മുംബൈ: 2022 സെപ്റ്റംബർ 30ന് അവസാനിച്ച രണ്ടാം പാദത്തിൽ ക്രോംപ്ടൺ ഗ്രീവ്സ് കൺസ്യൂമർ ഇലക്‌ട്രിക്കൽസ് ലിമിറ്റഡിന്റെ ഏകീകൃത അറ്റാദായം 17.69 ശതമാനം ഇടിഞ്ഞ് 130.71 കോടി രൂപയായി കുറഞ്ഞു. 2021 ജൂലൈ-സെപ്റ്റംബർ പാദത്തിൽ കമ്പനി 158.81 കോടി രൂപ അറ്റാദായം നേടിയതായി സിജിസിഇഎൽ റെഗുലേറ്ററി ഫയലിംഗിൽ അറിയിച്ചു.
എന്നിരുന്നാലും, പ്രവർത്തനങ്ങളിൽ നിന്നുള്ള വരുമാനം 22.7 ശതമാനം വർധിച്ച് 1,699.50 കോടി രൂപയായി. പ്രതികൂലമായ അടിസ്ഥാന കാലയളവും ഉയർന്ന റീട്ടെയിൽ പണപ്പെരുപ്പവും ദുർബലമായ ഉപഭോക്തൃ ഡിമാൻഡ് സൃഷ്ടിച്ചതിനാലാണ് ലാഭം ഇടിഞ്ഞതെന്ന് കമ്പനി അതിന്റെ വരുമാന പ്രസ്താവനയിൽ പറഞ്ഞു.
അതിന്റെ മൊത്തം ചെലവ് ഒരു വർഷം മുൻപത്തെ 1,189.09 കോടി രൂപയിൽ നിന്ന് 31.57 ശതമാനം ഉയർന്ന് 1,564.54 കോടി രൂപയായി. ജൂലൈ-സെപ്റ്റംബർ പാദത്തിൽ, ഇലക്ട്രിക് കൺസ്യൂമർ ഡ്യൂറബിൾസ് വിഭാഗത്തിൽ നിന്നുള്ള സിജിസിഇഎല്ലിന്റെ വരുമാനം 3.11 ശതമാനം ഇടിഞ്ഞ് 1,062.23 കോടി രൂപയായപ്പോൾ ലൈറ്റിംഗ് ഉൽപ്പന്നങ്ങളിൽ നിന്നുള്ള വരുമാനം 269.62 കോടിയായി കുറഞ്ഞു.
കമ്പനി ഈ വർഷം ആദ്യം ഏറ്റെടുത്ത ബട്ടർഫ്ലൈയുടെ പുതിയ സബ്സിഡിയറിയിൽ നിന്നുള്ള പ്രസ്തുത പാദത്തിലെ വരുമാനം 367.65 കോടി രൂപയായിരുന്നു. വ്യാഴാഴ്ച ക്രോംപ്ടൺ ഗ്രീവ്സ് കൺസ്യൂമർ ഇലക്ട്രിക്കൽസിൻറെ ഓഹരി 1.80 % ഇടിഞ്ഞ് 371.15 രൂപയിലെത്തി.
