ഡൽഹി: യുഎസ് പ്രൈവറ്റ് ഇക്വിറ്റി പ്രമുഖരായ കെകെആറും ടോപ്പ് പെൻഷൻ ഫണ്ടായ കനേഡിയൻ പെൻഷൻ പ്ലാൻ ഇൻവെസ്റ്റ്‌മെന്റ് ബോർഡും (സിപിപിഐബി) നിലവിൽ ഇന്ത്യയിലെ ഏറ്റവും വലിയ ടെലികോം ഇൻഫ്രാസ്ട്രക്ചർ സ്ഥാപനമായ ഇൻഡസ് ടവേഴ്‌സിലെ (മുമ്പ് ഭാരതി ഇൻഫ്രാടെൽ എന്നറിയപ്പെട്ടിരുന്നു) അവരുടെ ഓഹരികൾ വിൽക്കാനുള്ള ഓപ്ഷനുകൾ നോക്കുകായാണെന്ന് അടുത്ത വൃത്തങ്ങൾ അറിയിച്ചു. ഈ രണ്ട് സ്ഥാപനങ്ങളും ഇപ്പോൾ കുറച്ച് വർഷങ്ങളായി ഇൻഡസ് ടവേഴ്‌സിലെ നിലവിലുള്ള ഓഹരികൾ വിൽക്കാൻ താൽപ്പര്യപ്പെടുന്നതായും, അതിനായി അവർ അനുയോജ്യമായ അവസരം തേടുകയാണെന്നും കൂടുതൽ വിശദാംശങ്ങൾ പങ്ക് വയ്ക്കാതെ അടുത്ത വൃത്തങ്ങൾ പറഞ്ഞു.
നിലവിൽ ഇൻഡസ് ടവേഴ്‌സിൽ സിപിപിഐബിക്ക് 2.15 ശതമാനം ഓഹരിയും കെകെആറിന് 4.85 ശതമാനം ഓഹരിയുമുണ്ട്. ഇൻഡസ് ടവേഴ്സിന്റെ വിപണി മൂല്യത്തിന്റെ അടിസ്ഥാനത്തിൽ ഇവരുടെ 7 ശതമാനം ഓഹരികളുടെ മൂല്യം 3,952 കോടി രൂപയാണ്. ഇവർക്ക് പുറമെ ഭാരതി ഗ്രൂപ്പും വോഡഫോൺ ഗ്രൂപ്പും ഉൾപ്പെടുന്ന പ്രൊമോട്ടർ വിഭാഗത്തിന് കമ്പനിയിൽ 67.49 ശതമാനം ഓഹരിയുണ്ട്. 2017-ൽ ഭാരതി എയർടെൽ ഭാരതി ഇൻഫ്രാടെലിന്റെ 10.3 ശതമാനം ഓഹരികൾ സിപിപിഐബി, കെകെആർ എന്നിവയുൾപ്പെടെയുള്ള നിക്ഷേപകരുടെ കൺസോർഷ്യത്തിന് വിറ്റിരുന്നു.
ഇതിന് പുറമെ ഈ വർഷം ആദ്യം വോഡഫോൺ ഗ്രൂപ്പ് ഇൻഡസ് ടവേഴ്സിന്റെ 7.1 ശതമാനം ഓഹരികൾ വിറ്റിരുന്നു.
