ഓപ്പണ്‍ സോഴ്സ് ലാർജ് ലാംഗ്വേജ് മോഡലായ ലാമ ഡൗണ്‍ലോഡ് ചെയ്തത് 100 കോടിയിലേറെ ആളുകള്‍. വാട്സാപ്പ്, ഇൻസ്റ്റഗ്രാം, ഫേസ്ബുക്ക് എന്നീ പ്ലാറ്റ്ഫോമുകളിലെ മെറ്റ എഐ ചാറ്റ്ബോട്ടിന് ശക്തിപകരുന്നത് ലാമ എഐ മോഡലാണ്.
ഒരു ബ്ലോഗ് പോസ്റ്റിലാണ് മെറ്റ ഈ നേട്ടം പ്രഖ്യാപിച്ചത്. ഇതുവഴി എഐ എല്ലാവർക്കും ലഭ്യമാക്കുകയെന്ന നേട്ടം കൈവരിക്കാനാകുമെന്നും കമ്ബനി പറയുന്നു.
ലാമ എഐ എങ്ങനെയെല്ലാമാണ് വിവിധ കമ്പനികള്‍ അവരുടെ ഉത്പന്നങ്ങളും സേവനങ്ങളും മെച്ചപ്പെടുത്തുന്നതിനായി ഉപയോഗപ്പെടുത്തുന്നത് എന്നതിന് ചില ഉദാഹരണങ്ങളും മെറ്റ എടുത്തു പറഞ്ഞു.
ലോകവ്യാപകമായി കോടിക്കണക്കിന് ഉപഭോക്താക്കളുള്ള മ്യൂസിക് സ്ട്രീമിങ് പ്ലാറ്റ്പോമായ സ്പോടിഫൈ പുതിയ പാട്ടുകള്‍, ആർട്ടിസ്റ്റുകള്‍, ഓഡിയോ ബുക്കുകള്‍, പോഡ്കാസ്റ്റുകള്‍ എന്നിവയുടെ കസ്റ്റമൈസ് ചെയ്ത റെക്കമെന്റേഷനുകള്‍ നല്‍കുന്നതിനായാണ് മെറ്റ എഐ ഉപയോഗിക്കുന്നത്.
ഇതുവഴി ശ്രോതാക്കള്‍ക്ക് അവർക്കിണങ്ങിയ പാട്ടുകള്‍ കണ്ടെത്താനാവുന്നു. സ്പോട്ടിഫൈയുടെ എഐ ഡിജെ ഫീച്ചറിന് പിന്നിലും മെറ്റ എഐ ആണ്.
ഓസ്റ്റിൻ ലാമ ഇംപാക്‌ട് ഹാക്കത്തോണിലെ വിജയികള്‍ ഈ എഐ മോഡല്‍ ഉപയോഗിച്ച്‌ സാംസ്കാരിക കേന്ദ്രങ്ങളും, സാഹിത്യവും കലയുമെല്ലാം കണ്ടെത്തുന്നതിനും പ്രാദേശിക ബിസിനസുകള്‍ കണ്ടെത്തുന്നതിനും സഹായിക്കുന്ന ഒരു ആപ്ലിക്കേഷൻ വികസിപ്പിച്ചെടുത്തിരുന്നു.
ഡബ്ബ്ഡ് അണ്‍വെയ്ല്‍ എന്ന് വിളിക്കുന്ന ഈ ആപ്പ് സ്വാഭാവിക ഭാഷ കൈകാര്യം ചെയ്യാനുള്ള ലാമയുടെ കഴിവ് പ്രയോജനപ്പെടുത്തികൊണ്ട് സ്ഥലങ്ങള്‍ തിരിച്ചറിയാനും ചുമർചിത്രങ്ങള്‍, തെരുവുകള്‍, ശില്‍പങ്ങള്‍ എന്നിവയുടെ സാംസ്കാരികവും ചരിത്രപരവുമായ പ്രാധാന്യം മനസിലാക്കാനും സഹായിക്കുന്നതാണ്.
വരും മാസങ്ങളില്‍ ലാമയ്ക്ക് കൂടുതല്‍ കഴിവുകള്‍ നല്‍കാനുള്ള ജോലികളിലാണ് മെറ്റ. ഡീപ്പ് സീക്ക് ആർ1, ഓപ്പണ്‍ എഐ ഒ3 മിനി എന്നിവയോട് മത്സരിക്കുന്ന റീസണിങ് മോഡലുകള്‍ ഇക്കൂട്ടത്തിലുണ്ടാവുമെന്നാണ് പ്രതീക്ഷിക്കുന്നത്.
ഏപ്രില്‍ 29 ന് ആദ്യമായി ലാമാകോണ്‍ എന്ന പേരില്‍ ഒരു എഐ കോണ്‍ഫറൻസും കമ്പനി സംഘടിപ്പിക്കുന്നുണ്ട്. കൂടുതല്‍ മെച്ചപ്പെട്ട എഐ മോഡലുകളെ കോണ്‍ഫറൻസില്‍ പരിചയപ്പെടുത്തിയേക്കും.
