കൊളംബോ: ശ്രീലങ്കൻ ടെലികോം വ്യവസായത്തിൽ താൽപ്പര്യം പ്രകടിപ്പിച്ചു റിലയൻസ് ഇൻഡസ്ട്രീസ്. ശ്രീലങ്കൻ സർക്കാരിന്റെ ഉടമസ്ഥതയിലുള്ള ടെലികമ്മ്യൂണിക്കേഷൻ കമ്പനിയായ ശ്രീലങ്ക ടെലികോം പിഎൽസിയുടെ ഓഹരികൾ സ്വന്തമാക്കാനാണ് നീക്കം.
കമ്പനിയുടെ ഓഹരികൾ വാങ്ങാൻ താൽപ്പര്യം പ്രകടിപ്പിച്ച മൂന്നുപേരിൽ ഒരാൾ മുകേഷ് അംബാനിയുടെ ജിയോ പ്ലാറ്റ്ഫോം ജനുവരി 12 ന് ശ്രീലങ്കൻ സർക്കാർ പുറത്തിറക്കിയ പത്രക്കുറിപ്പിലാണ്, ജിയോ പ്ലാറ്റ്ഫോം, ഗോർട്ടൂൺ ഇന്റർനാഷണൽ ഇൻവെസ്റ്റ്മെന്റ് ഹോൾഡിംഗ് ലിമിറ്റഡ്, പെറ്റിഗോ കൊമേഴ്സിയോ ഇന്റർനാഷണൽ എൽഡിഎ എന്നീ പേരുകൾ വ്യക്തമാക്കിയിരിക്കുന്നത്.
ജിയോയുടെ പ്രവർത്തനങ്ങൾ രാജ്യത്തിനു പുറത്തേയ്ക്കു വ്യാപിപ്പിക്കുന്നതിന്റെ ഭാഗമാണ് നടപടി. റിപ്പോർട്ടുകൾ പ്രകാരം നിലവിൽ ശ്രീലങ്ക ടെലികോം പിഎൽസിയുടെ വിപണി മൂല്യം ഏകദേശം 4,000 കോടി രൂപയാണ്.
ആഗോളതലത്തിൽ ജിയോയെ വളർത്തികൊണ്ടുവരികയാണ് റിലയൻസിന്റെയും, മുകേഷ് അംബാനിയുടെയും ലക്ഷ്യം. 2023 നവംബർ 10 നാണ് ശ്രീലങ്കൻ സർക്കാർ തങ്ങളുടെ ഉടമസ്ഥതയിലുള്ള ടെലികോം കമ്പനിയുടെ ഓഹരികൾക്കായി ഓഫർ പ്രഖ്യാപിച്ചത്.
ഇന്ത്യയിൽ നിന്നു റിലയൻസ് ജിയോ താൽപ്പര്യം പ്രകടിപ്പിച്ചപ്പോൾ, മറ്റു ബിഡുകൾക്കു പിന്നിൽ ആംസ്റ്റർഡാമിലെ ഗ്ലോബൽ ടെലികമ്മ്യൂണിക്കേഷൻ ഹോൾഡിംഗ്സ്, പെറ്റിഗോ കൊമേർസിയോ ഇന്റർനാഷണൽ എൽഡിഎ എന്നിവരാണ്.
നിലവിൽ കമ്പനിയുടെ 49.5 ശതമാനം ഓഹരികൾ ശ്രീലങ്കൻ സർക്കാരിന്റെ ഉടമസ്ഥതയിലാണ്. അതേസമയം ആംസ്റ്റർഡാമിലെ ഗ്ലോബൽ ടെലികമ്മ്യൂണിക്കേഷൻസ് ഹോൾഡിംഗ്സിന് 44.9 ശതമാനം ഓഹരി പങ്കാളിത്തമുണ്ട്.
ബാക്കി ഓഹരികൾ കൂടി സ്വന്തമാക്കി കമ്പനിയെ സ്വന്തമാക്കാനുള്ള നീക്കത്തിലാണ് ഗ്ലോബൽ ടെലികമ്മ്യൂണിക്കേഷൻസ്. എന്നാൽ ഇവിടെയാണ് റിലയൻസിന്റെ ചെക്ക്.
വളരെ ചുരുങ്ങിയ സമയം കൊണ്ട് ഇന്ത്യൻ ടെലികോം വിപണിയെ അടക്കിവാഴാൻ സാധിച്ച ചരിത്രമാണ് റിലയൻസ് ജിയോയ്ക്കുള്ളത്. ശ്രീലങ്കൻ ബിഡ് വിജയിക്കുന്നതിൽ വിദഗ്ധർ ഏറ്റവുമധികം സാധ്യത കൽപ്പിക്കുന്ന കമ്പനിയും ജിയോ തന്നെയാണ്.
അതേസമയം ഗ്ലോബലിൽ നിന്നു കടുത്ത മത്സരം പ്രതീക്ഷിക്കുന്നു. ശ്രീലങ്കൻ സർക്കാർ ഉടമസ്ഥതയിലുള്ള ടെലികോം ഓഹരികൾ സ്വന്തമാക്കുന്നതു വഴി, അയൽ വിപണികളിലും ടെലികോം സേവനങ്ങൾ വിപുലീകരിക്കാൻ റിലയൻസിനു സാധിക്കും.
ശ്രീലങ്കയുടെ പോർട്ട് വികസന നീക്കങ്ങൾ റിലയൻസിന് ഭാവിയിൽ മികച്ച നേട്ടമായേക്കുമെന്നാണ് വിലയിരുത്തൽ. സാമ്പത്തിക പ്രതിസന്ധിയിൽ നിന്നു കരകയറുന്ന രാജ്യങ്ങളിൽ ഒന്നുകൂടിയാണ് ശ്രീലങ്ക.
ശ്രീലങ്കൻ വിപണികളിൽ കടന്നുകയറാനുള്ള മികച്ച സമയമാണിതെന്നും വിദഗ്ധർ പറയുന്നു. മുകേഷ് അംബാനിയുടെ മകൻ ആകാശ് അംബാനിയാണ് നിലവിൽ ജിയോ ഇൻഫോകോമിന്റെ ചെയർമാൻ.
സ്റ്റാറ്റിസ്റ്റയുടെ കണക്കനുസരിച്ച് റിലയൻസ് ജിയോ 2023 സാമ്പത്തിക വർഷത്തിൽ 1,19,700 കോടി രൂപ വരുമാനം നേടിയിട്ടുണ്ട്.
