ചെന്നൈ: കമ്പനിയുടെ അനുബന്ധ സ്ഥാപനമായ സിഎപിഎൽ മോട്ടോർ പാർട്‌സ് പ്രൈവറ്റ് ലിമിറ്റഡിന്റെ മുഴുവൻ ഓഹരിയും ഏറ്റെടുക്കാൻ ഒരുങ്ങി ചെന്നൈ ആസ്ഥാനമായുള്ള ഇന്ത്യ മോട്ടോർ പാർട്‌സ് ആൻഡ് ആക്‌സസറീസ് ലിമിറ്റഡ് (IMPAL). സിഎപിഎൽ മോട്ടോർസിൽ നിലവിൽ 90 ശതമാനം ഓഹരിയാണ് ഐഎംപിഎഎല്ലിനുള്ളത്.
ഓട്ടോമൊബൈൽ പാർട്‌സുകളുടെയും അനുബന്ധ ഉപകരണങ്ങളുടെയും വിതരണത്തിൽ ഏർപ്പെട്ടിരിക്കുന്ന കമ്പനിയാണ് ഐഎംപിഎഎൽ. സിഎപിഎൽ മോട്ടോറിന്റെ ഓഹരി മൂലധത്തിന്റെ 10 ശതമാനം വരുന്ന ശേഷിക്കുന്ന 5,00,000 ഇക്വിറ്റി ഷെയറുകൾ ഏറ്റെടുക്കുന്നതിന് ഇന്ത്യ മോട്ടോർ പാർട്‌സ് ആൻഡ് ആക്‌സസറീസിന് ബോർഡിന്റെ അനുമതി ലഭിച്ചു.
പ്രസ്തുത ഓഹരി ഏറ്റെടുക്കൽ പൂർത്തിയാകുമ്പോൾ, അഹമ്മദാബാദ് ആസ്ഥാനമായി പ്രവർത്തിക്കുന്ന ഓട്ടോ പാർട്‌സിന്റെ വിൽപ്പനയിലും വിതരണത്തിലും ഏർപ്പെട്ടിരിക്കുന്ന സിഎപിഎൽ ഐഎംപിഎഎല്ലിന്റെ പൂർണ്ണ ഉടമസ്ഥതയിലുള്ള ഒരു ഉപസ്ഥാപനമായി മാറും.
