മുംബൈ: വെബ് 3, ബ്ലോക്ക് ചെയിൻ ടെക്നോളജി എന്നിവ വികസിപ്പിക്കുന്നതിൽ മുൻനിരയിൽ നിൽക്കുന്ന രാജ്യമാണ് ഇന്ത്യ. ഇന്ത്യയിൽ ക്രിപ്റ്റോ കറൻസികളിൽ നിന്നുള്ള വരുമാനത്തിന് 30% ആണ് നികുതി ഏർപ്പെടുത്തിയിരിക്കുന്നത്.
ക്രിപ്റ്റോ കറൻസി വ്യാപാരത്തെ കള്ളപ്പണ നിരോധന നിയമത്തിന്റെ പരിധിയിൽ സർക്കാർ ഉൾപ്പെടുത്തിയത് അടുത്തിടെയാണ്.
ഉയർന്ന നികുതി ഘടന, ക്രിപ്റ്റോ കറൻസി ട്രേഡിങ്ങിൽ ലാഭമില്ലാത്ത അവസ്ഥ ഉണ്ടാക്കുന്നതായി വിമർശനവും ഉയർന്നിരുന്നു. പലരും വിദേശത്തെ ക്രിപ്റ്റോ എക്സ്ചേഞ്ചുകളിലേക്ക് മാറുകയുമുണ്ടായി.
എന്നാൽ നിലവിലെ നിയന്ത്രണങ്ങൾ ക്രിപ്റ്റോ കറൻസി മേഖലയ്ക്ക് ഗുണകരമാണെന്ന് ജിയോട്ടസ് ക്രിപ്റ്റോ പ്ലാറ്റ്ഫോം സഹസ്ഥാപകനും, സിഇഒയുമായ വിക്രം സുബ്ബുരാജ് പറയുന്നു.
സർക്കാർ ഏർപ്പെടുത്തിയ നിയന്ത്രണങ്ങളിലൂടെ, ക്രിപ്റ്റോ സെക്ടറിലുള്ള നിക്ഷേപകരുടെ വിശ്വാസം വർധിക്കും. ക്രിപ്റ്റോ വ്യാപാരത്തിന്റെ സുതാര്യത വർധിക്കാനും സർക്കാർ നടപടികൾ സഹായകരമാകും.
കേന്ദ്ര സർക്കാർ രണ്ട് കാര്യങ്ങളിലാണ് സന്ദേശം നൽകിയിരിക്കുന്നത്; ഉത്തരവാദിത്തത്തോടെ ക്രിപ്റ്റോ കറൻസികളിൽ നിക്ഷേപം നടത്തുക, ലാഭം റിപ്പോർട്ടു ചെയ്യുക എന്നിവ മാത്രമാണ് ആവശ്യപ്പെടുന്നത്. നിക്ഷേപ ലോകത്തെ സാഹചര്യങ്ങൾ നാടകീയമായി മാറ്റിമറിക്കാൻ ക്രിപ്റ്റോ കറൻസികൾക്ക് സാധിക്കും.
ഇന്ത്യൻ സമ്പദ് വ്യവസ്ഥയിൽ ക്രിപ്റ്റോ കറൻസികൾക്ക് വലിയ സ്വാധീനമുണ്ട്. കൂടുതൽ ആളുകൾ ക്രിപ്റ്റോ കറൻസികളിൽ നിക്ഷേപം നടത്തുകയാണെങ്കിൽ വിനിമയങ്ങൾ കൂടുതൽ ലളിതമാകും.
സെറ്റിൽമെന്റുകൾ വളരെ വേഗം പൂർത്തിയാക്കാൻ സാധിക്കും. ഇക്കാരണങ്ങളാൽ ആണ് കമ്പനികൾ, വെബ് 3 അടിസ്ഥാനമാക്കിയുള്ള ക്രിപ്റ്റോ വിപണിയുടെ വളർച്ചയിലും, വികസനത്തിലും പങ്കെടുക്കാൻ കമ്പനികൾ പദ്ധതിയിടുന്നതായും അദ്ദേഹം പറഞ്ഞു.
വെബ് 3 ഇക്കോ സിസ്റ്റത്തിലേക്ക് പ്രവേശിക്കുന്നതിന്റെ ഭാഗമായി ഇ റുപ്പീ അഥവാ സെൻട്രൽ ബാങ്ക് ഡിജിറ്റൽ കറൻസി പുറത്തിറക്കാൻ കേന്ദ്ര സർക്കാർ ഒരുങ്ങുകയാണ്. ഇതു സംബന്ധിച്ച പൈലറ്റ് സ്റ്റഡി റിസർവ് ബാങ്ക് 2022 ഡിസംബറിലാണ് ആരംഭിച്ചത്.
മുംബൈ, ന്യൂ ഡൽഹി, ബംഗളൂരു, ഭുവനേശ്വർ എന്നീ നാല് നഗരങ്ങളിലെ 50,000 റീടെയിലേഴ്സുമായി ബന്ധപ്പെട്ടാണ് പഠനം നടക്കുന്നത്.
പാർട്ണർ ബാങ്കിന്റെ മൊബൈൽ ഡിജിറ്റൽ വാലറ്റുകൾ ഉപയോഗിച്ച് ഉപഭോക്താക്കൾക്ക് വിനിമയങ്ങൾ നടത്താനാണ് സൗകര്യം ഒരുങ്ങുന്നത്.
ഇതു വരെ 8 ലക്ഷം ആളുകളുമായി ബന്ധപ്പെട്ട് പരീക്ഷണങ്ങൾ നടന്നു കഴിഞ്ഞു.
