ലൈഫ് ഇൻഷുറൻസും, ആരോഗ്യ ഇൻഷുറൻസും, പ്രോപ്പർട്ടി കവറും ഒരു കുടക്കീഴിൽ ലഭ്യമാക്കുന്ന ബീമാ വിസ്താർ ഉടനെത്തുമെന്ന് ഐആർഡിഎഐ. ഈ ഓൾ-ഇൻ-വൺ ഇൻഷുറൻസ് ഉല്പന്നം എല്ലാവർക്കും താങ്ങാനാവുന്ന ഒന്നായിരിക്കും.
ലൈഫ്, ജനറൽ ഇൻഷുറൻസ് കൗൺസിലുകളുമായും, വ്യവസായ മേഖലകളിലെ പ്രതിനിധികളുമായും നടത്തിടെ ചർച്ചയെ അഠിസ്ഥാനമാക്കി പുതിയ ഓൾ-ഇൻ-വൺ ഇൻഷുറൻസ് അവതരിപ്പിക്കുന്നതിന്റെ അവസാന ഘട്ടത്തിലാണ് ഐആർഡിഎഐ എന്ന് ഒരു മുതിർന്ന ഉദ്യോഗസ്ഥൻ വ്യക്തമാക്കി.
2047ഓടെ എല്ലാവർക്കും ഇൻഷുറൻസ് പരിരക്ഷ ഉറപ്പാക്കുക എന്ന ഐആർഡിഎഐയുടെ ലക്ഷ്യം സാക്ഷാത്കരിക്കുന്നതിന് വേണ്ടിയുള്ള പരിഷ്കാര പദ്ധതികളുടെ ഭാഗമായാണ് ഈ പുതിയ ഓൾ-ഇൻ-വൺ ഇൻഷുറൻസ് എന്ന ആശയം ഐആർഡിഎഐ ചെയർമാൻ ദേബാശിഷ് പാണ്ഡ നിർദ്ദേശിച്ചത്.
ഈ ഇൻഷുറൻസിനെ താങ്ങാനാവുന്നതാക്കുന്നതിന് വേണ്ടി വിലനിർണയത്തെക്കുറിച്ചുള്ള ചർച്ചകളും അവസാന ഘട്ടത്തിലാണ്. കൂടാതെ, ചില റൈഡറുകൾ അധിക ഫീച്ചറുകളായി ഉൾപ്പെടുത്തുന്ന കാര്യം ചർച്ചചെയ്തുവരികയാണെന്നും ഇതുമായി ബന്ധപ്പെട്ട ഉദ്യോഗസ്ഥൻ പറഞ്ഞു.
എന്നാൽ, ഇൻഷുറൻസ് കമ്പനികൾ ഇത്തരത്തിലൊരു പോളിസി താങ്ങാനാവുന്ന വിലയ്ക്ക് നൽകാൻ തയ്യാറാകുമോ എന്ന ആശങ്ക പലർക്കുമുണ്ടാകാം. ഐആർഡിഎഐ ഈ മേഖലയിലെ കമ്പനികളുമായി നടത്തിയ ചർച്ചയുടെ അടിസ്ഥാനത്തിൽ കമ്പനികൾ താങ്ങാനാവുന്ന വിലയിൽ ബീമാ വിസ്താർ നൽകാൻ തയ്യാറാണെന്ന് അറിയിച്ചതായും ബന്ധപ്പെട്ട ഉദ്യോഗസ്ഥൻ പറഞ്ഞു.
ഈ പുതിയ ബീമാ വിസ്താർ പ്ലാൻ ഉപഭോക്താക്കൾക്ക് എളുപ്പത്തിൽ മനസ്സിലാക്കാവുന്നതും, ലളിതവുമായ നിബന്ധനകളും വ്യവസ്ഥകളുമായാണ് വിപണിയിലെത്തുക. മാത്രമല്ല, പൂർണമായും ഡിജിറ്റൽ സാങ്കേതികതയുടെ സഹായത്തോടെ പ്രവർത്തിക്കുന്ന ഒന്നായിരിക്കും ഈ ഇൻഷുൻസ്.
മാത്രമല്ല, ക്ലെയിം പരിശോധിച്ചുറപ്പിക്കുന്നതും, ക്ലെയിം തുക ഉപഭോക്താക്കളുടെ അക്കൗണ്ടിലേക്ക് ക്രെഡിറ്റ് ചെയ്യുന്നതുമടക്കമുള്ള കാര്യങ്ങൾ ഡിജിറ്റൽ സംവിധാനത്തിന്റെ സഹായത്തോടെ പോളിസി ഉടമകൾക്ക് ആശ്വാസം നൽകും.
കേന്ദ്ര സർക്കാർ പദ്ധതിയായ പ്രധാനമന്ത്രി ജൻ ധന് യോജനയിൽ (പിഎംജെഡിവൈ) പ്രയോഗിച്ച ബാങ്ക് മിത്ര മോഡലിനെ അടിസ്ഥാനമാക്കിയാണ് ബീമാ വിസ്താർ അവതരിപ്പിക്കുന്നത്.
നിലവിൽ, 8.5 ലക്ഷം ബാങ്ക് മിത്ര സംവിധാനം സാമ്പത്തിക സേവനങ്ങൾ ഉറപ്പാക്കുന്ന അവസാന ലിങ്കായി പ്രവർത്തിക്കുന്നുണ്ട്. ഇതിന്റെ അടിസ്ഥാനത്തിൽ, സ്വയം സഹായ സംഘങ്ങളിലെ അംഗങ്ങൾ ഉൾപ്പെടെയുള്ള സ്ത്രീകളെ ‘ബീമാ വാഹക്’മാരായി നിയമിക്കും.
കൂടാതെ, കുറഞ്ഞ നെറ്റ്വർക്ക് സൗകര്യമുള്ള ഗ്രാമീണ മേഖലകളിൽ എത്തിച്ചേരുന്നതിലായിരിക്കും പ്രാഥമിക ശ്രദ്ധ കേന്ദ്രീകരിക്കുന്നത്.
സാമൂഹിക സുരക്ഷ ലക്ഷ്യം വെച്ച് താങ്ങാനാവുന്ന ഇൻഷുറൻസ് പരിരക്ഷയുടെ ആവശ്യകതയെ കുറിച്ച് ഗ്രാമീണ കുടുംബങ്ങളിലെ സ്ത്രീകളെ ബോധ്യപ്പെടുത്താനും, ബീമാ വിസ്താരയിലൂടെ പരിരക്ഷ ഉറപ്പാക്കാനും ബീമാ വാഹക്മാർ സഹായിക്കുമെന്നും ഐആർഡിഎഐ വ്യക്തമാക്കി.
ഇന്ത്യക്കാരുടെ ഇൻഷുറൻസുമായി ബന്ധപ്പെട്ട എല്ലാ കാര്യങ്ങളും ഒരു കുടക്കീഴിൽ കൊണ്ടുവരുന്നതിന്റെ ഭാഗമായി ബീമാ സുഗം എന്ന വൺ-സ്റ്റോപ്പ് ഡെസ്റ്റിനേഷൻ പോർട്ടൽ അവതരിപ്പിക്കാനിരിക്കുന്നതിന് പിന്നാലെയാണ് ഐആർഡിഎഐ പുതിയ പദ്ധതിയെ കുറിച്ച് വ്യക്തമാക്കിയിരിക്കുന്നത്.
ഇ-ബീമ അക്കൗണ്ടുകൾ വഴി പോളിസി ഉടമകൾക്ക് അവരുടെ ഇൻഷുറൻസ് ആവശ്യങ്ങൾ നിറവേറ്റാൻ കഴിയുന്ന, ഇൻഷുറൻസ് മേഖലയിൽ വിപ്ലവം തീർക്കാൻ ലക്ഷ്യമിട്ടുള്ളതാണ് ബീമാ സുഗം പോർട്ടൽ.
