മുംബൈ: സെക്യൂരിറ്റീസ് മാര്‍ക്കറ്റുമായി ബന്ധപ്പെട്ടല്ലാതെ മറ്റു ബിസിനസ്സുകള്‍ നടത്താന്‍ മര്‍ച്ചന്റ് ബാങ്കര്‍മാര്‍ക്ക് അനുമതിയില്ലെന്ന് സെക്യൂരിറ്റീസ് ആന്റ് എക്‌സ്‌ചേഞ്ച് ബോര്‍ഡ് ഓഫ് ഇന്ത്യ (സെബി). പഞ്ചാബ് നാഷണല്‍ ബാങ്കിന്റെ (പിഎന്‍ബി) വിഭാഗമായ പിഎന്‍ബി ഇന്‍വെസ്റ്റ്‌മെന്റ് സര്‍വീസസിന് നല്‍കിയ അനൗപചാരിക മാര്‍ഗ്ഗനിര്‍ദ്ദേശങ്ങളിലാണ് സെബി ഇക്കാര്യം പറഞ്ഞത്. കേസുകളുടെ അടിസ്ഥാനത്തില്‍ വീക്ഷണം മാറാമെന്നും മാര്‍ക്കറ്റ് റെഗുലേറ്റര്‍ സൂചിപ്പിച്ചു.
പിഎന്‍ബിക്ക് വേണ്ടി ഇന്‍വെസ്റ്റ്‌മെന്റ് സര്‍വീസസ്, ഹോം ലോണുകള്‍, കാര്‍ ലോണുകള്‍ തുടങ്ങിയ റീട്ടെയില്‍ ഉല്‍പ്പന്നങ്ങള്‍ വിപണനം ചെയ്യാന്‍ ഡയറക്ട് ഏജന്റായി പ്രവര്‍ത്തിക്കാന്‍ സാധിക്കുമോ എന്ന കാര്യത്തില്‍ പിഎന്‍ബി ഇന്‍വെസ്റ്റ്‌മെന്റ് സെബിയോട് വിശദീകരണം തേടിയിരുന്നു. അതിനുള്ള മറുപടിയിലാണ് സെബി ഇക്കാര്യം വ്യക്തമാക്കിയത്.
സെക്യൂരിറ്റീസ് മാര്‍ക്കറ്റുമായി ബന്ധപ്പെട്ടല്ലാതെ മറ്റൊരു ബിസിനസിലും മര്‍ച്ചന്റ് ബാങ്കര്‍മാര്‍ക്ക് പങ്കെടുക്കാന്‍ കഴിയില്ലെന്ന് 13എ മര്‍ച്ചന്റ് ബാങ്കര്‍ റെഗുലേഷന്‍ ഉദ്ദരിച്ച് സെബി പറഞ്ഞു.
