മുംബൈ: കഴിഞ്ഞ വാരം ഇന്ത്യൻ ശതകോടീശ്വരൻമാരെ സംബന്ധിച്ചു കാര്യങ്ങൾ കഠിനമായിരുന്നു. ആഗോള ഓഹരി വിപണികളുടെ തളർച്ചയും, ഇസ്രായേൽ- ഇറാൻ യുദ്ധവും ഇന്ത്യൻ ഓഹരി വിപണികളിൽ(Indian Stock Markets) കരിനിഴൽ വീഴ്ത്തി.
വിദേശ നിക്ഷേപകർ കൂടി ലാഭമെടുപ്പിന് മത്സരിച്ചതോടെ സെൻസെ്ക്‌സ് അഞ്ചു ദിവസത്തിൽ 4,243.17 പേയിന്റിലേറെ (4.94%) ഇടിഞ്ഞു. ദേശീയ ഓഹരി സൂചികയായ നിഫ്റ്റി 1,214.80 പോയിന്റ് (4.63%) വീണു. ഇക്കാലയളവിൽ നിക്ഷേപകരുടെ നഷ്ടം 16 ലക്ഷം കോടി രൂപയിൽ ഏറെയാണ്.
ഇന്ത്യൻ ശതകോടീശ്വരൻമാരും, ഓഹരി വിപണിയും തമ്മിലുള്ള ബന്ധം പ്രത്യേകം വിവരിക്കേണ്ട ആവശ്യമില്ലല്ലോ? ഓഹരി വിപണികളുടെ തകർച്ച കോടീശ്വരൻമാരുടെ ആസ്തിയിൽ വൻ വിള്ളലാണ് വീഴ്ത്തിയത്.
വെള്ളിയാഴ്ച, ഇന്ത്യയിലെ ഏറ്റവും വലിയ ധനികനും റിലയൻസ് ഇൻഡസ്ട്രീസിന്റെ(Reliance Industries) ചെയർമാനുമായ മുകേഷ് അംബാനിയുടെ(Mukesh Ambani) സമ്പത്ത് 1.62 ബില്യൺ ഡോളറാണ് (ഏകദേശം 13,612 കോടി രൂപ) ഇടിഞ്ഞത്.
റിപ്പോർട്ടുകൾ പ്രകാരം നിലവിൽ അംബാനിയുടെ ആസ്തി ഇപ്പോൾ ഏകദേശം 105 ബില്യൺ ഡോളറാണ്. അതേസമയം ആഗോള കോടീശ്വര പട്ടികയിൽ സ്ഥനചലനം ഇല്ലാതെ 14-ാം സ്ഥാനത്ത് പിടിച്ചുനിൽക്കാൻ അദ്ദേഹത്തിനു സാധിച്ചുവെന്നതു ശ്രദ്ധേയമാണ്.
ആഗോള തിരത്തലിൽ പട്ടികയിലെ മറ്റുള്ളവരും ബാധിക്കപ്പെട്ടതാണ് ഏഷ്യയിലെ ഏറ്റവും ധനികനായ വ്യക്തിക്ക് സ്ഥാനചലനം സംഭവിക്കാതിരിക്കാനുള്ള കാരണം. ഈ വർഷം അംബാനിയുടെ ആസ്തി 8.93 ബില്യൺ ഡോളർ വർധിച്ചിട്ടുണ്ടെന്നും ഇതേ റിപ്പോർട്ടുകൾ വ്യക്തമാക്കുന്നു.
അതേസമയം അദാനി ഗ്രൂപ്പ് ചെയർമാൻ ഗൗതം അദാനി 100 ബില്യൺ ഡോളർ ക്ലബ്ബിൽ നിന്ന് പുറത്തായി എന്നതാണ് മറ്റൊരു വസ്തുത. ഓഹരി വിപണി ഇടിവ് ഏറ്റവും കൂടുതൽ വിനാശം വിതച്ചത് അദാനിയുടെ ആസ്തിയിലാണ്.
വെള്ളിയാഴ്ച പ്രകാരം അദ്ദേഹത്തിന്റെ ആസ്തി 942 ദശലക്ഷം ഡോളർ കുറഞ്ഞു. നിലവിൽ അദാനിയുടെ മൊത്തം ആസ്തി 99.5 ബില്യൺ ഡോളറാണ്. ആഗോള സമ്പന്ന പട്ടികയിൽ ഇതോടെ അദ്ദേഹം 18-ാം സ്ഥാനത്തേയ്ക്ക് പിന്തുള്ളപ്പെട്ടു.
കാര്യങ്ങൾ ഇങ്ങനെ ആണെങ്കിലും ഈ വർഷം സമ്പത്ത് വർധിപ്പിച്ചതിൽ അംബാനിയെ അദാനി മറികടന്നു. ഈ വർഷം അദാനിയുടെ സമ്പത്തിലെ വർധന 15.2 ബില്യൺ ഡോളറാണ്. വാൾമാർട്ടിന്റെ സ്ഥാപകരായ വാൾട്ടൺ കുടുംബത്തിലെ മൂന്ന് അംഗങ്ങളാണ് സമ്പത്തിൽ അദാനിയെ മറികടന്നത്.
ജിം വാൾട്ടന്റെ ആസ്തി 103 ബില്യൺ ഡോളറാണ്. റോബ് വാൾട്ടണും, ആലീസ് വാൾട്ടണും 100 ബില്യൺ ഡോളർ ആസ്തിയുമായി ക്ലബിൽ കയറി.
യുഎസ് ഫെഡിന്റെ നിരക്കു കുറയ്ക്കൽ നയവും, തുടർന്നു വന്ന പണപ്പെരുപ്പ- തൊഴിൽ റിപ്പോർട്ടുകളും യുഎസ് വിപണികൾക്കു നൽകിയ ബൂസ്റ്റ് ചെറുതല്ലെന്നും റിപ്പോർട്ടുകൾ വ്യക്തമാക്കുന്നു. അമേരിക്കൻ ശതകോടീശ്വരന്മാരുടെ ഭാഗ്യം വർധിപ്പിച്ചുകൊണ്ട് യുഎസ് ഓഹരി വിപണി വെള്ളിയാഴ്ച മികച്ച പ്രകടനം കാഴ്ചവച്ചു.
ആഗോള കോടീശ്വരനായ യുഎസ് ബിസിനസ് മാഗനറ്റ് ഇലോൺ മസ്‌കിന്റെ ആസ്തി 6.73 ബില്യൺ ഡോളർ വർദ്ധിച്ചു. നിലവിൽ അദ്ദേഹത്തിന്റെ ആസ്തി 263 ബില്യൺ ഡോളറാണ്. 211 ബില്യൺ ഡോളർ സമ്പത്തുമായി മെറ്റയുടെ മാർക്ക് സക്കർബർഗ് മസ്‌കുമായുള്ള മത്സരം കടുപ്പിച്ചിട്ടുണ്ട്.
209 ബില്യൺ ഡോളർ ആസ്തിയുള്ള ആമസോണിന്റെ ജെഫ് ബെസോസ് പട്ടികയിൽ മൂന്നാം സ്ഥാനത്താണ്.
