ന്യൂഡൽഹി: ഇലക്ട്രിക് വാഹനങ്ങൾക്ക് അതീവ പരിഗണന നൽകുന്ന കേന്ദ്ര സർക്കാർ ഭാരത് അർബൻ മെഗാബസ് മിഷൻ അവതരിപ്പിക്കാനൊരുങ്ങുന്നു. 100,000 ഇലക്ട്രിക് ബസുകൾ നിരത്തിലിറക്കുകയാണ് ലക്ഷ്യം.
1.75 ലക്ഷം കോടി രൂപയുടെ അർബൻ മൊബിലിറ്റി മിഷൻ പദ്ധതിയുടെ ഭാഗമായി 100,000 ഇലക്ട്രിക് ബസുകൾ നിരത്തിലിറക്കുന്നതിനൊപ്പം അടിസ്ഥാന മേഖലകളുടെ വികസനവും ഉൾപ്പെടും.
ഭാരത് അർബൻ മെഗാബസ് മിഷനായി 1.75 ലക്ഷം കോടി രൂപയാണ് ബജറ്റി മാറ്റിവച്ചിരിക്കുന്നത്. ബസുകൾ വാങ്ങാൻ 80,000 കോടി രൂപ ചെലവഴിക്കും. ബസ് സ്റ്റോപ്പുകൾ ഉൾപ്പെടെയുള്ള അടിസ്ഥാന സൗകര്യ വികസനത്തിന് 45,000 കോടി രൂപ നീക്കിവച്ചിട്ടുണ്ട്.
പത്തുലക്ഷത്തിലധികം ജനസംഖ്യയുള്ള നഗരങ്ങൾക്കാകും മിഷൻ്റെ ഭാഗമായി ബസുകൾ ലഭിക്കുക. ഇന്ത്യയിൽ ഏകദേശം 65 ദശലക്ഷത്തിലധികം നഗരങ്ങളുണ്ട്. എന്നാൽ ഏതൊക്കെ നഗരങ്ങൾക്ക് പുതിയതായി ഇലക്ട്രിക് ബസുകൾ ലഭ്യമാകുമെന്ന് സർക്കാർ അറിയിച്ചിട്ടില്ല.
മിഷൻ്റെ ഭാഗമായി കേരളത്തിനും നേട്ടമുണ്ടാകുമോ എന്ന ആകാംക്ഷ ശക്തമാണ്. തിരുവനന്തപുരം, കൊല്ലം, കൊച്ചി, കോഴിക്കോട്, മലപ്പുറം എന്നിവടങ്ങളിൽ ഉയർന്ന തോതിലാണ് ജനസാന്ദ്രത. മൂന്ന് ലക്ഷം ജനസംഖ്യയുള്ള നഗരങ്ങൾക്കാണ് ‘പിഎം ഇ ബസ് സേവ’ പദ്ധതിയുടെ കീഴിൽ ബസുകൾ നൽകുന്ന പദ്ധതി നിലവിലുണ്ട്.
2025ൽ തുടക്കമാകുന്ന മിഷൻ 2029 – 2030 ഓടെ പൂർത്തിയാക്കാനാണ് കേന്ദ്ര സർക്കാരിൻ്റെ ലക്ഷ്യം. ബസ് സ്റ്റോപ്പുകൾ, ടെർമിനലുകൾ, ഡിപ്പോകൾ എന്നിവയുൾപ്പെടെ അനുബന്ധ അടിസ്ഥാന സൗകര്യങ്ങൾ ഭാരത് അർബൻ മെഗാബസ് മിഷൻ്റെ ഭാഗമായി ഉയരും.
മികച്ചതും നൂതനുവുമായ പൊതുഗതാഗത സംവിധാനങ്ങൾ നൽകുന്നതിലൂടെ നിരത്തുകളിലെ വാഹനങ്ങളുടെ എണ്ണം കുറയ്ക്കാനും ഇന്ധനച്ചെലവ് കുറയ്ക്കാനും സാധിക്കുമെന്നാണ് വിലയിരുത്തൽ.
സൈക്കിൾ സവാരിക്കും ആളുകൾക്ക് കാൽനടയായി സഞ്ചരിക്കാനുമുള്ള പാതകളും മിഷൻ്റെ ഭാഗമായി നിർമിക്കും. 2030തോടെ നിരത്തിൽ 60 ശതമാനം ഇലക്ട്രിക് ബസുകൾ എത്തിക്കും. 2036 ആകുന്നതോടെ ഈ നിരക്ക് 80 ശതമാനം ഉയർത്താനുമാണ് ലക്ഷ്യം.
നഗരങ്ങളിലെ മലിനീകരണത്തിൻ്റെ തോത് കുറയ്ക്കുന്നതിനായി സൈക്കിൾ ഉപയോഗം പ്രോത്സാഹിപ്പിക്കും. ബസ് സ്റ്റോപ്പുകളും ജോലിസ്ഥലങ്ങളും തമ്മിൽ ബന്ധിപ്പിച്ച് സൈക്കിൾ സവാരി പ്രോത്സാഹിപ്പിക്കും. ഇതിനായി സൈക്ലിങ് ട്രാക്കുകൾ സജ്ജമാക്കും.
പൊതുഗതാഗതം കൂടുതൽ സ്വീകാര്യമാക്കുന്നതിനൊപ്പം നടത്തം, സൈക്ലിങ് എന്നിവയ്ക്ക് കൂടുതൽ പ്രോത്സാഹനം നൽകുകയുമാണ് മിഷൻ്റെ ലക്ഷ്യങ്ങളിലൊന്നെന്ന് പേരുവിവരങ്ങൾ വെളിപ്പെടുത്താത്ത നഗരകാര്യ മന്ത്രാലയത്തിലെ ഒരു മുതിർന്ന ഉദ്യോഗസ്ഥൻ വ്യക്തമാക്കിയതായി ഇക്കോണമിക്സ് ടൈംസ് റിപ്പോർട്ട് ചെയ്തു.
വായു മലിനീകരണം കുറയ്ക്കുക, പൊതുജനാരോഗ്യം മെച്ചപ്പെടുത്തുക, സമ്പദ്‌വ്യവസ്ഥയെ ഉത്തേജിപ്പിക്കുക എന്നിവയും മിഷൻ്റെ ലക്ഷ്യമാണ്.
