ഏറെ നാളത്തെ ഇടവേളയ്ക്കു ശേഷം റിലയന്‍സ് ക്യാപിറ്റല്‍ വിഷയത്തില്‍ മൗനം വെടിഞ്ഞ് ഹിന്ദുജ ഗ്രൂപ്പ്. കടക്കെണിയിലായ റിലയന്‍സ് ക്യാപിറ്റലിന്റെ ഏറ്റെടുക്കല്‍ അടുത്ത മാസം, അതായത് 2025 ജനുവരിയോടെ പൂര്‍ത്തിയാക്കുമെന്ന് പ്രതീക്ഷിക്കുന്നു.
ഹിന്ദുജ ഗ്രൂപ്പിന്റെ ഉപ സ്ഥാപനമായ IndusInd International Holdings Ltd (IIHL) ആയിരുന്നു അനില്‍ അംബാനിയുടെ റിലയന്‍സ് ക്യാപിറ്റലിനായുള്ള ലേലപ്രക്രിയയില്‍ വിജയിച്ചത്.
ഏറ്റെടുക്കലിന് ശേഷം കമ്പനിയുടെ ബാങ്കിംഗ്, സാമ്പത്തിക സേവനങ്ങള്‍, ഇന്‍ഷുറന്‍സ് (BFSI) ബിസിനസ് വര്‍ദ്ധിപ്പിക്കാന്‍ ഹിന്ദുജ ലക്ഷ്യമിടുന്നുവെന്നാണ് വിവരം. അടുത്ത അഞ്ച് വര്‍ഷത്തിനുള്ളില്‍ ബിസിനസ് മൂന്ന് മടങ്ങ് വര്‍ധിപ്പിച്ച് 50 ബില്യണ്‍ ഡോളറിലെത്തിക്കാനാണ് കമ്പനി ലക്ഷ്യം വയ്ക്കുന്നത്.
റിലയന്‍സ് ക്യാപിറ്റലിന്റെ റെസല്യൂഷന്‍ പ്രക്രിയയുമായി ബന്ധപ്പെട്ട മിക്ക അംഗീകാരങ്ങളും, നടപടിക്രമങ്ങളും പൂര്‍ത്തിയായെന്നാണു റിപ്പോര്‍ട്ടുകള്‍ വ്യക്തമാക്കുന്നത്.
അഡ്മിനിസ്‌ട്രേറ്ററുടെയും, സിഒസിയുടെയും അവസാനത്തെ ഘട്ട നടപടിക്രമങ്ങളും ഉടന്‍ പൂര്‍ത്തിയാകും. കാര്യങ്ങള്‍ പ്രതീക്ഷിച്ച നിലയില്‍ മുന്നോട്ടു നീങ്ങിയാല്‍ അടുത്ത 4- 6 ആഴ്ചകള്‍ക്കുള്ളില്‍ ഏറ്റെടുക്കല്‍ നടപടി പൂര്‍ണമായും അവസാനിക്കുമെന്നു പ്രതീക്ഷിക്കുന്നുവെന്നും, ജനുവരി അവസാനത്തോടെ റിലയന്‍സ് ക്യാപിറ്റല്‍ ഹിന്ദുജ ഗ്രൂപ്പിന്റെ പരിധിയില്‍ വരുമെന്നും ഐഐഎച്ച്എല്‍ ചെയര്‍മാന്‍ അശോക് പി ഹിന്ദുജ പറഞ്ഞു.
റിലയന്‍സ് ക്യാപിറ്റല്‍ ഏറ്റെടുക്കലോടെ ഐഐഎച്ച്എല്‍ 2030 ഓടെ 50 ബില്യണ്‍ ഡോളര്‍ ലക്ഷ്യമിടുന്നതായും അദ്ദേഹം തന്നെയാണ് പറഞ്ഞത്. 2024 സെപ്റ്റംബര്‍ 30 വരെ ഐഐഎച്ച്എല്ലിന്റെ മൂല്യം 15 ബില്യണ്‍ ഡോളറാണ്.
റിലയന്‍സ് ക്യാപിറ്റല്‍ ഓഹരികളുടെ ഡീലിസ്റ്റിംഗ് പൂര്‍ത്തിയായ ഉടനെ വായ്പക്കാര്‍ക്ക് പണം കൈമാറുമെറ്റും അദ്ദേഹം വ്യക്തമാക്കി. ഡീലിസ്റ്റിംഗിന് സാധാരണയായി 4- 6 ആഴ്ച എടുക്കുമെന്ന് അദ്ദേഹം പറഞ്ഞു.
ഒഴിവാക്കിയ ആസ്തികള്‍ കൈമാറ്റം ചെയ്യുന്നതിനായി ഒരു ട്രസ്റ്റ് രൂപീകരിക്കല്‍, മൂലധനം കുറയ്ക്കല്‍, ആര്‍സിഎപിയുടെ ആസ്തികളിലെ എല്ലാ ചാര്‍ജുകളും ഒഴിവാക്കല്‍ തുടങ്ങിയവ നടപടികള്‍ പൂര്‍ത്തിയാകേണ്ടതുണ്ട്.
മൊത്തം തുകയില്‍ 2,750 കോടി ഇക്വിറ്റി ഭാഗമാണ്. ബാക്കിയുള്ളത് കടങ്ങളും മറ്റുമാണ്. മൗറീഷ്യസ് ആസ്ഥാനമായി പ്രവര്‍ത്തിക്കുന്ന ഐഐഎച്ച്എല്‍ 9,650 കോടി രൂപയ്ക്കാണ് റിലയന്‍സ് ക്യാപിറ്റലിനായുള്ള ലേലം വിജയിച്ചത്. തുടര്‍ന്ന് കമ്പനിക്കു മേലുള്ള ഇന്‍സോള്‍വന്‍സി ചാര്‍ജുകള്‍ ഒഴിവാക്കുന്നതിനു ലേല തുകയ്ക്ക് പുറമേ 200 കോടി ചെലവഴിച്ചിരുന്നു.
ആര്‍ബിഐയില്‍ കോര്‍ ഇന്‍വെസ്റ്റ്മെന്റ് കമ്പനിയായി രജിസ്റ്റര്‍ ചെയ്തിട്ടുള്ള സ്ഥാപനമാണ് റിലയന്‍സ് ക്യാപിറ്റല്‍. ഒരിക്കല്‍ അനില്‍ അംബാനിയുടെ പണം കായ്ക്കുന്ന മരമായിരുന്നു ഇത്.
റിലയന്‍സ് നിപ്പോണ്‍ ലൈഫ് ഇന്‍ഷുറന്‍സ്, റിലയന്‍സ് ജനറല്‍ ഇന്‍ഷുറന്‍സ്, റിലയന്‍സ് മണി, റിലയന്‍സ് സെക്യൂരിറ്റീസ്, റിലയന്‍സ് അസറ്റ് റീകണ്‍സ്ട്രക്ഷന്‍, റിലയന്‍സ് കൊമേഴ്സ്യല്‍ ഫിനാന്‍സ് എന്നിങ്ങനെ നിരവധി സ്ഥാപനങ്ങള്‍ റിലയന്‍സ് ക്യാപിറ്റലില്‍ ഉള്‍പ്പെടുന്നു.
2024 ഫെബ്രുവരി 27 നാണ് മുംബൈ നാഷണല്‍ കമ്പനി ലോ ട്രിബ്യൂണല്‍ ഐഐഎച്ച്എല്ലിന്റെ റിലയന്‍സ് ക്യാപിറ്റലിനായുള്ള റെസല്യൂഷന്‍ പ്ലാന്‍ അംഗീകരിച്ചത്. ഇതിനു ശേഷം നടപടികള്‍ പൂര്‍ത്തിയാക്കാനുള്ള സമയപരിധി നിരവധി തവണ നീട്ടി നല്‍കി. നിലവില്‍ ഇത് 2025 ജനുവരി 31 വരെ ആണ്.
