കൊച്ചി: സംസ്ഥാനത്ത് സ്വര്‍ണ്ണവില ഇടിഞ്ഞു. പവന് 560 രൂപ കുറഞ്ഞ് 59,080 രൂപയിലും, ഗ്രാമിന് 70 രൂപ താഴ്ന്ന് 7,385 രൂപയിലുമാണ് ഇന്നു വ്യാപാരം നടക്കുന്നത്. ദീപാവലി ദിനമായ ഇന്നലെ ഗ്രാമിന് 7,455 രൂപയും, പവന് 59,640 രൂപയുമായിരുന്നു നിരക്ക്.
ഒക്‌ടോബറിലെ ഏറ്റവും മികച്ച നിലവാരമായിരുന്നു ഇത്. കഴിഞ്ഞ മാസം 10 ന് രേഖപ്പെടുത്തിയ 56,200 രൂപയാണ് ആ മാസത്തെ ഏറ്റവും താഴ്ന്ന നിലവാരം. അതേസമയം ആഗോള വിപണിയില്‍ സ്വര്‍ണ്ണവില വീണ്ടും ഉയര്‍ന്നു.
യുഎസ് പ്രസിഡന്റ് തെരഞ്ഞെടുപ്പ് അടുത്തതും, ഓഹരി വിപണികളില്‍ തുടരുന്ന അനശ്ചിതത്വവുമാണ് ആഗോള സ്വര്‍ണ്ണവില വര്‍ധിക്കാനുള്ള കാരണം. 24 മണിക്കൂറിനിടെ ആഗോള സ്വര്‍ണ്ണവിലയില്‍ 0.32% (8.87 ഡോളര്‍) വര്‍ധന രേഖപ്പെടുത്തി.
നിലവില്‍ സ്വര്‍ണ്ണം ഔണ്‍സിന് 2,751.24 ഡോളറാണ്. 30 ദിവസത്തിനിടെ ആഗോള സ്വര്‍ണ്ണവിലയില്‍ 3.27% (86.72 ഡോളര്‍) വില കൂടി. ആറു മാസത്തെ വര്‍ധന 19.04% (438.59 ഡോളര്‍) ആണ്.
ആഗോള വിപണികളിലെ വില മാറ്റങ്ങള്‍ ഡോളറില്‍ ആയതിനാല്‍ തന്നെ നേരിയ ചലനങ്ങള്‍ പോലും പ്രാദേശിക വിലയെ സ്വാധീനിക്കും. ഡോളര്‍- രൂപ വിനിമയ നിരക്കും ഇവിടെ പ്രധാനമാണ്.
ആഗോള വിപണികളില്‍ പണപ്പെരുപ്പ ആശങ്ക വര്‍ധിക്കുന്നതും, യുദ്ധങ്ങളും യുഎസ് ഫെഡിനെ പ്രഖ്യാപിത നിരക്കു കുറയ്ക്കല്‍ വൈകിപ്പിക്കാന്‍ പ്രേരിപ്പിച്ചേക്കുമെന്നാണ് സൂചന. ഇതു ഡോളറിനെ കൂടുതല്‍ ശക്തനാക്കുന്നു.
നിലവിലെ സാഹചര്യത്തില്‍ പ്രാദേശിക വിപണികളില്‍ ഉത്സവ ചൂട് കുറയുന്നു. നിലവിലെ വിലയിറക്കം ഇതിന്റെ സൂചനയായി കാണുന്നവരുമുണ്ട്. അടുത്തകാലത്ത് സ്വര്‍ണ്ണവില വലിയ കയറ്റം കണ്ടിട്ടുണ്ട്. അതിനാല്‍ ഒരു തിരുത്തല്‍ അനിവാര്യമായേക്കാം. എന്നാല്‍ ആഗോള വിപണികള്‍ കലുഷിതമായി തുടരുന്നത് വില വര്‍ധിക്കാനുള്ള സാധ്യതയും നിലനിര്‍ത്തുന്നുണ്ട്.
ആഭരണ പ്രേമികള്‍ ഇറക്കങ്ങളില്‍ ബുക്കിംഗുകള്‍ നടത്തുന്നത് നല്ലതാണ്. ബുക്കിംഗുകള്‍ വഴി ഭാവി വിലക്കയറ്റങ്ങളെ പ്രതിരോധിക്കാന്‍ സാധിക്കും. ബുക്കിംഗ് നിരക്കിലോ, വിപണി നിരക്കിലോ സ്വര്‍ണ്ണം ലഭിക്കുമെന്നതാണ് ഇവിടെ പ്രധാനം.
നിക്ഷേപകര്‍ ഇറക്കങ്ങളില്‍ അവസരം വര്‍ധിപ്പിക്കുക. ആവറേജിംഗിനുള്ള തുക കൈയ്യില്‍ കരുതി വേണം പുതിയ നിക്ഷേപങ്ങള്‍. സ്വര്‍ണ്ണത്തിന്റെ ദീര്‍ഘകാല ഭാവിയില്‍ വിദഗ്ധര്‍ ഇപ്പോഴും ശുഭാപ്തി വിശ്വാസം പ്രകടിപ്പിക്കുന്നു.
സംസ്ഥാനത്തി നിലവില്‍ വെള്ളി ഗ്രാമിന് 108.90 രൂപയാണ്. സ്വര്‍ണ്ണവില ഇടിഞ്ഞ സാഹചര്യത്തില്‍ വരും മണിക്കൂറുകളില്‍ വെള്ളി വിലയും കുറഞ്ഞേക്കാം. 8 ഗ്രാം വെള്ളിക്ക് 871.20 രൂപയും, 10 ഗ്രാം വെള്ളിക്ക് 1,089 രൂപയുമാണ്.
വെള്ളി കിലോയ്ക്ക് 1,08,900 രൂപയാണ്. സ്വര്‍ണ്ണവിലയിലെ കയറ്റം വെള്ളിയുടെ ഡിമാന്‍ഡ് വര്‍ധിപ്പിച്ചിട്ടുണ്ട്. ദീര്‍ഘകാല നിക്ഷേപകര്‍ക്ക് സ്വര്‍ണ്ണത്തേക്കാള്‍ നേട്ടം വെള്ളി നല്‍കുന്നുവെന്നും റിപ്പോര്‍ട്ടുകള്‍ വ്യക്തമാക്കുന്നു.
