ന്യൂഡൽഹി: ഐഡിബിഐ ബാങ്കിന്റെ പ്രമോട്ടറായ സർക്കാർ ഉടമസ്ഥതയിലുള്ള എൽഐസി, ബാങ്കാഷുറൻസിന്റെ നേട്ടങ്ങൾ പ്രയോജനപ്പെടുത്തുന്നതിനായി ബാങ്കിലുള്ള തങ്ങളുടെ ഓഹരിയുടെ ഒരു ഭാഗം നിലനിർത്താൻ പദ്ധതിയിടുന്നതായി അറിയിച്ചു.
“സർക്കാരിനൊപ്പം ലൈഫ് ഇൻഷുറൻസ് കോർപ്പറേഷനും (എൽഐസി) ഐഡിബിഐ ബാങ്കിലെ ഓഹരികൾ വിറ്റഴിക്കും, എന്നാൽ പൂർണമായി പുറത്തുപോകാൻ സാധ്യതയില്ല,” എൽഐസി ചെയർമാൻ സിദ്ധാർത്ഥ മൊഹന്തി പിടിഐക്ക് നൽകിയ അഭിമുഖത്തിൽ പറഞ്ഞു.
“ഐഡിബിഐ ബാങ്കാണ് ബാങ്കാഷുറൻസിൽ ഞങ്ങളുടെ ഒന്നാം നമ്പർ പങ്കാളിയെന്ന് ഞങ്ങൾ വ്യക്തമാക്കിയിട്ടുണ്ട്. ബാങ്കാഷ്വറൻസ് പങ്കാളിത്തം തുടരുന്നതിന് ഐഡിബിഐ ബാങ്കിലെ കുറച്ച് ഓഹരികൾ ഞങ്ങൾ നിലനിർത്തും,” അദ്ദേഹം പറഞ്ഞു.
ഐഡിബിഐ ബാങ്കിൽ 45 ശതമാനത്തിലധികം ഓഹരികളുള്ള സർക്കാരും 49.24 ശതമാനം ഓഹരി പങ്കാളിത്തമുള്ള ലൈഫ് ഇൻഷുറൻസ് ഭീമൻ എൽഐസിയും സംയുക്തമായി 60.7 ശതമാനം ഓഹരി വിൽക്കാൻ തീരുമാനിച്ചിരുന്നു.
82,75,90,885 അധിക ഇക്വിറ്റി ഷെയറുകൾ ഏറ്റെടുത്തതിന് ശേഷം 2019 ജനുവരി 21 മുതൽ ഐഡിബിഐ ബാങ്ക് എൽഐസിയുടെ അനുബന്ധ സ്ഥാപനമായി മാറിയിരുന്നു.
2020 ഡിസംബർ 19-ന്, യോഗ്യതയുള്ള ഇൻസ്റ്റിറ്റിയൂഷണൽ പ്ലേസ്‌മെന്റിന് (ക്യുഐപി) കീഴിൽ ബാങ്ക് അധിക ഇക്വിറ്റി ഷെയറുകൾ ഇഷ്യൂ ചെയ്തതിനെത്തുടർന്ന് എൽഐസി ഷെയർഹോൾഡിംഗ് 49.24 ശതമാനമായി കുറച്ചതിനാൽ ഐഡിബിഐ ബാങ്കിനെ ഒരു അസോസിയേറ്റ് കമ്പനിയായി പുനഃക്രമീകരിച്ചു.
ഐഡിബിഐ ബാങ്കിന്റെ ഓഹരി വിൽപ്പന 2024 മാർച്ചോടെ പൂർത്തിയായേക്കില്ല എന്ന് ഈ മാസം ആദ്യം, ഡിപ്പാർട്ട്‌മെന്റ് ഓഫ് ഇൻവെസ്റ്റ്‌മെന്റ് ആൻഡ് പബ്ലിക് അസറ്റ് മോണിറ്റൈസേഷൻ (ഡിഐപിഎഎം) സെക്രട്ടറി തുഹിൻ കാന്ത പാണ്ഡെ പറഞ്ഞിരുന്നു.
