ഒടുവില്‍ ഡിജിറ്റല്‍ കറന്‍സി ലോകത്തെ രാജാവ് എന്നു വാഴ്ത്തപ്പെടുന്ന ബിറ്റ്കോയിന് പിന്നിലെ തല പുറത്ത്. ലോകം മുഴുവന്‍ ഉറ്റുനോക്കുന്ന ബിറ്റ്കോയിന് എന്ന ക്രിപ്‌റ്റോ കറന്‍സിയുടെ സൃഷ്ടാവ് കനേഡിയന്‍ സോഫ്റ്റ്വെയര്‍ എന്‍ജിനീയര്‍ പീറ്റര്‍ ടോഡ് ആണെന്ന് എച്ച്ബിഒ ഡോക്യൂമെന്ററിയായ മണി ഇലക്ട്രിക്.
നാളിന്നു വരെ സതോഷി നകാമോട്ടോ എന്ന പേരില്‍ അറിയപ്പെട്ടിരുന്ന വ്യക്തി പീറ്റര്‍ ആണെന്നാണ് ഡോക്യൂമെന്ററി സമര്‍ത്ഥിക്കാന്‍ ശ്രമിക്കുന്നത്. ഈ അവകാശവാദം ഇതോടകം കാര്യമായ വിവാദം സൃഷ്ടിച്ചിട്ടുണ്ട്.
അതേസമയം എച്ച്ബിഒ ഡോക്യുമെന്ററിയുടെ അവകാശവാദങ്ങള്‍ ഇതോടകം ടോഡ് തന്നെ തള്ളിയിട്ടുണ്ട്. ഡോക്യുമെന്ററിയുടെ നിഗമനങ്ങളെ ‘പരിഹാസ്യമായത്’ എന്നും, സാഹചര്യത്തെളിവുകള്‍ അടിസ്ഥാനമാക്കി താന്‍ സതോഷി അല്ല എന്നും ടോഡ് സോഷ്യല്‍ മീഡിയകളില്‍ സമര്‍ത്ഥിക്കുന്നു.
ക്രിപ്‌റ്റോ കറന്‍സികളില്‍ ഏറ്റവും മൂല്യമുള്ള ടോക്കണ്‍ ആണ് ബിറ്റ്കോയിന്. ഡിജിറ്റല്‍ കോയിന്‍ എന്ന ആശയത്തിന്റെ തുടക്കം തന്നെ ബിറ്റ്‌കോയിനില്‍ നിന്നാണെന്നു പറയുന്നതിലും തെറ്റില്ല. നാളിന്നു വരെ ബിറ്റ്കോയിന്റെ പിതാവ് എന്നു വിശേഷിപ്പിക്കപ്പെടുന്ന സതോഷി നകാമോട്ടോ എന്ന പേരിനു പിന്നിലെ മുഖം അജ്ഞാതമായിരുന്നു.
സംവിധായകനായ കലന്‍ ഹോബാക്കിന്റെ ചിത്രം ബിറ്റ്കോയിന്റെ ഉത്ഭവം പര്യവേക്ഷണം ചെയ്യുന്നതാണ്. ബിറ്റ്കോയിന്റെ വികസനത്തിലെ പ്രധാന വ്യക്തികളെ അദ്ദേഹം അഭിമുഖം ചെയ്യുന്നു. ടോഡിന്റെ 2010 -ലെ ഒരു ഫോറം പോസ്റ്റാണ് ഡോക്യുമെന്ററിയുടെ സുപ്രധാനമായ അവകാശവാദങ്ങളിലൊന്ന്.
സതോഷി ആരംഭിച്ച ഒരു ചര്‍ച്ച ഇതു തുടരുന്നു. അതേസമയം ഈ ബന്ധത്തിന് കാര്യമായ തെളിവുകളില്ലെന്നും, ഗൂഢാലോചന സിദ്ധാന്തങ്ങളുടെ സ്ഥിരീകരണ പക്ഷപാതത്തെ പ്രതിഫലിപ്പിക്കുന്നുവെന്നും വിമര്‍ശകര്‍ വാദിക്കുന്നുണ്ട്.
ബിറ്റ്കോയിന്റെ ധവളപത്രം പ്രസിദ്ധീകരിക്കുമ്പോള്‍ ടോഡിന് 23 വയസ് മാത്രമാണ് പ്രായം. അക്കാലത്ത് സ്‌കൂളിനോടും, ജോലിയോടുമുള്ള തന്റെ പ്രതിബദ്ധത ചൂണ്ടിക്കാട്ടി ക്രിപ്റ്റോകറന്‍സിയുടെ സൃഷ്ടിയില്‍ തന്റെ പരിമിതമായ പങ്കാളിത്തം മാത്രമാണ് ടോഡ് ഊന്നിപ്പറയുന്നത്.
2009 -ല്‍ ബിറ്റ്കോയിന്റെ ഉത്ഭവം മുതല്‍ തന്നെ സതോഷി നകാമോട്ടോ എന്ന് അജ്്ഞാതനെ ചുറ്റിപ്പറ്റിയുള്ള നിഗൂഢത ശ്രദ്ധ ആകര്‍ഷിച്ചിരുന്നു.
ഏകദേശം 69 ബില്യണ്‍ യുഎസ് ഡോളര്‍ മൂല്യം വരുന്ന 1.1 ദശലക്ഷം ബിറ്റ്കോയിനുകള്‍ ഈ അജ്ഞാത സൃഷ്ടാവിന് മാത്രം അറിയുന്ന ഒരു രഹസ്യ വാലറ്റില്‍ സൂക്ഷിച്ചിരിക്കുന്നുവെന്നതാണ് സത്യം.
സതോഷി എന്ന അജ്ഞാതന്‍ ഇന്നു തന്റെ ഐഡന്റിറ്റി വെളിപ്പെടുത്താത്തതിനുള്ള പ്രധാന കാരണങ്ങളില്‍ ഒന്നും ഇതായിരിക്കാം. ഐഡന്റിറ്റി സ്ഥിരീകരിച്ചാല്‍ ഇക്കാര്യങ്ങളും തുറന്നു കാട്ടേണ്ടിവരും. അതായത് ഒറ്റയടിക്ക് ആഗോള കോടീശ്വരനായി ഇദ്ദേഹം മാറും.
ഡോറിയന്‍ നകാമോട്ടോ, ക്രെയ്ഗ് റൈറ്റ് എന്നിവരും നേരത്തേ ബിറ്റ്കോയിന്റെ സൃഷ്ടാവ് എന്ന പേരില്‍ സംശയിക്കപ്പെട്ടിരുന്നു. ഒരുവേള ലോക കോടീശ്വരനായ ഇലോണ്‍ മസ്‌കിന് എതിരേയും ഈ സംശയം നീണ്ടിരുന്നു.
ഇലോണ്‍ മസ്‌കിന്റെ ക്രിപ്‌റ്റോകറന്‍സിളോടുള്ള പ്രണയമായിരുന്നു ഇതിനു കാരണം. എന്നാല്‍ ഇടയ്ക്കു വച്ചു അദ്ദേഹം തന്റെ കൈവശമുണ്ടായിരുന്നു മുഴുവന്‍ ബിറ്റ്‌കോയിനുകളും വിറ്റിരുന്നു.
നിലവില്‍ ടോഡാണ് ഏറ്റവും വലിയ സംശയ നിഴലിലുള്ളത്. അദ്ദേഹം കാര്യങ്ങള്‍ നിഷേധിച്ചെങ്കിലും ഊഹാപോഹങ്ങള്‍ നിര്‍ബാധം തുടരുന്നു. ഡോക്യുമെന്ററി സോഷ്യല്‍ മീഡിയ പ്ലാറ്റ്ഫോമുകളിലുടനീളം ചര്‍ച്ചകള്‍ക്ക് തിരികൊളുത്തിയിട്ടുണ്ട്.
കാര്യം എന്തു തന്നെയായാലും ആധുനിക ധനകാര്യത്തിലെ ഏറ്റവും കൗതുകകരമായ നിഗൂഢതകളില്‍ ഒന്നായി ഇത് അവശേഷിക്കുന്നു.
