ഉയർന്ന അപകട സാധ്യതയുള്ള അദാനി ഗ്രൂപ്പിൻെറ രണ്ട് അനുബന്ധ സ്ഥാപനങ്ങളുടെ റേറ്റിങ് കുറച്ച് ക്രെഡിറ്റ് റേറ്റിങ് സ്ഥാപനമായ ഫിച്ച്. അദാനി ഗ്രൂപ്പിൻെറ പോർട്ട്, ട്രാൻസ്മിഷൻ ഓഹരികളാണ് ഉയർന്ന അപകടസാധ്യതയുള്ള രണ്ട് ഓഹരികളായി ഇപ്പോൾ ഫിച്ച് ചൂണ്ടിക്കാട്ടുന്നത്.
ഗ്രൂപ്പിൻെറ ഭരണ ദൗർബല്യമാണ് ഓഹരികളുടെ അപകട സാധ്യത ഇപ്പോൾ ഉയർത്തുന്നത്. BBB നെഗറ്റീവ് എന്ന റേറ്റിംഗ് ആണ് ഈ കമ്പനികൾക്ക് നൽകിയിരിക്കുന്നത്. നിലവിലെ പ്രതിസന്ധി ഓഹരി വിലയിൽ അനിശ്ചിതത്വം സൃഷ്ടിച്ചേക്കാം എന്ന് ഫിച്ച് ചൂണ്ടിക്കാട്ടുന്നുണ്ട്. ബുധനാഴ്ചയാണ് ഫിച്ച് റിപ്പോർട്ട് പ്രസിദ്ധീകരിച്ചത്.
അതേ സമയം ചില ഗ്രൂപ്പ് കമ്പനികൾക്ക് ഈ അപകട സാധ്യതയില്ലെന്ന് ഫിച്ച് സൂചിപ്പിക്കുന്നുണ്ട്. അദാനി ഗ്രൂപ്പിൻെറ കടത്തിൻെറ ഭൂരിഭാഗവും വിദേശത്ത് നിന്നാണെന്നും 2022 ഡിസംബർ അവസാനം വരെ സുരക്ഷിതമാണെന്നും റേറ്റിംഗ് ഏജൻസി സൂചിപ്പിക്കുന്നു.
ഗ്രൂപ്പിൻെറ യുഎസ് ഡോളർ ബോണ്ടുകളുടെ കാലാവധി അവസാനിക്കുന്നത് 2024 പകുതിയോടെ മാത്രമാണ്. എല്ലാ റേറ്റഡ് സ്ഥാപനങ്ങളുടെയും പണലഭ്യത ഉറപ്പാക്കാൻ ഇത് സഹായകരമാകും. 2023 ജനുവരി മുതൽ 2024 മാർച്ച് വരെ ഇതിൻെറ പ്രയോജനം ലഭിച്ചേക്കും എന്നാണ് സൂചന.
അദാനി ഗ്രൂപ്പിൻറെ വിപണി മൂല്യം മാർച്ച് 26 മുതൽ 28 വരെയുള്ള മൂന്ന് ദിവസത്തിനുള്ളിൽ മാത്രം 80,000 കോടി രൂപ കുറഞ്ഞിട്ടുണ്ട്. അദാനി ഓഹരികളിൽ കഴിഞ്ഞ ദിവസം കൂടുതൽ വിൽപ്പന നടന്നിരുന്നു.അദാനി ഗ്രൂപ്പിൻെറ കടം തിരിച്ചടവ് സംബന്ധിച്ച വാർത്തകളിൽ എക്സ്ചേഞ്ച് ഗ്രൂപ്പിൽ നിന്ന് വിശദീകരണം തേടിയതിനെത്തുടർന്ന് ബുധനാഴ്ച അദാനി ഓഹരികൾ ഇടിഞ്ഞിരുന്നു.
അദാനി ട്രാൻസ്മിഷൻ, അദാനി ടോട്ടൽ ഗ്യാസ്, അദാനി ഗ്രീൻ എന്നിവ ഇടിഞ്ഞാണ് ഇന്ന് വ്യാപാരം നടത്തുന്നത്. അതേസമയം അദാനി എന്റർപ്രൈസസ്, അദാനി പോർട്ട്സ് എന്നിവ തിരിച്ചുകയറി.
യുഎസ് ആസ്ഥാനമായുള്ള ഷോർട്ട് സെല്ലറായ ഹിൻഡൻബർഗ് റിസർച്ച് അദാനി ഗ്രൂപ്പ് ഓഹരികളിൽ കൃത്രിമത്വവും കമ്പനികളുടെ അക്കൗണ്ടിംഗ് തട്ടിപ്പും ആരോപിച്ചത് മുതൽ അദാനി ഗ്രൂപ്പ് ഓഹരി വില അനിശ്ചിതത്വത്തിലാണ്.
അദാനി ഗ്രൂപ്പ് ചെയർമാൻ ഗൗതം അദാനിയുടെ സഹോദരൻ വിനോദ് അദാനി മൗറീഷ്യസിൽ ഉൾപ്പെടെ ഷെൽ കമ്പനികളുടെ ശൃംഖല തന്നെ നടത്തുന്നുണ്ടെന്നും ഹിൻഡൻബർഗ് ആരോപിക്കുന്നു.
എന്നാൽ ഈ ആരോപണങ്ങൾ അദാനി ഗ്രൂപ്പ് നിഷേധിച്ചു.
