ഇന്ത്യൻ ശതകോടീശ്വരൻ മുകേഷ് അംബാനി ഏപ്രിൽ 25 ന് ജിയോ സിനിമയുമായി ബന്ധപ്പെട്ട് വൻ പ്രഖ്യാപനത്തിന് ഒരുങ്ങുന്നതായി റിപ്പോർട്ട്.
കഴിഞ്ഞ വർഷമാണ് മുകേഷ് അംബാനിയുടെ ജിയോസിനിമ 23,758 കോടി രൂപ നൽകി അഞ്ച് വർഷത്തേക്ക് ഐപിഎൽ ഗെയിമുകൾ ഓൺലൈനിൽ സ്ട്രീം ചെയ്യാനുള്ള അവകാശം നേടിയത്. ഇതിനായി കമ്പനി പ്രതിവർഷം 4,750 കോടി രൂപയോളമാണ് ചെലവഴിക്കുന്നത്.
എന്നാൽ ജിയോ സിനിമ നിലവിൽ ഐപിഎൽ സൗജന്യമായാണ് കാണികളിലേയ്ക്ക് എത്തിക്കുന്നത്. ഐപിഎല്ലിന് പുറമേ മറ്റു ചില കണ്ടന്റുകളും പ്ലാറ്റ്‌ഫോം സൗജന്യമായി ഉപയോക്താക്കളിലേയ്ക്ക് എത്തിക്കുന്നുണ്ട്.
ഇത്രയും തുക മുടക്കി സംപ്രേക്ഷണ അവകാശം നേടിയിട്ട് അബാനിക്ക് എങ്ങനെ സൗജന്യമായി ഇതിനു സാധിക്കുന്നുവെന്നാകും നിങ്ങൾ ചന്തിക്കുന്നതല്ലേ? അതിനുള്ള ഉത്തരമാണ് പരസ്യങ്ങൾ. ഓരോ ഐപിഎൽ കളിക്കിടയിലും നിങ്ങൾ കാണുന്ന പരസ്യങ്ങൾ അംബാനിയുടെ പോക്കറ്റിൽ പണമെത്തിക്കുന്നു.
ഐപിഎല്ലിനിടയിലെ പരസ്യങ്ങൾ പലരെയും അലട്ടാറുണ്ട്. അത്തരത്തിലൊരു വ്യക്തിയാണ് നിങ്ങളെങ്കിൽ അൽപം കൂടി ഒന്നു ക്ഷമിക്കൂ. ഏപ്രിൽ 25ന് അംബാനി ജിയോ സിനിമയിൽ ഒരു പരസ്യരഹിത പ്ലാൻ പ്രഖ്യാപിച്ചേക്കുമെന്നാണു വിവരം.
ഐപിഎൽ മത്സരങ്ങൾക്കിടെ ജിയോ സിനിമ തന്നെ പുതി സബ്സ്ക്രിപ്ഷൻ പ്ലാനുകളുടെ സൂചനകൾ നൽകുന്നുണ്ട്. ഈ പ്ലാൻ ഏപ്രിൽ 25ന് അവതരിപ്പിക്കുമെന്നും ഇതിൽ പറയുന്നു.
നിലവിൽ ജിയോസിനിമ പ്രതിവർഷം 999 രൂപ വിലയുള്ള വാർഷിക സബ്സ്ക്രിപ്ഷൻ പ്ലാനാണ് വാഗ്ദാനം ചെയ്യുന്നത്. കൂടാതെ ഉപയോക്താക്കൾക്ക് 99 രൂപയുടെ പ്രതിമാസ പ്ലാനും വാങ്ങാം.
ജിയോ സിനിമ അതിന്റെ പ്രധാന എതിരാളിയായ ഡിസ്‌നി പ്ലസ് ഹോട്ട്‌സ്റ്റാറിനെ അടുത്തിടെ സ്വന്തമാക്കിയിരുന്നു. അതിനാൽ തന്നെ വിപണിയിൽ നിന്നുള്ള മത്സരം കമ്പനിക്ക് കുറവാണെന്നു തന്നെ പറയാം. ഇത് അംബാനിക്ക് കൂടുതൽ ഇടപെടലുകൾക്കു അവസരമൊരുക്കുന്നുവെന്നു വിദഗ്ധർ പറയുന്നു.
വിപണിയിലെ മറ്റു പ്ലാറ്റ്‌ഫോമുകൾ പരിഗണിക്കുമ്പോൾ ജിയോ സിനിമയുടെ നിബന്ധനകൾ ഏറെ ആകർഷകമാണ്. കൂടാതെ അംബാനിയുടെ ജിയോസിനിമ കുറഞ്ഞ പരസ്യ നിരക്കുകൾ വാഗ്ദാനം ചെയ്യുന്നു.
ഇത് ദീർഘകാലത്തേക്ക് കൂടുതൽ പരസ്യദാതാക്കളെ ആകർഷിക്കുന്നു. പരസ്യം കൂടാതെ മുകേഷ് അംബാനിക്ക് ഡാറ്റാ ചെലവിൽ നിന്നും പണമെത്തുന്നു. ടെലികോം സേവനമായ ജിയോ കുറഞ്ഞ് നിരക്കിൽ അതിവേഗ 5ജി സേവനം വാഗ്ദാനം ചെയ്യുന്നു. രാജ്യത്തെ ഏറ്റവും വലിയ ടെലികോം ഓപ്പറേറ്ററാണ് മുകേഷ് അംബാനിയുടെ ജിയോ.
കൂടുതൽ ഉപയോക്താക്കളും ഐപിഎൽ ഓൺലൈനിൽ സ്ട്രീം ചെയ്യുന്നതിനാൽ, അംബാനിയുടെ ജിയോ അതിൽ നിന്ന് കൂടുതൽ നേട്ടമുണ്ടാക്കുന്നു. ഐപിഎൽ 2024 -ന് മുന്നോടിയായി റിലയൻസ് ജിയോ പ്രത്യേക പ്ലാനുകൾ അവതരിപ്പിച്ചിരുന്നു.
ഇതു കമ്പനിയുടെ വരുമാനം ഗണ്യമായി വർധിപ്പിച്ചെന്ന് ഇന്നലെ പുറത്തുവന്ന വരുമാനകണക്കുകളും വ്യക്തമാക്കുന്നു.
റിലയൻസ് ജിയോ വാർഷികാടിസ്ഥാനത്തിൽ 13% വരുമാന വളർച്ച നേടി. 28,871 കോടി രൂപയാണ് കമ്പനിയുടെ വരുമാനം. ഇതേ കാലയളവിൽ എബിറ്റഡ 12 ശതമാനം ഉയർന്ന് 14,360 കോടി രൂപയിലെത്തി.
ഇക്കാലയളവിൽ അറ്റാദായവും 12 ശതമാനം വർധിച്ച് 5,583 കോടി രൂപയിലെത്തി.
