മുംബൈ: ഭാരത് ഫോജ് ഓഹരി ചൊവ്വാഴ്ച മികച്ച പ്രകടനം കാഴ്ചവച്ചു. 52 ആഴ്ച ഉയരമായ 902 രൂപ രേഖപ്പെടുത്തിയ ഓഹരി, 2.70 ശതമാനം ഉയര്‍ന്ന് 892.70 രൂപയിലാണ് ക്ലോസ് ചെയ്തത്. കമ്പനി ആരോഗ്യകരമായ വളര്‍ച്ച കൈവരിക്കുമെന്ന് അനലിസ്റ്റുകളുമായി നടത്തിയ കൂടിക്കാഴ്ചയില്‍ മാനേജ്‌മെന്റ് അറിയിച്ചിരുന്നു.
വിവിധ വാഹനഭാഗങ്ങള്‍ നിര്‍മ്മിക്കുന്നതില്‍ പ്രമുഖ സ്ഥാനം അലങ്കരിക്കാനൊരുങ്ങുന്ന കമ്പനി, ഇന്‍ഡസ്ട്രിയല്‍, ഇല്കട്രിക്, എയ്‌റോ സ്‌പേസ് മേഖലകളിലേയ്ക്കും പ്രവര്‍ത്തനം വ്യാപിപ്പിക്കും. ഓഹരി 1000 രൂപ ഭേദിക്കുമെന്ന് അനലിസ്റ്റുകള്‍ പറയുന്നു.
ഈവര്‍ഷം ഇതുവരെ 9 ശതമാനം ഉയര്‍ച്ച നേടാനായിട്ടുണ്ട്. പ്രഭുദാസ് ലിലാദര്‍ 1005 രൂപ ലക്ഷ്യവില നിശ്ചയിച്ച് കമ്പനി ഓഹരി വാങ്ങാന്‍ നിര്‍ദ്ദേശിച്ചു. 1050 രൂപ ലക്ഷ്യവിലയോട് കൂടിയ വാങ്ങല്‍ റേറ്റിംഗാണ് ഐസിഐസിഐ ഡയറക്ടിന്റേത്.
ഓട്ടോമൊബൈല്‍സ് (കൊമേഴ്സ്യല്‍ & പാസഞ്ചര്‍ വാഹനങ്ങള്‍), ഓയില്‍ & ഗ്യാസ്, എയ്റോസ്പേസ്, ലോക്കോമോട്ടീവുകള്‍, മറൈന്‍, എനര്‍ജി (പുനരുപയോഗിക്കാവുന്നതും അല്ലാത്തതുമായ സ്രോതസ്സുകള്‍), നിര്‍മ്മാണം, ഖനനം, എന്നിവയുള്‍പ്പെടെ നിരവധി മേഖലകള്‍ക്കായി കമ്പനി നിര്‍ണായകവും സുരക്ഷിതവുമായ ഘടകങ്ങളുടെ വിപുലമായ ശ്രേണി നിര്‍മ്മിക്കുന്നു. ജനറല്‍ എഞ്ചിനീയറിംഗ് രംഗത്തും സാന്നിധ്യമുണ്ട്.
