പുറത്തിറക്കിയത്. രാജ്യത്തെ 70നും അതിന് മുകളിലും പ്രായമുള്ള എല്ലാ മുതിർന്ന പൗരന്മാർക്കും സൗജന്യ ചികിത്സ ഉറപ്പാക്കുന്നതിൻ്റെ ഭാഗമായാണ് കേന്ദ്ര ആരോഗ്യ കുടുംബക്ഷേമ മന്ത്രാലയം ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജന പദ്ധതി വിപുലീകരിച്ചത്.
രാജ്യത്തെ 70നും അതിന് മുകളിലും പ്രായമുള്ള എല്ലാ മുതിർന്ന പൗരന്മാർക്കും പ്രതിവ‍ർഷം അഞ്ച് ലക്ഷം രൂപയുടെ സൗജന്യ ചികിത്സ അനുവദിക്കുന്നതാണ് ആയുഷ്മാൻ വയ വന്ദന കാർഡ്. എല്ലാ സാമൂഹ്യ – സാമ്പത്തിക വിഭാഗത്തിൽ പെടുന്നവ‍ർക്കും അനുകൂല്യത്തിനായി അപേക്ഷിക്കാം.
രാജ്യത്തെ ഏകദേശം 4.5 കോടി കുടുംബങ്ങൾക്കും ആറു കോടി മുതിർന്ന പൗരന്മാർക്കും പുതിയ തീരുമാനം ഗുണപ്രദമാകുമെന്നാണ് കേന്ദ്രത്തിൻ്റെ വിലയിരുത്തൽ. 3,437 കോടി രൂപയാണ് പദ്ധതിക്കായി സ‍ർക്കാർ വകയിരുത്തിയിരിക്കുന്നത്.
ഇതിൽ 2,165 കോടി രൂപ അടുത്ത 2025-26 സാമ്പത്തിക വർഷത്തോടെ ചെലവായേക്കാമെന്ന് കേന്ദ്രം പ്രതീക്ഷിക്കുന്നു.
പദ്ധതി പ്രഖ്യാപിച്ചു രണ്ടു മാസത്തിനകം 22,000ത്തിലധികം മുതിർന്ന പൗരന്മാർക്ക് 40 കോടിയിലധികം രൂപയുടെ ചികിത്സ നൽകാനായെന്ന് മന്ത്രാലയം അറിയിച്ചു.
കൊറോണറി ആൻജിയോപ്ലാസ്റ്റി, ഇടുപ്പ് ഒടിവ്/മാറ്റിവയ്ക്കൽ, പിത്താശയ നീക്കം, തിമിര ശസ്ത്രക്രിയ, പ്രോസ്റ്റേറ്റ് റിസെക്ഷൻ, സ്ട്രോക്ക്, ഹീമോഡയാലിസിസ്, എൻ്ററിക് ഫീവർ തുടങ്ങിയ വിവിധ ആരോഗ്യപ്രശ്നങ്ങൾക്കാണ് മുതിർന്ന പൗരന്മാർ ഇക്കാലയളവിൽ ആയുഷ്മാൻ വയ വന്ദന കാർഡ് പ്രയോജനപ്പെടുത്തിയത്.
ജനറൽ മെഡിസിൻ, ജനറൽ സർജറി തുടങ്ങിയ 27 വിഭാഗങ്ങളിലെ 2,000 മെഡിക്കൽ നടപടിക്രമങ്ങൾക്കുള്ള ചികിത്സ കാർഡ് വാഗ്ദാനം ചെയ്യുന്നുണ്ട്.
അസ്ഥി, ഹൃദയം തുടങ്ങിയവയുമായി ബന്ധപ്പെട്ട് നിലനിൽക്കുന്ന രോഗങ്ങളും കാൻസ‍റും ഉൾപ്പെടെ കാർഡിൻ്റെ പരിധിയിൽ പെടും. രാജ്യത്തെ 13,173 സ്വകാര്യ ആശുപത്രികൾ അടക്കം 29,870 ആശുപത്രികൾ പദ്ധതിക്ക് കീഴിൽ എംപാനൽ ചെയ്തിട്ടുണ്ട്.
ഈ ആശുപത്രികൾ മുഖേനയും ആയുഷ്മാൻ ആപ്പ് വഴിയും മുതിർന്ന പൗരന്മാർക്ക് ആയുഷ്മാൻ വയ വന്ദന കാർഡിനായി രജിസ്റ്റർ ചെയ്യാം.
