ഇന്ത്യ കാനഡ നയതന്ത്രബന്ധം വഷളാകുന്നത് കനേഡിയൻ ഫണ്ടുകളെയോ വ്യാപാര രംഗത്തെയോ ബാധിക്കുമോ എന്ന ആശങ്കയുണ്ട്. എന്നാൽ കാര്യമായ പ്രത്യാഘാതങ്ങൾ ഉണ്ടാക്കിയേക്കില്ല.
കനേഡിയൻ ഫണ്ടുകൾ ഇന്ത്യയിൽ രണ്ടു ലക്ഷം കോടി രൂപയിലധികം നിക്ഷേപിച്ചിട്ടുണ്ട്. നിക്ഷേപം പിൻവലിക്കുന്നതായുള്ള സൂചനകളില്ല. ഇരുരാജ്യങ്ങളും തമ്മിലുള്ള വ്യാപാരവും താരതമ്യേന കുറവാണ്.
അതിനാൽ വ്യാപാര രംഗത്തും കാര്യമായ പ്രതിസന്ധി ഉണ്ടാകില്ല. രണ്ടു രാജ്യങ്ങളും തമ്മിലുള്ള വ്യാപാരം പ്രതിവർഷം 800 കോടി ഡോളർ മാത്രമാണ്.
ധാതുലവണങ്ങൾ, പയർവർഗ്ഗങ്ങൾ, പൊട്ടാഷ്, വ്യാവസായിക രാസവസ്തുക്കൾ, രത്നക്കല്ലുകൾ എന്നിവയാണ് കാനഡ പ്രധാനമായും ഇന്ത്യയിലേക്ക് കയറ്റുമതി ചെയ്യുന്നത്.
ഫാർമസ്യൂട്ടിക്കൽസ്, സമുദ്രോത്പന്നങ്ങൾ, ഇലക്ട്രിക്കൽ ഇലക്ട്രോണിക് ഉപകരണങ്ങൾ, മുത്തുകൾ തുടങ്ങിയ വസ്തുക്കളാണ് ഇന്ത്യയിൽ നിന്ന് കാനഡയിലേക്ക് കയറ്റുമതി ചെയ്യുന്നത്.
ഓഗസ്റ്റിൽ, കാനഡ ഇന്ത്യയിലേക്ക് 27.9 കോടി ഡോളർ മൂല്യമുള്ള ചരക്കുകൾ ആണ് കയറ്റുമതി ചെയ്തത്. 32.4 കോടി ഡോളറിൻ്റെ ചരക്കുകൾ ഇന്ത്യയിൽ നിന്ന് കയറ്റുമതി ചെയ്തിട്ടുണ്ട്.
ഐടി, ബാങ്കിംഗ്, ധനകാര്യ രംഗം ഉൾപ്പെടെയുള്ള മേഖലകളിൽ 600-ലധികം കനേഡിയൻ കമ്പനികൾക്ക് ഇന്ത്യയിൽ സാന്നിധ്യമുണ്ട്. കൂടാതെ 1,000-ലധികം കമ്പനികൾ പ്രത്യക്ഷമായും പരോക്ഷമായുമൊക്കെ ബിസിനസ് നടത്തുന്നുമുണ്ട്.
നയതന്ത്ര ബന്ധത്തിലുണ്ടാകുന്ന മാറ്റങ്ങൾ ഏതെങ്കിലും വിധത്തിൽ വ്യാപാര ബന്ധത്തെ ബാധിക്കുമോ എന്നതിൽ ആശങ്കയില്ലെന്നും കാനഡയുമായുള്ള വ്യാപാരം ഇന്ത്യയെ സംബന്ധിച്ചിടത്തോളം വലുതല്ലെന്നും സർക്കാർ പ്രതിനിധി സൂചിപ്പിച്ചു.
നിലവിൽ കനേഡിയൻ ഫണ്ടുകൾ നിക്ഷേപം പിൻവലിക്കേണ്ട സാഹചര്യമില്ല. പെൻഷൻ ഫണ്ട് ഹൗസുകൾ ഉൾപ്പെടെ വരുമാനം മുന്നിൽ കണ്ടാണ് നിക്ഷേപ തീരുമാനങ്ങൾ എടുക്കുക. ഇപ്പോൾ ഇന്ത്യൻ വിപണി ആകർഷകമായതിനാൽ നിക്ഷേപകർ പിൻവാങ്ങാൻ സാധ്യതയില്ല.
നയതന്ത്രപ്രതിസന്ധിക്കിടയിലും, ഇന്ത്യയിലെ കനേഡിയൻ നിക്ഷേപങ്ങളിൽ വളർച്ചയുണ്ട്. 2024 സെപ്തംബർ വരെ ഇന്ത്യൻ ഓഹരികളിലെ കനേഡിയൻ നിക്ഷേപങ്ങൾ രണ്ടു ലക്ഷം കോടി രൂപയിലേറെയാണ്.
നിക്ഷേപങ്ങളിൽ വ‍ർധന
സമീപ കാലങ്ങളിൽ ഇന്ത്യൻ വിപണിയിലെ കനേഡിയൻ നിക്ഷേപങ്ങൾ ഉയർന്നിട്ടുണ്ട്.
കനേഡിയൻ നിക്ഷേപകർ, പ്രധാനമായും പെൻഷൻ ഫണ്ടുകൾ ഇന്ത്യൻ വിപണിയിൽ വലിയ തുകയാണ് ഒഴുക്കിയിരിക്കുന്നത്.
ഇരുരാജ്യങ്ങളും തമ്മിലുള്ള നയതന്ത്രബന്ധം കൂടുതൽ വഷളായാൽ മാത്രമേ നിലവിലെ നിക്ഷേപങ്ങൾ പിൻവലിക്കുന്നത് നിക്ഷേപകർ പരിഗണിക്കാനിടയുള്ളൂ. ഇത്തരം ഒരു സാഹചര്യം ഒഴിവാക്കാൻ സർക്കാർ ശ്രമിച്ചേക്കും.
വിവിധ മേഖലകൾ വിദേശ നിക്ഷേപത്തിന് തുറന്ന് കൊടുത്ത ബിജെപി സർക്കാരിൻ്റെ നയങ്ങൾ തന്നെയാണ് കൂടുതൽ വിദേശ നിക്ഷേപകരെ ഇന്ത്യയിലേക്ക് ആകർഷിച്ചത്.
