ക്രിപ്റ്റോ കറൻസി നിയമപരമായ ടെണ്ടറായി സ്വീകരിച്ച ആദ്യ രാജ്യമായ എൽ സാൽവദോറിൽ ഇനി മുതൽ പൗരത്വം ലഭിക്കണമെങ്കിൽ 1 ദശലക്ഷം ഡോളറിന് തത്തുല്യമായ ബിറ്റ് കോയിൻ നൽകിയാൽ മതി.
2021 സെപ്റ്റംബര്‍ മുതലാണ് എൽ സാൽവദോർ ബിറ്റ് കോയിൻ ലീഗൽ ടെണ്ടറായി അംഗീകരിച്ചത്. എൽ സാൽവദോറിലെ ഭരണാധികാരി ബിറ്റ് കോയിൻ ലീഗൽ ടെണ്ടറായി അംഗീകരിച്ചത് ജനങ്ങൾക്കത്ര ഇഷ്ടപ്പെട്ടില്ലെങ്കിലും ഇതിനു ശേഷം അവിടത്തെ വിനോദ സഞ്ചാര മേഖലയിൽ വൻ കുതിച്ചുചാട്ടം ഉണ്ടായി.
ബിറ്റ് കോയിനിൽ പണം ചെലവഴിക്കാൻ വിനോദ സഞ്ചാരികൾ എൽ സാൽവഡോറിലേക്ക് ഒഴുകുകയായിരുന്നു. ഇത് കടലോര പ്രദേശങ്ങളിലെയും മറ്റ് ഉൾപ്രദേശങ്ങളിൽ പോലും ജനങ്ങളുടെ വരുമാനം കൂട്ടാൻ സഹായിച്ചു.
ഇത് മാത്രമല്ല രാജ്യാന്തര തലത്തിൽ തന്നെ എൽ സാൽവദോറിന്റെ പ്രതിച്ഛായ മെച്ചപ്പെടുത്താനും ബിറ്റ് കോയിൻ സഹായിച്ചു.
ബിറ്റ് കോയിൻ പൂർണ രൂപത്തിൽ രാജ്യത്തിലെ എല്ലാ സാമ്പത്തിക ഇടപാടുകളിലേക്കും ലയിച്ചു ചേരാൻ സമയമെടുക്കുമെങ്കിലും ജനങ്ങൾക്ക് ഇതിനോട് ഇഷ്ടം കൂടി വരുന്നു എന്ന റിപ്പോർട്ടുകളുണ്ട്.
