മുംബൈ: മാസങ്ങൾ നീണ്ട ആശങ്കകൾക്കൊടുവിൽ കടക്കെണിയിൽപ്പെട്ട അനിൽ അംബാനിയുടെ(Anil Ambani) റിലയൻസ് ക്യാപിറ്റലിനായി(Reliance Capital) ആദ്യ ഗഡു അടച്ച് ഹിന്ദുജ ഗ്രൂപ്പ്(Hinduja Group). ഇതോടെ റെസല്യൂഷൻ പ്ലാൻ പൂർത്തിയാകുമെന്ന് ഉറപ്പായി.
ഹിന്ദുജ ഗ്രൂപ്പ് സ്ഥാപനമായ ഇൻഡസിൻഡ് ഇന്റർനാഷണൽ ഹോൾഡിംഗ്സ് (IIHL) 9,650 കോടി രൂപയ്ക്കാണ് റിലയൻസ് ക്യാപിറ്റലിനെ സ്വന്തമാക്കിയിരിക്കുന്നത്.
മുമ്പ് ഇടപാട് പൂർത്തീകരിക്കാൻ നാഷണൽ കമ്പനി ലോ ട്രിബ്യൂണൽ (NCLT) നൽകിയ കാലവധി ഐഐഎച്ച്എല്ലിന് പാലിക്കാൻ സാധിച്ചിരുന്നില്ല. തുടർന്ന് അവർ കൂടുതൽ സമയം ആവശ്യപ്പെടുകയായിരുന്നു.
കമ്പനിയുടെ വാദങ്ങൾ പരിഗണിച്ച ട്രിബ്യൂണൽ സമയപരിധി നീട്ടി നൽകുകയും, ഇടപാടിന്റെ ഭാഗമായി ആദ്യ ഗഡു ഉടൻ അടയ്ക്കാൻ നിർദേശിക്കുകയുമായിരുന്നു. ആദ്യ ഗഡു അടച്ചതോടെ ഇനി കമ്പനി പിൻമാറില്ലെന്ന് ഉറപ്പാണ്. കാരണം ഇനി പിൻമാറിയാൽ ഈ തുക കമ്പനിക്കു നഷ്ടമാകും.
റിലയൻസ് ക്യാപിറ്റലിന്റെ റെസല്യൂഷൻ പ്ലാൻ ഐഐഎച്ച്എൽ നടപ്പിലാക്കുന്നതിനുള്ള അനുമതി നടപടികൾ വേഗത്തിലാക്കാൻ എൻസിഎൽടി ആർബിഐക്കും, വ്യവസായ നയ പ്രോത്സാഹന വകുപ്പിനും (ഡിഐപിപി) നിർദേശം നൽകിയിട്ടുണ്ട്.
ഐഐഎച്ച്എല്ലും കമ്മിറ്റി ഓഫ് ക്രെഡിറ്റേഴ്സും (സിഒസി) സംയുക്തമായി യോഗം ചേർന്ന് നടപടികൾ പൂർത്തിയാക്കുന്നതിനു സ്വീകരിക്കേണ്ട നടപടികൾ തീരുമാനിക്കാനും എൻസിഎൽടി മുംബൈ ബെഞ്ച് നിർദ്ദേശിച്ചിട്ടുണ്ട്.
റെസല്യൂഷൻ പ്ലാനിന്റെ ഭാഗമായി നിർദേശിച്ചിരിക്കുന്ന ബാധ്യതകൾ പൂർത്തിയാക്കാനുള്ള സമയപരിധി നീട്ടണമെന്നും, ജൂലായ് 23ലെ ഉത്തരവിൽ മാറ്റം വരുത്തണമെന്നും ആവശ്യപ്പെട്ട് ഹിന്ദുജ ഗ്രൂപ്പ് സമർപ്പിച്ച ഹർജി പരിഗണിക്കുകയായിരുന്നു ട്രിബ്യൂണൽ.
2024 മെയ് 27നകം ഇടപാടുകൾ പൂർത്തിയാക്കാനായിരുന്നു നേരത്തേ ബെഞ്ച് ഹിന്ദുജയ്ക്ക് നൽകിയിരുന്ന നിർദേശം. എന്നാൽ ഇടപാടിനായി വായ്പ കണ്ടെത്താൻ കമ്പനിക്കു സാധിച്ചിരുന്നില്ല.
തുടർന്ന് ജൂലൈ 23 ചേർന്ന എൻസിഎൽടി ബോർഡ് ഓഗസ്റ്റ് 10 വരെ സമയം നീട്ടി നൽകുകയായിരുന്നു. തീർപ്പുകൽപ്പിക്കാത്ത റെഗുലേറ്ററി അംഗീകാരങ്ങളും, പാലിക്കൽ ആവശ്യകതകളുമാണ് ഇടപാട് വൈകാനുള്ള പ്രധാന കാരണമെന്നു ഹിന്ദുജ വാദിച്ചു.
ഈ വിഷയത്തിൽ വാദം കേൾക്കാൻ ട്രിബ്യൂണൽ ഓഗസ്റ്റ് 28ന് അടുത്ത തീയതി അനുവദിച്ചിട്ടുണ്ട്.
2024 ഫെബ്രുവരി 27-നാണ് റിലയൻസ് ക്യാപിറ്റലിനായുള്ള ഐഐഎച്ച്എല്ലിന്റെ 9,650 കോടി രൂപയുടെ റെസല്യൂഷൻ പ്ലാൻ എൻസിഎൽടി അംഗീകരിച്ചത്.
കമ്പനിയുടെ ഭരണ പ്രശ്നങ്ങളും, പേയ്മെന്റ് ഡിഫോൾട്ടുകളും കണക്കിലെടുത്ത് 2021 നവംബറിലാണ് അനിൽ ധീരുഭായ് അംബാനി ഗ്രൂപ്പിന്റെ ഭാഗമായ റിലയൻസ് ക്യാപിറ്റലിന്റെ ബോർഡിനെ ആർബിഐ അസാധുവാക്കിയത്. റിലയൻസ് ക്യാപിറ്റലിന് 40,000 കോടിയിലധികം കടമുണ്ടായിരുന്നു.
ഇപ്പോഴും റിലയൻസ് ക്യാപിറ്റലിൽ പണം കുടുങ്ങി കിടക്കുന്ന നിരവധി നിക്ഷേപകരുണ്ട്. ഹിന്ദുജ ഏറ്റെടുക്കുന്നതോടെ തങ്ങളുടെ പണത്തിന്റെ കാര്യത്തിൽ ഒരു തീരുമാനമാകുമെന്നു വിശ്വസിക്കുന്നവർ ആണ് ഏറെയും. പക്ഷെ ഇക്കാര്യത്തിൽ ഇനിയും വ്യക്തത വരേണ്ടതുണ്ട്.
തിരിച്ചുവരവിന് ശ്രമിക്കുന്ന അനിൽ അംബനിയെ സംബന്ധിച്ച് റിലയൻസ് ക്യാപിറ്റലിന്റെ കൊഴിഞ്ഞ്‌പോക്ക് ആശ്വാസമാണ്.
