അമ്പലപ്പുഴ: ആലപ്പുഴ ജില്ലയുടെ തലവര മാറ്റാൻപോകുന്ന തീരുമാനത്തിന് പച്ചക്കൊടി വീശി കേന്ദ്ര മന്ത്രിസഭ. അമ്പലപ്പുഴ – തുറവൂർ തീരദേശ റെയിൽപ്പാത ഇരട്ടിപ്പിക്കലിന് കേന്ദ്രം അന്തിമാനുമതി നൽകി.
സ്ഥലമേറ്റെടുക്കുന്നതിനുള്ള തുക കേന്ദ്രം സംസ്ഥാന റവന്യൂവകുപ്പിന് കൈമാറുന്നതോടെ സ്ഥലമേറ്റെടുത്ത് പാത ഇരിട്ടിപ്പിക്കുന്ന നടപടികൾ ആരംഭിക്കും.
ആലപ്പുഴയുടെ വികസന ചരിത്രത്തിലെ ഏറ്റവും വലിയ ഒരു മുന്നേറ്റത്തിന് ആണ് അന്തിമ അംഗീകാരം ലഭിച്ചിരിക്കുന്നതെന്ന് ആലപ്പുഴ എംപി എഎം ആരിഫ് പറഞ്ഞു.
രണ്ടര വർഷത്തിനുള്ളിൽ കായംകുളം മുതൽ എറണാകുളം വരെയുള്ള തീരദേശ റെയിൽവേ പാത ഇരട്ടിപ്പിക്കൽ പൂർത്തിയാകും. ഇന്ന് കോട്ടയം വഴി മറ്റും സർവീസ് നടത്തുന്ന നിരവധി ട്രെയിനുകൾക്ക് ആലപ്പുഴ വഴി ഓടുന്നതിന് ഇതോടെ അവസരം ഒരുങ്ങും.
നിരവധി പുതിയ ട്രെയിനുകൾ ഈ റൂട്ടിൽ വരും. ആലപ്പുഴ ടൂറിസം ഡെസ്റ്റിനേഷൻ ഡെവലപ്മെന്‍റിനും ഇത് സഹായകമാകും. ട്രെയിനുകൾ പലതിനും ആലപ്പുഴയിലെ പല സ്ഥലങ്ങളിലും സ്റ്റോപ്പ് അനുവദിക്കുന്നതിന് സഹായകരമാകുമെന്നും എഎം ആരിഫ് പറഞ്ഞു.
സംസ്ഥാന സർക്കാർ ഭൂമി ഏറ്റെടുത്ത് നൽകിയാൽ മാത്രമേ പാത ഇരട്ടിപ്പിക്കുകയുള്ളൂ എന്നതായിരുന്നു റെയിൽവേ മന്ത്രാലയം നേരത്തെ പറഞ്ഞിരുന്നത്.
തങ്ങളുടെ സംസ്ഥാനങ്ങളിൽ പോലും സംസ്ഥാന സർക്കാർ ഭൂമി ഏറ്റെടുത്ത് നൽകണമെന്ന നിബന്ധന വച്ചിരിക്കുകയാണെന്നായിരുന്നു ബിജെപി മന്ത്രിമാരുടെ മറുപടി. ബിജെപി ഭരിക്കുന്ന സ്ഥലങ്ങളിലും അത് നിർബന്ധമാക്കിയിരുന്നു.
ആ വ്യവസ്ഥ ഒഴിവാക്കി റെയിൽവേ ബോർഡിന്‍റെ സ്വന്തം ചിലവിൽ പാത ഇരട്ടിപ്പിക്കാൻ അനുമതി നേടുന്നതിനാണ് നിരന്തര പരിശ്രമം നടത്തിയതെന്നും ആലപ്പുഴ എംപി പറയുന്നു. റെയിൽവേ ബോർഡിന്‍റെ തന്നെ ചെലവിൽതന്നെ 2660 കോടിയുടെ വികസനമാണ് യാഥാർഥ്യമാകാൻ പോകുന്നത്.
തീരദേശപാത ഇരട്ടിപ്പിക്കലിന്‍റെ ആദ്യഘട്ടം ഹരിപ്പാട്‌ – അമ്പലപ്പുഴ പാത ഇരട്ടിപ്പിക്കൽ പൂർത്തിയാക്കിയിട്ടുണ്ട്. 1000 കോടി രൂപയ്‌ക്ക്‌ മുകളിൽ ചെലവ്‌ വരുന്ന പദ്ധതിയായതിനാൽ നീതി ആയോഗിന്‍റെയും കേന്ദ്രമന്ത്രിസഭയുടെയും അനുമതി ആവശ്യമായിരുന്നു.
തുറവൂർ – കുമ്പളം, കുമ്പളം – എറണാകുളം ഭാഗത്തെ സ്ഥലമേറ്റെടുപ്പ്‌ നിലവിൽ പുരോഗമിക്കുകയാണ്‌.
കേന്ദ്ര ഇടക്കാല ബജറ്റിൽ അമ്പലപ്പുഴ – തുറവൂർപാത ഇരട്ടിപ്പിക്കലിന് 500 കോടിരൂപയും അനുവദിച്ചിരുന്നു.
