ഇന്ത്യയുടെ അയൽ രാജ്യമാണ് മാലിദ്വീപ്. സമീപ കാലത്ത് വാർത്തകളിൽ നിറ‍ഞ്ഞു നിന്ന കുഞ്ഞൻ ദ്വീപ് രാഷ്ട്രമാണിത്. ഇന്ത്യൻ പ്രധാന മന്ത്രി നരേന്ദ്ര മോദി ലക്ഷദ്വീപ് സന്ദർശിച്ചതിനെ തുടർന്ന് മാലിദ്വീപ് മന്ത്രിമാർ അധിക്ഷേപ പരാമർശം നടത്തിയത് വലിയ വിവാദങ്ങൾക്ക് വഴി വെച്ചിരുന്നു.
എന്നാൽ മൂന്നാം നരേന്ദ്ര മോദി സർക്കാരിന്റെ സത്യപ്രതിജ്ഞയ്ക്ക് മാലിദ്വീപ് പ്രസിഡന്റ് മുഹമ്മദ് മൊയ്സു എത്തിയത് മഞ്ഞുരുക്കത്തിന്റെ സൂചനയായി. നിലവിൽ മാലിദ്വീപിന്റെ സാമ്പത്തിക സ്ഥിതി ഗുരുതരമായ പ്രതിസന്ധി നേരിടുകയാണെന്ന് വേൾഡ് ബാങ്ക് ചൂണ്ടിക്കാട്ടുന്നു.
മാലിദ്വീപ്, ശ്രീലങ്ക, നേപ്പാൾ എന്നിവയുടെ കൺട്രി ഡയറക്ടറായ ഫാരിസ്.എച്ച് ഹദാദ് സെർവോസ്, മാലിദ്വീപിന് മുന്നറിയിപ്പ് നൽകിക്കഴിഞ്ഞു. വാർഷികാടിസ്ഥാനത്തിൽ വായ്പകൾ കൈകാര്യം ചെയ്യുന്നതിന് ഈ വർഷവും, അടുത്ത വർഷവും 512 ദശലക്ഷം യു.എസ് ഡോളറാണ് ആവശ്യമുള്ളത്.
എന്നാൽ 2026ൽ ഇത് 1.07 ബില്യൺ ഡോളറുകളായി വർധിക്കുമെന്നാണ് ജാഗ്രതാ നിർദേശം നൽകിയിരിക്കുന്നത്.
മാലിദ്വീപ് നേരിടുന്ന സാമ്പത്തിക പ്രതിസന്ധിയെക്കുറിച്ച് തന്റെ ഔദ്യോഗിക എക്സ് പ്ലാറ്റ്ഫോമിലാണ് ഹദാദ് പോസ്റ്റ് ചെയ്തതത്. വർഷങ്ങളായി മാലിദ്വീപ് വരുമാനത്തേക്കാൾ കൂടുതൽ ചിലവഴിക്കുകയാണ്.
ചിലവ് ഉയർന്നു നിൽക്കുന്നതും, സബ്സിഡികളും ധനക്കമ്മി വർധിപ്പിച്ചു. ഇത് ഗുരുതരമായ സാമ്പത്തിക സാഹചര്യത്തിലേക്ക് രാജ്യത്തെ എത്തിച്ചു.കടബാധ്യതയിലൂടെ വലിയ റിസ്കാണ് രാജ്യം നേരിടുന്നതെന്നും അദ്ദേഹം പറഞ്ഞു.
സാമ്പത്തിക സ്ഥിതി മെച്ചപ്പെടുത്താൻ പല മാർഗങ്ങളും ഹദാദ് മുന്നോട്ടു വെക്കുന്നു. സബ്സിഡികൾ എടുത്തു കളയുക, പൊതുമേഖലാ കമ്പനികളുടെ ദൗർബല്യങ്ങൾ പരിഹരിക്കുക, ആരോഗ്യമേഖലയിലെ ചിലവഴിക്കലുകൾ കാര്യക്ഷമമാക്കുക, പൊതു നിക്ഷേപ പരിപാടികൾ ആവിഷ്ക്കരിക്കുക തുടങ്ങിയ നിർദേശങ്ങളാണ് മാലിദ്വീപിലെ ധനമന്ത്രാലയം പ്രസിദ്ധീകരിച്ച പാദ അടിസ്ഥാനത്തിലുള്ള ബുള്ളറ്റിൻ വിവരങ്ങൾ പ്രകാരം രാജ്യത്തിന്റെ പൊതു കടം 8.2 ബില്യൺ ഡോളറാണ്. ഇത് രാജ്യത്തിന്റെ ജി.ഡി.പിയുടെ 110% എന്ന തോതാണ്.
2024 വർഷത്തിന്റെ ആദ്യ പാദത്തിൽ മാത്രം 90.8 മില്യൺ ഡോളർ കടം വർധിച്ചു. 2023 വർഷത്തിന്റെ അവസാനത്തിൽ 8.09 ബില്യൺ എന്ന തോതിലായിരുന്നു കടം.
ടൂറിസം പ്രധാന വരുമാന മാർഗമായ രാജ്യത്തിന് 2020 കോവിഡ് കാലം വലിയ തിരിച്ചടികൾ നൽകി.
ഇതിന് ശേഷം 2023 വർഷത്തിലാണ് തിരിച്ചു കയറാൻ സാധിച്ചത്. ടൂറിസം വരുമാനം കാര്യമായി വർധിച്ചെങ്കിൽ മാത്രമേ രാജ്യത്തിന് ജി.ഡി.പി വളർച്ച നേടാൻ സാധിക്കൂ.
എന്നാൽ ഇതിനിടെ ലക്ഷദ്വീപ് ഉൾപ്പെടെയുള്ള സമീപ ദ്വീപുകൾ ടൂറിസം മേഖലയിൽ സഞ്ചാരികളെ ആകർഷിക്കാൻ കൂടുതൽ ശ്രമങ്ങൾ നടത്തുകയാണ്. ഇതും മാലിദ്വീപിനെ സംബന്ധിച്ച് വെല്ലു വിളിയാണ്.
