മുംബൈ: ഗുരുഗ്രാം ആസ്ഥാനമായുള്ള ലോജിസ്റ്റിക് സ്ഥാപനമായ റിവിഗോ സർവീസസിന്റെ ബി2ബി എക്സ്പ്രസ് ബിസിനസ് ഏറ്റെടുക്കുന്നതായി പ്രഖ്യാപിച്ച് മഹീന്ദ്ര ലോജിസ്റ്റിക്‌സ്. ഇത് ഈ മേഖലയിൽ കമ്പനിയെ അതിന്റെ കഴിവുകൾ ത്വരിതപ്പെടുത്താൻ സഹായിക്കും.
റിവിഗോയുടെ ബി2ബി എക്സ്പ്രസ് ബിസിനസിന്റെയും ടെക്നോളജി പ്ലാറ്റ്‌ഫോമിന്റെയും ഉപഭോക്താക്കളും ടീമും ആസ്തികളും ഉൾപ്പെടെയുള്ള ബിസിനസ് ട്രാൻസ്ഫർ കരാർ (ബിടിഎ) വഴിയാണ് കമ്പനി ഏറ്റെടുക്കൽ നടത്തുന്നതെന്ന് മഹീന്ദ്ര ലോജിസ്റ്റിക്‌സ് (എംഎൽഎൽ) പ്രസ്താവനയിൽ പറഞ്ഞു. എന്നിരുന്നാലും നിർദിഷ്ട ഇടപാടിന് ശേഷവും റിവിഗോ അതിന്റെ ട്രക്ക് ഫ്ലീറ്റും ഫുൾ ട്രക്ക് ലോഡ് (FTL) ബിസിനസ് പ്രവർത്തിപ്പിക്കുന്നത് തുടരും.
ശക്തമായ ക്ലയന്റ് ബേസും ഫുൾ സർവീസ് ടെക്നോളജി സ്യൂട്ടും ഉള്ള ഒരു പാൻ-ഇന്ത്യ ബി2ബി എക്സ്പ്രസ് നെറ്റ്‌വർക്കാണ് റിവിഗോ പ്രവർത്തിപ്പിക്കുന്നത്. അതിന്റെ എക്സ്പ്രസ് സേവനം നിലവിൽ രാജ്യത്തുടനീളമുള്ള 19,000 പിൻ കോഡുകളിൽ ലഭ്യമാണ്. ഇത് മഹീന്ദ്ര ലോജിസ്റ്റിക്‌സിന്റെ എക്സ്പ്രസ് ബിസിനസ് കഴിവിന് കാര്യമായ കരുത്ത് പകരുമെന്ന് കമ്പനി അറിയിച്ചു.
മഹീന്ദ്ര ലോജിസ്റ്റിക്‌സ് അതിന്റെ തേർഡ് പാർട്ടി ലോജിസ്റ്റിക്‌സ്, ഫുൾ ട്രക്ക്-ലോഡ് ട്രാൻസ്‌പോർട്ടേഷൻ, വെയർഹൗസിംഗ്, ക്രോസ് ബോർഡർ ലോജിസ്റ്റിക്‌സ്, ലാസ്റ്റ് മൈൽ, ബി2ബി എക്സ്പ്രസ് ലോജിസ്റ്റിക്‌സ് സേവനങ്ങൾ എന്നിവ സംയോജിപ്പിച്ച് സപ്ലൈ ചെയിൻ സൊല്യൂഷനുകൾ വാഗ്ദാനം ചെയ്യുന്നു.
