ന്യൂഡൽഹി: വ്യോമയാന മേഖലയിൽ നിർണായക പ്രഖ്യാപനം നടത്തി ധനമന്ത്രി നിർമല സീതാരാമൻ്റെ ബജറ്റ് പ്രസംഗം. 10 വർഷത്തിനുള്ളിൽ 120 പുതിയ വിമാനത്താവളങ്ങളെ ബന്ധിപ്പിക്കുന്ന ഉഡാൻ പദ്ധതി ധനമന്ത്രി പ്രഖ്യാപിച്ചു.
പട്ന വിമാനത്താവളത്തിന്റെ വിപുലീകരണ പദ്ധതിയോടൊപ്പം ബിഹാറിൽ പുതിയ ഗ്രീൻഫീൽഡ് വിമാനത്താവളവും ഉയരും. പുതിയ ലക്ഷ്യസ്ഥാനങ്ങളിലേക്ക് പ്രാദേശിക കണക്റ്റിവിറ്റി വർധിപ്പിക്കുന്ന പദ്ധതിയാണ് ഉഡാൻ.
ഉഡാൻ പദ്ധതി പ്രകാരം 88 ചെറിയ നഗരങ്ങളെ വിമാനത്താവളങ്ങൾ വഴി ബന്ധിപ്പിക്കുമെന്ന് ധനമന്ത്രി നിർമല സീതാരാമൻ പറഞ്ഞു. പ്രാദേശിക മേഖലകളിലേക്കുള്ള കണക്റ്റിവിറ്റി ശക്തമാക്കുന്ന പദ്ധതി ഹെലിപ്പാഡുകളെയും മലയോര മേഖലകളെയും വടക്കുകിഴക്കൻ മേഖലകളെ ചെറിയ വിമാനത്താവളങ്ങളുമായി ബന്ധിപ്പിക്കും.
വടക്കുകിഴക്കൻ മേഖലകളിലടക്കമുള്ള ഹെലിപാഡുകളും ചെറിയ വിമാനത്താവളങ്ങളും ഉഡാൻ പദ്ധതിയുടെ ഭാഗമാകും. 1.5 കോടി യാത്രക്കാർക്ക് ഉഡാൻ പദ്ധതി സഹായകരമായിട്ടുണ്ട്. 2016ൽ ആണ് ഉഡാൻ പദ്ധതി ആരംഭിച്ചത്.
ഏവിയേഷൻ രംഗത്തെ ശക്തമായ അടിത്തറയ്ക്കായി രാജ്യത്തെ വിമാനത്താവളങ്ങളിൽ അടിസ്ഥാന സൗകര്യങ്ങൾ വികസിപ്പിക്കുന്നതിൽ ശ്രദ്ധ കേന്ദ്രീകരിച്ചതായി ധനമന്ത്രി ബജറ്റ് പ്രസംഗത്തിൽ നിർമല സീതാരാമൻ പരാമർശിച്ചു.
പുതിയ വിമാനത്താവളങ്ങളും ഉഡാൻ പദ്ധതിക്ക് കീഴിലുള്ള മെച്ചപ്പെട്ട പ്രാദേശിക കണക്റ്റിവിറ്റിയും വ്യോമഗതാഗവും മെച്ചപ്പെടുത്തിയതായി നിർമല സീതാരാമൻ കഴിഞ്ഞ ദിവസം പാർലമെൻ്റിൽ സംസാരിക്കുന്നതിനിടെ വ്യക്തമാക്കിയിരുന്നു.
ഈ വർഷത്തെ കേന്ദ്ര ബജറ്റ് കൃഷി, ഗ്രാമപ്രദേശങ്ങളുടെ വളർച്ച, ഉത്പാദനം, നവീകരണം എന്നീ മേഖലകളിൽ ശ്രദ്ധ ചെലുത്തുന്നതാണ്. സാമ്പത്തിക വളർച്ച ത്വരിതപ്പെടുത്തുന്നതിനും മധ്യവർഗത്തെ ശക്തിപ്പെടുത്താനുമാണ് ഈ സർക്കാർ ലക്ഷ്യമിടുന്നതെന്ന് ധനമന്ത്രി നിർമല സീതാരാമൻ ബജറ്റ് പ്രസംഗത്തിൽ പറഞ്ഞു.
രാജ്യത്തെ വിനോദസഞ്ചാര കേന്ദ്രങ്ങളുടെ വികസനത്തിനായി പ്രവർത്തിക്കാൻ കേന്ദ്ര സർക്കാർ ലക്ഷ്യമിടുന്നുണ്ടെന്നും സംസ്ഥാനങ്ങളുമായി സഹകരിച്ച് 50 ടൂറിസം കേന്ദ്രങ്ങൾ തുറക്കുമെന്നും ബജറ്റ് പ്രസംഗത്തിൽ നിർമല സീതാരാമൻ പറഞ്ഞു.
സംസ്ഥാനത്തിന്റെ ഭാവി ആവശ്യങ്ങൾ നിറവേറ്റുന്നതിനായി ബിഹാറിൽ ഗ്രീൻഫീൽഡ് വിമാനത്താവളങ്ങൾ സൗകര്യമൊരുക്കുമെന്ന നിർണായക പ്രഖ്യാപനം നിർമല സീതാരാമൻ നടത്തി.
ബിഹ്തയിലെ പട്ന വിമാനത്താവളത്തിന്റെയും ബ്രൗൺഫീൽഡ് വിമാനത്താവളത്തിന്റെയും ശേഷി വികസിപ്പിക്കുന്നതിന് പുറമേയായിരിക്കും ഇവ. മിഥിലാഞ്ചലിലെ വെസ്റ്റേൺ കോസി കനാൽ ഇആർഎം പദ്ധതിക്ക് സാമ്പത്തിക സഹായം നൽകും.
ഇത് ബിഹാറിലെ മിഥിലാഞ്ചൽ മേഖലയിലെ ധാരാളം കർഷകർക്ക് പ്രയോജനം ചെയ്യും.
