വൈദ്യുത വാഹന (ഇവി) വിപണിയിൽ പോരാട്ടം കനക്കുന്നതിന്റെ സൂചന നൽകിക്കൊണ്ട്, അതിവേഗ ചാർജിങ് സാങ്കേതികവിദ്യയിൽ ചൈനയെ കവച്ചുവെക്കുന്ന നേട്ടം സ്വന്തമാക്കാനൊരുങ്ങി ഇന്ത്യൻ സ്റ്റാർട്ടപ്പ് കമ്പനി.
ചൈനയുടെ രാജ്യാന്തര ഇവി വാഹന ബ്രാൻഡായ ബിവൈഡി (ബിൽഡ് യുവർ ഡ്രീംസ്), അടുത്തിടെ പുറത്തിറക്കിയ ഒരു മെഗാവാട്ടിന്റെ അൾട്രാ ഫാസ്റ്റ് ചാർജറിനെ, ചാർജിങ് വേഗതയിൽ മറികടക്കുന്ന ‘മിന്നൽ ചാർജർ’ സംവിധാനമാണ് ബെംഗളൂരു കേന്ദ്രമാക്കി പ്രവർത്തിക്കുന്ന എക്സ്പൊണന്റ് എനർജി തയ്യാറാക്കുന്നത്.
ഈ വർഷം അവസാനത്തോടെ 1.5 മെഗാവാട്ട് അൾട്രാ ഫാസ്റ്റ് ചാർജിങ് സംവിധാനം പുറത്തിറക്കുമെന്നാണ് സ്റ്റാർട്ടപ്പ് കമ്പനി അറിയിച്ചിരിക്കുന്നത്.
അതേസമയം ഇലക്ട്രിക് ബസുകൾക്കായി ഒരു മെഗാവാട്ടിന്റെ അതിവേഗ ചാർജിങ് സംവിധാനം ഇന്ത്യൻ നിരത്തുകളിൽ ഇതിനകം സജ്ജമാക്കിയിട്ടുണ്ടെന്ന് എക്സ്പൊണന്റ് എനർജി കമ്പനിയുടെ സിഇഒ ആയ അരുൺ വിനായക് സമൂഹ മാധ്യമമായ എക്സിൽ പങ്കുവെച്ച കുറിപ്പിലൂടെ ചൂണ്ടിക്കാട്ടി.
വിപണിയിൽ ലഭ്യമായിട്ടുള്ള ലിഥിയം – അയോൺ ബാറ്ററികൾ ഉപയോഗപ്പെടുത്തിയാണ് ഈ അതിവേഗ ചാർജിങ് സംവിധാനം സ്റ്റാർട്ടപ്പ് സജ്ജമാക്കിയിട്ടുള്ളത്. അതുകൊണ്ട് തന്നെ അനായാസവും ചെലവുകുറഞ്ഞ രീതിയിലും ചാർജിങ് സംവിധാനം വ്യാപിപ്പിക്കാൻ തങ്ങൾക്ക് കഴിയുമെന്നും എക്സ്പൊണന്റ് എനർജി അവകാശപ്പെട്ടു. ഇതിനകം 400 കോടിയോളം രൂപയുടെ ഫണ്ടിങ് പ്രമുഖ നിക്ഷേപകരിൽ നിന്നും കമ്പനിക്ക് ലഭിച്ചിട്ടുണ്ട്.
എക്സ്പൊണന്റ് എനർജി
ഇന്ത്യയിലെ മുൻനിര വൈദ്യുത ഇരുചക്ര വാഹന നിർമാതാക്കളായ ഏഥർ കമ്പനിയിലെ ജീവനക്കാരായിരുന്ന അരുൺ വിനായകും സജ്ഞയ് ബല്യാലും ഒത്തുചേർന്ന് 2020-ൽ സ്ഥാപിച്ച സ്റ്റാർട്ടപ്പ് ആണ് എക്സ്പൊണന്റ് എനർജി.
ഇവി വാഹനങ്ങൾക്കുള്ള സമഗ്ര ചാർജിങ് സംവിധാനം തയ്യാറാക്കുന്നതിലാണ് കമ്പനി ശ്രദ്ധയൂന്നീയിരിക്കുന്നത്. പ്രൊപ്രൈറ്ററി ബാറ്ററി പാക്കുകളും ചാർജിങ് സ്റ്റേഷനായ ഇ-പമ്പുകളും ചാർജിങ് കണക്ടറായ ഇ-പ്ലഗ്ഗും ഒക്കെയാണ് എക്സപൊണന്റ് എനർജി പുറത്തിറക്കിയിട്ടുള്ള പ്രധാന ഉത്പന്നങ്ങളും സേവനങ്ങളും.
സാദാ ലിഥിയം – അയോൺ സെൽ ഉപയോഗപ്പെടുത്തിയുള്ള 15 മിനിറ്റ് കൊണ്ട് ചാർജ് ചെയ്യാവുന്ന ബാറ്ററി സംവിധാനത്തിന് 3,000-സൈക്കിൾ ലൈഫ് വാറന്റിയും കമ്പനി വാഗ്ദാനം ചെയ്യുന്നുണ്ട്.
അതേസമയം എക്സ്പൊണന്റ് എനർജിയുടെ സാങ്കേതികവിദ്യയിൽ തയ്യാറാക്കിയ അൾട്രാ ഫാസ്റ്റ് ഇവി ചാർജിങ്ങ് സംവിധാനം രാജ്യമെമ്പാടും അതിവേഗം വ്യാപിപ്പിക്കുകയാണ്.
ഇതിനകം 1,700 വൈദ്യുത വാഹനങ്ങളിൽ കമ്പനിയുടെ മിന്നൽ ചാർജിങ് സംവിധാനം സ്ഥാപിച്ചു കഴിഞ്ഞിട്ടുണ്ട്. ഇതിലൂടെ 3.5 ലക്ഷം തവണ അൾട്രാ ഫാസ്റ്റ് ചാർജിങ്ങ് പൂർത്തിയാക്കുകയും അതുവഴി 20 ലക്ഷം കിലോമീറ്റർ ദൂരം സഞ്ചരിക്കുകയും ചെയ്തു.
കഴിഞ്ഞ രണ്ട് വർഷത്തിനിടെ ബെംഗളൂരുവിന് പുറമെ ഡൽഹി, ചെന്നൈ, കൊൽക്കത്ത, ഹൈദരാബാദ്, അഹമ്മദാബാദ് തുടങ്ങിയ മറ്റ് മെട്രോ നഗരങ്ങളിലേക്കും ക്സ്പൊണന്റ് എനർജിയുടെ പ്രവർത്തനം വ്യാപിപ്പിച്ചിട്ടുണ്ട്.
ഇവി സെക്ടറിൽ പോരാട്ടം കനക്കും
ഇവി വാഹന വിപണിയെ ഇളക്കിമറിക്കാവുന്ന നേട്ടമെന്ന നിലയിലാണ് പുതിയ അതിവേഗ ചാർജറും നവീന ബാറ്ററി സാങ്കേതികവിദ്യയും ബിവൈഡി ഏതാനും ദിവസങ്ങൾക്ക് മുൻപ് ആഗോള വിപണിയിൽ അവതരിപ്പിച്ചത്.
ചൈനീസ് കമ്പനി തയ്യാറാക്കിയ ഒരു മെഗാവാട്ടിന്റെ അൾട്രാ ഫാസ്റ്റ് ചാർജറിലൂടെ കേവലം അഞ്ച് മിനിറ്റുകൊണ്ട് 400 കിലോമീറ്റർ ദൂരം വരെ സഞ്ചരിക്കാൻ കഴിയുന്നവിധം ബാറ്ററി ചാർജ് ചെയ്യാനാകും. പ്രധാന എതിരാളികളായ അമേരിക്കൻ ശതകോടീശ്വരൻ ഇലോൺ മസ്കിന്റെ ഇവി കാർ കമ്പനിയായ ടെസ്ലയെ ഏറെ പിന്നിലാക്കുന്ന നേട്ടമാണിത്.
അതേസമയം ട്രോൾ – ഡീസൽ വാഹനങ്ങൾ ഒരു പമ്പിൽ നിന്നും റിഫ്യൂവൽ ചെയ്യുന്ന സമയംകൊണ്ട് തന്നെ ഇവി കാറുകളും ചാർജ് ചെയ്യാൻ കഴിയുമെന്നത് വൈദ്യുത വാഹന മേഖലയുടെ വളർച്ചയ്ക്ക് ഏറെ ഗുണകരമാകും.
ഇതിലൂടെ ദൈർഘ്യമേറിയ ചാർജിങ് കാരണം വൈദ്യുത വാഹനങ്ങളിലേക്ക് മാറാൻ മടിച്ചുനിന്നവരെയും ആകർഷിക്കാൻ കഴിയും.
എന്തായാലും ഓട്ടോമൊബീൽ സെക്ടറിന്റെ ഭാവി ബിസിനസ് മേഖലയിൽ ഇന്ത്യ പിന്തള്ളപ്പെടുകയില്ലെന്നും ആഗോള തലത്തിൽ മത്സരിക്കാൻ പ്രാപ്തിയുണ്ടെന്ന ആത്മവിശ്വാസവും പകരാൻ എക്സ്പൊണന്റ് എനർജിക്ക് സാധിച്ചുവെന്നതാണ് ശ്രദ്ധേയമായ നേട്ടം.
