മുംബൈ: ഉന്നത വിദ്യാഭ്യാസ പരിപാടികൾ വാഗ്ദാനം ചെയ്യുന്ന എഡ്‌ടെക് സ്റ്റാർട്ടപ്പായ സൺസ്റ്റോൺ, വെസ്റ്റ്ബ്രിഡ്ജ് ക്യാപിറ്റലിന്റെ നേതൃത്വത്തിലുള്ള ഒരു ഫണ്ടിംഗ് റൗണ്ടിൽ 35 മില്യൺ ഡോളർ സമാഹരിച്ചു. ആൾട്ടീരിയ ക്യാപിറ്റലിൽ നിന്നുള്ള പങ്കാളിത്തവും ഈ ധന സമാഹരണത്തിലുണ്ടായിരുന്നു. സ്റ്റാർട്ടപ്പ് വെസ്റ്റ്ബ്രിഡ്ജ് ക്യാപിറ്റലിന്റെ നേതൃത്വത്തിൽ 28 മില്യൺ ഡോളർ സമാഹരിച്ച് ഒരു വർഷം തികയുന്നതിന് മുൻപാണ് ഈ പുതിയ ഫണ്ടിംഗ്.
ബിരുദ ടെക് പ്രോഗ്രാമുകളിൽ പ്രധാന ശ്രദ്ധ കേന്ദ്രീകരിച്ച് പുതിയ പ്രോഗ്രാമുകളിലേക്ക് പ്രവർത്തനം വ്യാപിപ്പിക്കാൻ കമ്പനി ഈ മൂലധനം ഉപയോഗിക്കും. കൂടാതെ ഈ ഫണ്ടിങ്ങോടെ സ്റ്റാർട്ടപ്പിന്റെ സമാഹരിച്ച മൊത്തം മൂലധനം ഏകദേശം 69 മില്യൺ ഡോളറായി ഉയർന്നു.
ആശിഷ് മുഞ്ജാലും പിയൂഷ് നംഗ്രുവും ചേർന്ന് സ്ഥാപിച്ച സൺസ്റ്റോണിന് കോളേജുകളുമായും സ്വകാര്യ സർവ്വകലാശാലകളുമായും പങ്കാളിത്തമുണ്ട്. ഒപ്പം ബിരുദാനന്തര ബിരുദ വിദ്യാർത്ഥികൾക്കും ബിരുദ വിദ്യാർത്ഥികൾക്കും വ്യവസായ-സജ്ജമായ പ്രോഗ്രാമുകൾ വാഗ്ദാനം ചെയ്യുന്നതിന് ഇത് കോർപ്പറേറ്റുകളുമായും ചേർന്ന് പ്രവർത്തിക്കുന്നു. 35 നഗരങ്ങളിൽ സാന്നിധ്യമുണ്ടെന്നും 40 സ്ഥാപനങ്ങളുമായി ടൈ-അപ്പുകളുണ്ടെന്നും സ്റ്റാർട്ടപ്പ് അവകാശപ്പെടുന്നു.
ബിരുദാനന്തര മാനേജ്മെന്റ് വിദ്യാഭ്യാസത്തിൽ ആരംഭിച്ച സൺസ്റ്റോൺ 2022-ൽ ആദ്യമായി ബിരുദ പ്രോഗ്രാമുകളിലേക്ക് പ്രവേശിച്ചിരുന്നു. അടുത്ത രണ്ട് വർഷത്തിനുള്ളിൽ 100 നഗരങ്ങളിലേക്ക് സാന്നിധ്യം വർധിപ്പിക്കാൻ കമ്പനി ലക്ഷ്യമിടുന്നു
