മുംബൈ: ഇന്ത്യയുടെ ഇന്ധന ഡിമാൻഡ് അടുത്ത ഡിസംബർ പാദത്തിൽ ഏകദേശം 4% വരെ ഉയരുമെന്ന് റേറ്റിങ് ഏജൻസിയായ എസ്&പി ഗ്ലോബലിന്റെ വിലയിരുത്തൽ. ഉത്സവ സീസൺ ഡിമാൻഡും, റാബി വിളവെടുപ്പുമാണ് കാരണങ്ങളായി പറയുന്നത്.
സെപ്തംബറിൽ മൺസൂൺ രാജ്യത്തെ ഇന്ധന ഉപഭോഗത്തെ ബാധിച്ചിരുന്നു. അടുത്ത ഡിസംബർ പാദത്തിൽ ഇന്ത്യയിലെ ഗ്യാസൊലിൻ, ഡീസൽ എന്നിവയുടെ വാർഷികാടിസ്ഥാനത്തിലുള്ള ഡിമാൻഡ് പ്രതിദിനം 50.000-55,000 ബാരലുകൾ എന്ന തോതിൽ വർധിക്കുമെന്നാണ് എസ്&പി ഗ്ലോബൽ പ്രവചിക്കുന്നത്. അതേ സമയം വടക്കു കിഴക്കൻ മൺസൂണിന്റെ സ്വാധീനം ഡിമാൻഡിനെ ബാധിക്കാനിടയുണ്ടെന്നും പറയുന്നു.
അതേ സമയം എണ്ണക്കമ്പനികളുടെ ലാഭം 2024-25 സാമ്പത്തിക വർഷത്തിൽ കുറയാൻ സാധ്യതയുണ്ടെന്ന് മറ്റൊരു റേറ്റിങ് ഏജൻസിയായ ക്രിസിൽ വിലയിരുത്തുന്നു. ആഗോള തലത്തിൽ ക്രൂഡ് ഓയിൽ വിലയിലുണ്ടായ ഇടിവാണ് കാരണമായി ചൂണ്ടിക്കാട്ടുന്നത്.
നിലവിൽ പ്രതീക്ഷിച്ചതിലുമധികം മൺസൂൺ ലഭിച്ചത് രാജ്യത്തെ ട്രാൻസ്പോർട്ടേഷനിൽ കുറവുണ്ടാകാൻ കാരണമായി.
കൂടാതെ ഖനന പ്രവർത്തനങ്ങൾ കുറഞ്ഞതും ഇന്ധന ഡിമാൻഡ് താഴ്ത്തിയ ഘടകങ്ങളാണ്.സെപ്തംബറിൽ ഇന്ത്യയിലെ ഡീസൽ ഡിമാൻഡ്, തൊട്ടു മുമ്പത്തെ വർഷത്തെ സമാന പാദവുമായി താരതമ്യം ചെയ്യുമ്പോൾ 2% ഇടിഞ്ഞതായി എസ് & പി ചൂണ്ടിക്കാട്ടുന്നു.
അതേ സമയം സമാന കാലയളവിൽ ഗ്യാസൊലിൻ ഡിമാൻഡിൽ 3% വർധനയുണ്ടായിട്ടുണ്ടെന്നും റിപ്പോർട്ടിൽ പറയുന്നു.
അതേ സമയം, രാജ്യത്ത് ഉത്സവ സീസൺ ആരംഭിച്ചതിനാൽ ഇനി ഇന്ധന ഡിമാൻഡ് ഉയരാനിടയുണ്ടെന്നാണ് പൊതുവെയുള്ള വിലയിരുത്തൽ.
ആളുകൾ കൂടുതൽ യാത്ര ചെയ്യുന്നതും, പുതിയ വാഹനങ്ങൾ വാങ്ങുന്നതുമെല്ലാം ഇന്ധനം കൂടുതലായി ഉപയോഗിക്കപ്പെടാൻ കാരണമാകും. ഇന്ത്യയിൽ നവംബർ മുതൽ ജനുവരി വരെയുള്ള വിവാഹ സീസണിലും കൂടുതൽ വാഹന വില്പന നടക്കാറുണ്ട്.
ചരക്കുകളും, സാധനങ്ങളുടെയും നീക്കം കൂടുതലായി നടക്കുന്നത് ഡിമാൻഡ് വർധിപ്പിക്കുന്ന മറ്റൊരു ഘടകമാണ്. മഹാരാഷ്ട്ര, ജാർഖണ്ഡ് എന്നീ സംസ്ഥാനങ്ങളിലെ നടക്കാനിരിക്കുന്ന തെരഞ്ഞെടുപ്പുകളും ഇന്ധനത്തിന്റെ ആവശ്യകത വർധിപ്പിക്കുമെന്നും എസ് & പി റിപ്പോർട്ടിൽ പറയുന്നു.
ഇന്ത്യയുടെ ആകെ ക്രൂഡ് ഓയിൽ ബില്ലിന്റെ 80 ശതമാനത്തിലധികം ഇറക്കുമതിക്കാണ് നൽകുന്നത്.
