എഫ്എംസിജി കമ്പനിയായ ഐടിസി യോഗ്യരായ ജീവനക്കാർക്കായി അധിക ഓഹരികൾ ഇഷ്യു ചെയ്യുന്നു. കമ്പനിയുടെ എംപ്ലോയീസ് സ്റ്റോക്ക് ഓപ്‌ഷൻ സ്കീമിന് കീഴിൽ യോഗ്യരായ ജീവനക്കാർക്ക് കമ്പനി 30 ലക്ഷം ഓഹരികൾ ആണ് ഇഷ്യൂ ചെയ്യുന്നത്.
ഒരു കമ്പനിയിലെ ഓഹരികൾ കുറഞ്ഞ വിലയിൽ സ്വന്തമാക്കാൻ ജീവനക്കാരെ അനുവദിക്കുന്ന സ്കീമാണ് ഇഎസ്ഒപി.
2023 ആഗസ്റ്റ് നാലിനാണ് കമ്പനിയുടെ ഇഎസ്ഒപി സ്കീമിന് കീഴിൽ കമ്പനി ഓഹരികൾ അലോട്ട് ചെയ്തത്. വെള്ളിയാഴ്ച ഐടിസി ഓഹരികൾ ബിഎസ്ഇയിൽ 0.26 ശതമാനം ഇടിഞ്ഞ് 454.90 രൂപയിലാണ് ക്ലോസ് ചെയ്തത്.
കമ്പനിയുടെ വിപണി മൂല്യം ഏകദേശം 5.67 ലക്ഷം കോടി രൂപയായിരുന്നു. ഓഗസ്റ്റ് 4 ന് അവസാനിച്ച ആഴ്ചയിൽ, ഐടിസി ഓഹരികൾ ബിഎസ്ഇയിൽ 2.3 ശതമാനം ഇടിഞ്ഞിരുന്നു.
അതേസമയം ഓഹരി കഴിഞ്ഞ ആറുമാസത്തിൽ ബിഎസ്ഇയിൽ ഏകദേശം 19 ശതമാനം നേട്ടമുണ്ടാക്കി. പ്രതിവർഷം ഏകദേശം 37 ശതമാനമാണ് ഓഹരിയിൽ നിന്നുള്ള നേട്ടം.
ഈ രംഗത്തെ മറ്റ് കമ്പനികളുമായി താരതമ്യം ചെയ്യുമ്പോൾ മികച്ച പ്രകടനം നടത്തുന്ന എഫ്എംസിജി സ്റ്റോക്കുകളിൽ ഒന്നാണ് ഐടിസി. അടുത്തിടെ, ഐടിസി അതിൻെറ ഹോട്ടൽ ബിസിനസ് വിഭജിച്ചിരുന്നു.
ഐടിസി ഹോട്ടൽസ് എന്ന പേരിൽ ഒൻപതുമാസത്തിനുള്ളിൽ കമ്പനി ലിസ്റ്റ് ചെയ്യുമെന്ന് സൂചന. പുതിയ കമ്പനിയുടെ 40 ശതമാനം ഓഹരികൾ ആണ് ഐടിസി കൈവശം വയ്ക്കുന്നത്. ബാക്കി 60 ശതമാനം ഓഹരികൾ കമ്പനി ഓഹരി ഉടമകൾക്ക് കമ്പനിയിലെ അവരുടെ ഓഹരികൾക്ക് ആനുപാതികമായി നേരിട്ട് കൈവശം വയ്ക്കാം.
2023 ഓഗസ്റ്റ് 14-ന് നടത്തുന്ന ബോർഡ് മീറ്റിംഗിൽ ഇതുമായി ബന്ധപ്പെട്ട കൂടുതൽ പ്രഖ്യാപനങ്ങൾ ഉണ്ടാകുമെന്നാണ് സൂചന.
പ്രഭുദാസ് ലില്ലേധർ ഗവേഷണ വിഭാഗം മേധാവി അമ്‌നിഷ് അഗർവാൾ ചൂണ്ടിക്കാട്ടുന്നത് അനുസരിച്ച് ഹോട്ടൽ ബിസിനസിന്റെ വിഭജനം ഓഹരി മൂല്യം ഉയർത്തും. മൂലധന വിഹിതത്തിലെ പ്രശ്നങ്ങളും പരിഹരിക്കും.
ഹോട്ടൽ വ്യവസായ രംഗത്തെ മുന്നേറ്റം കമ്പനിക്കും ഗുണമായേക്കും. ജി20, ബിസിനസ് മേഖലയുടെ തിരിച്ചുവരവ്, വിദേശ വിനോദസഞ്ചാര യാത്രകളിലെ ഉണർവ് എന്നിവ ഹോട്ടൽ ബിസിനസ് രംഗം മുന്നേറാൻ കാരണമായേക്കും.
സിഗരറ്റ് ബിസിനസിലെ ശക്തമായ വളർച്ചയും എഫ്എംസിജി രംഗത്തെ മുന്നേറ്റവും പോസിറ്റീവ് ആകുമെന്നാണ് സൂചന. ഏടിസിയുടെ ടാർഗെറ്റ് വില 478 രൂപയായി ആണ് പ്രഭുദാസ് ലില്ലേധർ ഉയർത്തിയിരിക്കുന്നത്.
455 രൂപയായിരുന്നു നേരത്തെ നിശ്ചയിച്ചിരുന്ന ടാർഗറ്റ് വില.
