മറ്റൊരു ആഗോള ബ്രോക്കറേജ്‌ കൂടി ഫിന്‍ടെക്‌ കമ്പനിയായ പേടിഎമ്മിനെ കുറിച്ചുള്ള കവറേജ് ആരംഭിച്ചു. ജെഫ്‌റീസ്‌ ഈ ഓഹരി വാങ്ങുക എന്ന ശുപാര്‍ശയാണ്‌ നല്‍കുന്നത്‌. ലക്ഷ്യമാക്കുന്ന വില 1300 രൂപ.
നിലവില്‍ 945 രൂപ നിലവാരത്തില്‍ വ്യാപാരം ചെയ്യുന്ന പേടിഎം 37.5 ശതമാനം മുന്നേറ്റം നടത്താനുള്ള സാധ്യതയാണ്‌ ജെഫ്‌റീസ്‌ പ്രവചിക്കുന്നത്‌. 2023ല്‍ ഇതുവരെ പേടിഎം ഓഹരി വില 80 ശതമാനമാണ്‌ ഉയര്‍ന്നത്‌. ആഗോള തലത്തില്‍ തന്നെ ഈ വര്‍ഷം ഏറ്റവും ഉയര്‍ന്ന നേട്ടം നല്‍കിയ ഫിന്‍ടെക്‌ ഓഹരികളിലൊന്നാണ്‌ പേടിഎം.
അടുത്ത നാല്‌ ത്രൈമാസങ്ങള്‍ക്കുള്ളില്‍ പേടിഎം ലാഭക്ഷമതയിലെത്തുമെന്ന്‌ ജെഫ്‌റീസ്‌ പ്രവചിക്കുന്നു. ലോകത്തിലെ തന്നെ ലാഭത്തില്‍ പ്രവര്‍ത്തിക്കുന്ന ഏതാനും വന്‍കിട ഫിന്‍ടെക്‌ കമ്പനികളിലൊന്നായി പേടിഎം മാറും.
ചെലവ്‌ കുറഞ്ഞ നിലയിലാണ്‌ ഈ ഓഹരി നിലവില്‍ വ്യാപാരം ചെയ്യുന്നത്‌- ജെഫ്‌റീസ്‌ വിലയിരുത്തുന്നു. കഴിഞ്ഞ രണ്ട്‌ വര്‍ഷം കൊണ്ട്‌ പേടിഎമ്മിന്റെ വരുമാനത്തില്‍ മൂന്ന്‌ മടങ്ങ്‌ കുതിച്ചുചാട്ടമാണ്‌ ഉണ്ടായത്‌. ഗ്രോസ്‌ മാര്‍ജിന്‍ 3 ശതമാനത്തില്‍ നിന്ന്‌ 54 ശതമാനമായി ഉയര്‍ന്നു.
ഏതാനും ദിവസം മുമ്പ്‌ മറ്റൊരു പ്രമുഖ ആഗോള ബ്രോക്കറേജ്‌ ആയ ഗോള്‍ഡ്‌മാന്‍ സാച്‌സ്‌ പേടിഎമ്മില്‍ ലക്ഷ്യമാക്കുന്ന വില 1250 രൂപയായി ഉയര്‍ത്തിയിരുന്നു. നേരത്തെ ഗോള്‍ഡ്‌മാന്‍ സാച്‌സ്‌ പേടിഎമ്മില്‍ ലക്ഷ്യമാക്കിയിരുന്ന വില 1200 രൂപയായിരുന്നു.
രണ്ടാം ത്രൈമാസത്തില്‍ പേടിഎമ്മിന്റെ വരുമാനത്തില്‍ 30 ശതമാനം വളര്‍ച്ചാണ്‌ ഗോള്‍ഡ്‌മാന്‍ സാച്‌സ്‌ പ്രതീക്ഷിക്കുന്നത്‌. ഇന്റര്‍നെറ്റ്‌ മേഖലയില്‍ ഏറ്റവും ലാഭക്ഷമത കൈവരിക്കുന്ന കമ്പനിയായി പേടിഎം മാറുമെന്നാണ്‌ പ്രതീക്ഷിക്കുന്നതെന്ന്‌ ഗോള്‍ഡ്‌മാന്‍ സാച്‌സ്‌ വിലയിരുത്തുന്നു.
നിലവില്‍ സൊമാറ്റോ, നൈക തുടങ്ങിയ ന്യൂ ഏജ്‌ ടെക്‌ കമ്പനികളേക്കാള്‍ താഴ്‌ന്ന മൂല്യത്തിലാണ്‌ പേടിഎം വ്യാപാരം ചെയ്യുന്നതെന്ന്‌ ഗോള്‍ഡ്‌മാന്‍ സാച്‌സ്‌ ചൂണ്ടികാട്ടുന്നു. പേടിഎമ്മിന്റെ വളര്‍ച്ചാ സാധ്യത പരിഗണിക്കുമ്പോള്‍ ഈ ഓഹരി ചെലവ്‌ കുറഞ്ഞ നിലയിലാണുള്ളത്‌.
ഒക്‌ടോബര്‍ 20ന്‌ പേടിഎം ജൂലായ്‌-സെപ്‌റ്റംബര്‍ ത്രൈമാസത്തിലെ പ്രവര്‍ത്തന ഫലം പ്രഖ്യാപിക്കും.
