റീഇംബേഴ്‌സ്‌മെന്റ് മോഡിനേക്കാൾ ആരോഗ്യ ഇൻഷുറൻസിൽ ക്യാഷ്ലെസ് മോഡാണ് നല്ലതെന്ന്, ഇൻഷുറൻസ് റെഗുലേറ്റർ ഐആർഡിഎഐ പറഞ്ഞു.
ആരോഗ്യ ഇൻഷുറൻസിലേക്കുള്ള പ്രവേശനം വർദ്ധിപ്പിക്കുന്നതിനും ക്ലെയിം സേവനത്തിലെ കാര്യക്ഷമത വർദ്ധിപ്പിക്കുന്നതിനുമുള്ള കണ്ടെത്തലുകൾ അവതരിപ്പിച്ചതായി വെള്ളിയാഴ്ച പുറത്തിറക്കിയ പ്രസ്താവനയിൽ റെഗുലേറ്റർ പറയുന്നു.
ആരോഗ്യ ഇൻഷുറൻസ് മുന്നോട്ട് കൊണ്ടുപോകുന്നതിന് വിവേകപൂർണ്ണമായ ആരോഗ്യ ആവാസവ്യവസ്ഥയുടെ ആവശ്യകത എടുത്തു കാണിക്കുന്നു. റീഇംബേഴ്‌സ്‌മെന്റ് മോഡിനേക്കാൾ ആരോഗ്യ ഇൻഷുറൻസിൽ ക്യാഷ്ലെസ് മോഡ് മുൻഗണന നൽകണം.
വേഗത്തിലുള്ള ക്ലെയിം തീർപ്പാക്കലും പരാതികൾ വേഗത്തിൽ പരിഹരിക്കലും ആയിരുന്നു ഇവന്റിന്റെ പ്രധാന ശ്രദ്ധാകേന്ദ്രങ്ങളിലൊന്ന്. ബാങ്കിംഗ് വ്യവസായത്തിന് അനുസൃതമായി ഇൻഷുറൻസ് സേവനങ്ങൾ വിതരണം ചെയ്യുന്നതിൽ ‘ഈസ്’മെച്ചപ്പെടുത്തിയ ആക്‌സസും സേവന മികവും നൽകുന്നതായും റെഗുലേറ്റർ പറഞ്ഞു.
പോളിസി ഉടമയ്ക്ക് എളുപ്പ‌ത്തിൽ ഇൻഷുറൻസ് കമ്പനിയെ സമീപിക്കുന്നതിനുള്ള ഒരു അന്തരീക്ഷം ഇത് വിഭാവനം ചെയ്യുന്നു. ഇൻഷുറൻസ് വാങ്ങുന്നതിനോ, സർവീസ് ചെയ്യുന്നതിനോ അല്ലെങ്കിൽ ക്ലെയിമുകൾ സ്വീകരിക്കുന്നതിനോ അല്ലെങ്കിൽ എന്തെങ്കിലും പരാതി സമർപ്പിക്കുന്നതിനോ മികച്ചതാണ് ഇത്.
കൂടാതെ ഇൻഷുറൻസ് കമ്പനികൾ അവരുടെ സേവന വിതരണത്തിൽ പരമാവധി മികവ് നൽകാൻ ശ്രമിക്കണം. ഇൻഷുറൻസ് കമ്പനികൾക്കും കൗൺസിലുകൾക്കും മികച്ച മാർക്കറ്റ് പെരുമാറ്റ രീതികളും ഉപഭോക്തൃ സംതൃപ്തി വർദ്ധിപ്പിക്കുന്ന മാർക്കറ്റ് ധാർമ്മികതയും ഉറപ്പാക്കുന്നതിനുള്ള വർധിച്ച ഉത്തരവാദിത്തം വ്യക്തമാക്കിയതായി റെഗുലേറ്റർ പറഞ്ഞു.
കാലോചിതമായ മാറ്റങ്ങൾ
ക്യാഷ്ലെസ് സേവനത്തിലൂടെ ബാങ്കിംഗ് വ്യവസായത്തിന് അനുസൃതമായി ഇൻഷുറൻസ് സേവനങ്ങൾ നൽകുന്നതിൽ “എൻഹാൻസ്‌ഡ് ആക്‌സസ് ആൻഡ് സർവീസ് എക്‌സലൻസ് (ഈസ്)” കൊണ്ടുവരികയാണ് റെഗുലേറ്ററുടെ ലക്ഷ്യം.
കഴിഞ്ഞ ദിവസം, ഇൻഷുറൻസ് കമ്പനികൾ മാനസിക അസ്വാസ്ഥ്യങ്ങൾ, എച്ച്ഐവി പോലുള്ള ഗുരുതരമായ രോഗം ബാധിച്ച് ചികിത്സ തേടുന്ന ആളുകൾക്ക് ആവശ്യമായ കവറേജ് ഉറപ്പാക്കുന്നതിൽ ശ്രദ്ധ കേന്ദ്രീകരിക്കണമെന്ന് ഐആർഡിഎഐ ആവശ്യപ്പെട്ടിരുന്നു.
ഐആർഡിഎഐ പ്രസിദ്ധീകരിച്ച ഒരു സർക്കുലറിലായിരിരുന്നു ഇക്കാര്യം വ്യക്തമാക്കിയത്. മാനസികാരോഗ്യ പ്രശ്നങ്ങൾക്ക് പരിചരണം ആവശ്യമുള്ളവർക്ക് പ്രത്യേക പരിരക്ഷ നൽകാൻ പൊതു – സ്വകാര്യ ആരോഗ്യ ഇൻഷുറൻസ് കമ്പനികൾക്ക് റെഗുലേറ്റർ ഉത്തരവ് നൽകിയിട്ടുണ്ട്.
കൂടാതെ, ഇൻഷുറൻസ് അവതരിപ്പിക്കുന്നതിനുള്ള ഏറ്റവും കുറഞ്ഞ സ്കോപ്പും പാരാമീറ്ററുകളും സജ്ജീകരിക്കുന്ന മാതൃകാ മാർഗ്ഗനിർദ്ദേശങ്ങളും നൽകിയിട്ടുണ്ട്.
ഈ വിഭാഗത്തിൽ നിന്നുള്ള അപേക്ഷകൾക്ക് കവറേജ് നിഷേധിക്കപ്പെടുന്നില്ലെന്ന് ഉറപ്പാക്കാൻ ബോർഡ് അംഗീകൃത അണ്ടർ റൈറ്റിംഗ് പോളിസികൾ രൂപകൽപന ചെയ്യാനും നടപ്പിലാക്കാനും ഇൻഷുറർമാരോട് പറഞ്ഞിട്ടുണ്ട്.
നിയന്ത്രണ ചട്ടക്കൂട് അനുസരിച്ച്, ഉൽപ്പന്നത്തിന്റെ കരാർ കാലാവധി ഒരു വർഷത്തേക്ക് പുതുക്കാവുന്നതാണ്. ഈ സർക്കുലർ ഉടനടി പ്രാബല്യത്തിൽ വരുമെന്നും ഐആർഡിഎഐ വ്യക്തമാക്കി.
2016ലെ ഐആർഡിഎഐ ആരോഗ്യ ഇൻഷുറൻസ് ചട്ടങ്ങൾ അനുസരിച്ചായിരിക്കണം നിരക്ക് നിശ്ചയിക്കേണ്ടതെന്നും പ്രസ്താവനയിൽ വ്യക്തമാക്കിയിട്ടുണ്ട്.
മോട്ടോർ തേർഡ് പാർട്ടി (എംടിപി) ഇൻഷുറൻസുമായി ബന്ധപ്പെട്ട ബാധ്യതകൾ നിശ്ചയിക്കുന്ന പൊതു ഇൻഷുറൻസ് കമ്പനികൾക്ക് പുതിയ മാർഗനിർദേശങ്ങൾ പുറത്തിറക്കിയതിന് പിന്നാലെയാണ് ഐആർഡിഎഐ പ്രത്യേക രോഗാവസ്ഥകൾക്കും ആരോഗ്യ ഇൻഷുറൻസിൽ പരിരക്ഷ ഉറപ്പാക്കണമെന്ന് ആവശ്യപ്പെട്ടിരിക്കുന്നത്.
ലൈഫ്, ഹെൽത്ത്, ട്രാവൽ, മോട്ടോർ, ഗ്രൂപ്പ് എന്നിങ്ങനെ ഒരു വ്യക്തിയുടെ കൈവശമുള്ള എല്ലാ ഇൻഷുറൻസ് പോളിസികളുടേയും വിവരങ്ങൾ ഒരൊറ്റ ഡാറ്റയായി ക്രോഡീകരിച്ചുകൊണ്ട് ആക്‌സസ്, പിന്തുണ, ക്ലെയിമുകൾ എന്നിവ വേഗത്തിലാക്കുന്നതിന് നിരവധി മാറ്റങ്ങൾ പരിഗണിക്കുന്നതായും ഐആർഡിഎഐ പറഞ്ഞു.
