മുംബൈ: 2000 രൂപ നോട്ടുകളിൽ 97 ശതമാനവും ബാങ്കിംഗ് സംവിധാനത്തിലേക്ക് തിരിച്ചെത്തിയെന്നും ഏകദേശം 10,000 കോടി രൂപയുടെ നോട്ടുകൾ മാത്രമാണ് ഇപ്പോഴും പൊതുജനങ്ങളുടെ പക്കലുള്ളതെന്നും റിസർവ് ബാങ്ക് ഓഫ് ഇന്ത്യ (ആർബിഐ) അറിയിച്ചു.
മെയ് 19നാണ് 2000 രൂപ നോട്ടുകൾ വിനിമയത്തിൽ നിന്ന് പിൻവലിച്ചതായി ആർബിഐ പ്രഖ്യാപിച്ചത്.
2000 രൂപ നോട്ടുകൾ പിൻവലിച്ചതായി പ്രഖ്യാപിച്ച 2023 മെയ് 19ന് വ്യാപാരം അവസാനിച്ചപ്പോൾ 3.56 ലക്ഷം കോടി രൂപയായിരുന്നു വിപണിയിലുണ്ടായിരുന്ന 2000 രൂപ നോട്ടുകളുടെ ആകെ മൂല്യമെങ്കിൽ 2023 ഒക്ടോബർ 31-ന് ബിസിനസ്സ് അവസാനിക്കുമ്പോൾ അത് 0.10 ലക്ഷം കോടി രൂപയായി കുറഞ്ഞു,” ആർബിഐ ഒരു സർക്കുലറിൽ പറഞ്ഞു.
അങ്ങനെ, 2023 മെയ് 19 വരെ പ്രചാരത്തിലുണ്ടായിരുന്ന 2000 രൂപ നോട്ടുകളിൽ 97 ശതമാനവും തിരിച്ചെത്തിയതായി സെൻട്രൽ ബാങ്ക് അറിയിച്ചു. രാജ്യത്തുടനീളമുള്ള 19 ആർബിഐ ഓഫീസുകളിൽ പൊതുജനങ്ങൾക്ക് 2,000 രൂപ ബാങ്ക് നോട്ടുകൾ നിക്ഷേപിക്കാനും/അല്ലെങ്കിൽ മാറ്റാനും കഴിയും.
“ഇന്ത്യ പോസ്റ്റിന്റെ പോസ്റ്റ് ഓഫീസുകൾ വഴി 2,000 രൂപ ബാങ്ക് നോട്ടുകൾ അയയ്‌ക്കുന്നതിനുള്ള സൗകര്യം പ്രയോജനപ്പെടുത്താൻ പൊതുജനങ്ങളോട് അഭ്യർത്ഥിക്കുന്നു. 2,000 രൂപ ബാങ്ക് നോട്ടുകൾ നിക്ഷേപിക്കുന്നതിനും മാറ്റുന്നതിനും ആർബിഐ ഓഫീസുകളിലേക്കുള്ള യാത്രയുടെ ആവശ്യകത ഇത് ഒഴിവാക്കും, ”സെൻട്രൽ ബാങ്ക് പറഞ്ഞു.
2000 രൂപാ നോട്ടുകൾ കൈവശം വച്ചിരിക്കുന്ന പൊതുജനങ്ങളോടും സ്ഥാപനങ്ങളോടും സെപ്തംബർ 30-നകം അവ മാറുകയോ ബാങ്ക് അക്കൗണ്ടുകളിൽ നിക്ഷേപിക്കുകയോ ചെയ്യണമെന്ന് ആദ്യം ആവശ്യപ്പെട്ടിരുന്നു. പിന്നീട് സമയപരിധി ഒക്ടോബർ 7 വരെ നീട്ടി. ബാങ്ക് ശാഖകളിലെ നിക്ഷേപ-വിനിമയ സേവനങ്ങൾ ഒക്ടോബർ 7-ന് അവസാനിപ്പിച്ചു.
ഒക്ടോബർ 8 മുതൽ, ആർബിഐയുടെ 19 ഓഫീസുകളിൽ കറൻസി കൈമാറ്റം ചെയ്യാനോ തത്തുല്യമായ തുക അവരുടെ ബാങ്ക് അക്കൗണ്ടിലേക്ക് ക്രെഡിറ്റ് ചെയ്യാനോ ഉള്ള സൗകര്യം വ്യക്തികൾക്ക് നൽകിയിട്ടുണ്ട്.
അതേസമയം, 2000 രൂപ നോട്ടുകൾ മാറ്റുന്നതിനും നിക്ഷേപിക്കുന്നതിനുമായി ആർബിഐ ഓഫീസുകളിൽ പ്രവൃത്തി സമയങ്ങളിൽ നീണ്ട ക്യൂവാണ് അനുഭവപ്പെടുന്നത്.
2016 നവംബറിലാണ് അന്നത്തെ 1000, 500 രൂപ നോട്ടുകൾ അസാധുവാക്കിയതിനെ തുടർന്ന് 2000 രൂപ നോട്ടുകൾ അവതരിപ്പിച്ചത്.
