മുംബൈ: ശതകോടീശ്വരനും അദാനി ഗ്രൂപ്പിന്റെ ചെയര്‍മാനുമായ ഗൗതം അദാനി സ്റ്റോക്ക്‌ മാര്‍ക്കറ്റ് റെഗുലേറ്ററായ സെബിയുടെ ആസ്ഥാനം സന്ദര്‍ശിച്ചു. നാലാഴ്ചയ്ക്കുള്ളില്‍ രണ്ടുതവണ സെബിയിലെത്തിയ അദാനി ചെയര്‍പേഴ്‌സണ്‍ മാധബി പുരി ബുച്ചുമായി കൂടിക്കാഴ്ച നടത്തി. എന്നാല്‍ സന്ദര്‍ശനോദ്ദേശം ഇതുവരെ വ്യക്തമായിട്ടില്ല.
ഈ വര്‍ഷം റെഗുലേറ്ററി ബോഡി മേധാവിയായി ചുമതലയേറ്റതിനു ശേഷം ബുച്ചിനെ സന്ദര്‍ശിച്ച അപൂര്‍വ്വം കോര്‍പറേറ്റ് തലവന്മാരില്‍ ഒരാളാണ് അദാനി. തുറമുഖങ്ങള്‍, ഊര്‍ജം, ഹരിത ഊര്‍ജം, സിമന്റ് എന്നീ മേഖലകളില്‍ സാന്നിധ്യമുള്ള, രാജ്യത്തെ ഏറ്റവും മികച്ച മൂന്ന് കോര്‍പ്പറേറ്റ് ഹൗസുകളിലൊന്നായ അദാനി ഗ്രൂപ്പിന് കീഴില്‍ 9 കമ്പനികളാണുള്ളത്.
ഈയിടെ അബുജ, എസിസി സിമന്റുകളെ ഏറ്റെടുത്ത ഗ്രൂപ്പ്, ലിസ്റ്റഡ് കമ്പനിയും വാര്‍ത്താ ചാനലുമായ എന്‍ഡിടിവിയെ തങ്ങളുടെ സാമ്രാജ്യത്തില്‍ ചേര്‍ക്കാനുള്ള ഒരുക്കത്തിലാണ്.
