ചങ്ങനാശേരി: ക്രൗൺ പ്ലാസ കൊച്ചി ഉടമകളായ കെജിഎ ഗ്രൂപ്പിന്റെ ഭാഗമായി പുതിയ മാൾ ചങ്ങനാശ്ശേരിയിൽ ആരംഭിക്കുന്നു. അഞ്ചു ലക്ഷം ചതുരശ്ര അടി വിസ്തീർണത്തിലാണ് പ്രോജക്റ്റ്. നിർമാണം പൂർത്തിയാകുന്നതോടെ കെജിഎ മാൾ ചങ്ങനാശ്ശേരി നഗരത്തിലെ തിരക്കേറിയ ഒരു വിനോദ കേന്ദ്ര കൂടിയായി മാറും. ഗ്രൂപ്പിൻ്റെ ആദ്യത്തെ ശ്രദ്ധേയമായ പ്രോജക്റ്റ് ക്രൗൺ പ്ലാസയാണ്.
ചങ്ങനാശേരി എസ്ബി കോളേജിന് സമീപം നിർമാണം പുരോഗമിക്കുന്ന മാളിൻ്റെ നിർമാണം അടുത്ത വർഷത്തോടെ പൂർത്തിയായേക്കും. കെജിഎ ഗ്രൂപ്പിൻ്റെ വെബ്സൈറ്റ് അനുസരിച്ച് ഹൈ എൻഡ് ബുട്ടിക്കുകളും ഹൈപ്പർമാർക്കറ്റും ഉള്ള ഷോപ്പിംഗ്, റീട്ടെയിൽ ഏരിയക്ക് പുറമെ, കൺവെൻഷൻ സെൻ്റർ, 5 സ്ക്രീൻ മൾട്ടിപ്ലക്സ് തിയറ്റർ, 60 മുറികളുള്ള ഹോട്ടൽ സൗകര്യം എന്നിവയും ഇവിടെ ക്രമീകരിക്കുന്നുണ്ട്. 800 പേർക്ക് ഭക്ഷണം കഴിക്കാനാകുന്ന വലിയ ഫൂഡ് കോർട്ടും 1000 പേരിൽ കൂടുതൽ പേർക്ക് ആതിഥേയത്വം ഒരുക്കാൻ കഴിയുന്ന കൺവെൻഷൻ സെൻ്ററും കോട്ടയത്തിന് സഹായകരമാകും.
കെജിഎ ഇൻ്റർനാഷണൽ ട്രേഡ്‌സ് പ്രൈവറ്റ് ലിമിറ്റഡ് കോട്ടയത്തെ കെജിഎ മാളിനായി 216 കോടി രൂപയാണ് ചെലവഴിക്കുന്നതെന്ന് റിപ്പോ‍ർട്ടുകളുണ്ട്. കോട്ടയം നിവാസികൾക്കും സന്ദർശകർക്കും സമഗ്രമായ ഷോപ്പിംഗ് അനുഭവങ്ങൾ നൽകുന്ന മാളാണ് വിഭാവനം ചെയ്യുന്നത്. വിപുലമായ റീട്ടെയിൽ ഔട്ട്ലെറ്റുകൾ മാളിലുണ്ട്. മികച്ച ബുട്ടിക്കുകൾ മുതൽ ദൈനംദിന അവശ്യങ്ങൾ വരെയുള്ള എല്ലാ വസ്തുക്കളും ഇവിടെ ലഭിക്കും. എല്ലാ ഷോപ്പിംഗ് ആവശ്യങ്ങൾക്കുമായുള്ള പരിഹാരം എന്ന നിലയിലാണ് ഈ മാളും വിഭാവനം ചെയ്യുന്നത്. കോട്ടയത്ത് മൾട്ടിപ്ലക്സ് പ്രധാന ആകർഷണമായിരിക്കും. നിരവധി സ്‌ക്രീനുകളിലെ മൾട്ടിപ്ലക്സ് ശ്രദ്ധേയമാകും. കോർപ്പറേറ്റ് മീറ്റിംഗുകൾ മുതൽ വൈവിധ്യമാർന്ന ഇവൻ്റുകൾ സംഘടിപ്പിക്കുന്നതിനുള്ള ബാങ്ക്വറ്റ് ഹാളും മാളിൽ ഉണ്ടായിരിക്കും.
