ന്യൂസിലാൻഡ് ഇലക്ഷൻ: മികച്ച ജയം നേടി നാഷണൽ പാർട്ടി; ക്രിസ്റ്റഫർ ലക്സൺ പ്രധാനമന്ത്രിയാകും
പ്രതീക്ഷയോടെ മലയാളികൾ ഉൾപ്പെടുന്ന അന്താരാഷ്ട്ര വിദ്യാർത്ഥികളും ഹെൽത്ത്കെയർ പ്രൊഫഷണലുകളും
വെല്ലിംഗ്ടൺ: ന്യൂസിലാൻഡ് പാർലമെന്റിലേക്കുള്ള തെരഞ്ഞെടുപ്പിൽ മുഖ്യ പ്രതിപക്ഷമായിരുന്ന നാഷണൽ പാർട്ടിക്ക് തകർപ്പൻ ജയം. മുൻ കൺസർവേറ്റിവും സംരംഭകനുമായ ക്രിസ്റ്റഫർ ലക്സൺ അടുത്ത പ്രധാനമന്ത്രിയാകും. ജസീന്ത ആർഡേണിന്റെയും തുടർന്ന് ക്രിസ് ഹിപ്‌കിൻസിന്റെയും നേതൃത്വത്തിലുള്ള ലേബർ പാർട്ടി ഗവൺമെന്റിന്റെ ആറ് വർഷത്തെ ഭരണത്തിന് ശേഷമാണ് നേതൃമാറ്റം. ഭൂരിഭാഗം വോട്ടുകളും എണ്ണിക്കഴിഞ്ഞപ്പോൾ നാഷണൽ പാർട്ടി ഏകദേശം 40% വോട്ടുകൾ നേടി. വോട്ടിംഗ് പാറ്റേണിന്റെ അടിസ്ഥാനത്തിൽ നാഷണൽ പാർട്ടിയും ACT പാർട്ടിയും ചേർന്നുള്ള സഖ്യസർക്കാർ രൂപീകരിക്കുമെന്നാണ് പ്രതീക്ഷിക്കപ്പെടുന്നത്.
മുൻപ് പ്രതിപക്ഷ സ്ഥാനത്തിരുന്ന നാഷണൽ പാർട്ടി അധികാരത്തിൽ വരുന്നത് അന്താരാഷ്ട്ര വിദ്യാർത്ഥികൾക്കും രാജ്യത്തേക്ക് കുടിയേറുന്ന പ്രൊഫഷണലുകൾക്കും കൂടുതൽ ഗുണപരമാകുമെന്നാണ് വിലയിരുത്തൽ. തങ്ങൾ തിരഞ്ഞെടുക്കപ്പെടുകയാണെങ്കിൽ അന്താരാഷ്ട്ര വിദ്യാർത്ഥികൾക്ക് കൂടുതൽ മണിക്കൂർ ജോലി ചെയ്യാനും ബിരുദം നേടിയ ശേഷം ന്യൂസിലൻഡിൽ കൂടുതൽ കാലത്തേക്ക് തുടരാനും കഴിയുമെന്ന് പ്രഖ്യാപിക്കുന്നതായിരുന്നു നാഷണൽ പാർട്ടിയുടെ പ്രകടനപത്രിക. അന്താരാഷ്ട്ര വിദ്യാർത്ഥികൾക്ക് ഓരോ ആഴ്‌ചയും ജോലി ചെയ്യാൻ അനുവാദമുള്ള മണിക്കൂറുകളുടെ എണ്ണം 20 ൽ നിന്ന് 24 ആയി വർദ്ധിപ്പിക്കുമെന്നായിരുന്നു വാഗ്ദാനം. ഓസ്‌ട്രേലിയയിൽ ആഴ്ചയിൽ 24 മണിക്കൂറും യുകെയിലും കാനഡയിലും 20 മണിക്കൂറും അന്താരാഷ്ട്ര വിദ്യാർത്ഥികൾക്ക് ജോലി ചെയ്യാം. ഇത് ന്യൂസിലാൻഡിനെ കൂടുതൽ മത്സരാധിഷ്ഠിതമാക്കുന്നതിനൊപ്പം, തൊഴിലാളികളുടെ ദൗർലഭ്യവുമായി മല്ലിടുന്ന രാജ്യത്തെ ചെറുകിട ബിസിനസ്സുകളെ പിന്തുണയ്ക്കുമെന്നും വിദ്യാർത്ഥികളുടെ പഠനത്തിനും ജീവിതച്ചെലവുകൾക്കും ധനസഹായം നൽകാൻ സഹായകരമാകുമെന്നും ക്രിസ്റ്റഫർ ലക്സൺ പറഞ്ഞിരുന്നു.
“അന്താരാഷ്ട്ര വിദ്യാർത്ഥികൾക്കും അവരുടെ പങ്കാളികൾക്കും ലെവൽ 7 യോഗ്യത (ഡിപ്ലോമ, ബാച്ചിലേഴ്സ് ബിരുദം, ബിരുദ സർട്ടിഫിക്കറ്റ് അല്ലെങ്കിൽ ബിരുദ ഡിപ്ലോമ എന്നിവയ്ക്ക് തുല്യമായത്) അല്ലെങ്കിൽ അവർ പഠിക്കുമ്പോൾ ഉയർന്ന ഓപ്പൺ വർക്ക് അവകാശങ്ങൾ നൽകുന്നത് ഉൾപ്പെടെയുള്ള നടപടികൾ സ്വീകരിക്കും. ബിരുദാനന്തര ഡിപ്ലോമയുള്ളവരുടെ പഠനാനന്തര ജോലി അവകാശം ഒരു വർഷത്തിൽ നിന്ന് രണ്ട് വർഷമായി നീട്ടും. ന്യൂസിലാൻഡിലെ നൈപുണ്യ ദൗർലഭ്യം തുടർച്ചയായി അവലോകനം ചെയ്യും, കൂടാതെ നൈപുണ്യ ദൗർലഭ്യമുള്ള മേഖലകളിൽ ഉപ-ഡിഗ്രി കോഴ്‌സുകൾ പഠിക്കുന്ന അന്തർദ്ദേശീയ വിദ്യാർത്ഥികൾക്ക് കുറഞ്ഞത് 12 മാസത്തെ പോസ്റ്റ്-സ്റ്റഡി തൊഴിൽ അവകാശങ്ങൾക്ക് അർഹതയുണ്ട്”- ഇത്തരത്തിലായിരുന്നു നാഷണൽ പാർട്ടിയുടെ നിലപാടുകൾ.
രാജ്യത്തിന്റെ സമ്പദ്‌വ്യവസ്ഥയെ ഉത്തേജിപ്പിക്കുന്നതിനും തൃതീയ സ്ഥാപനങ്ങൾക്കുള്ള ധനസഹായം മെച്ചപ്പെടുത്തുന്നതിനുമായി അന്താരാഷ്ട്ര വിദ്യാഭ്യാസ മേഖലയെ പുനരുജ്ജീവിപ്പിക്കുമെന്നും പാർട്ടി വാഗ്ദാനം ചെയ്തിരുന്നു. രാജ്യത്ത് കൂടുതൽ പേഴ്സണൽ സപ്പോർട്ട് വർക്കർ നിയമനങ്ങൾ ഉണ്ടാകുമെന്നും പ്രകടന പത്രിക വ്യക്തമാക്കി. ഏറെ പ്രതീക്ഷയോടെയാണ് ന്യൂസിലാൻഡിലെ മലയാളികൾ ഉൾപ്പെടുന്ന അന്താരാഷ്ട്ര വിദ്യാർത്ഥികളും ഹെൽത്ത്കെയർ പ്രൊഫഷണലുകളും പുതിയ തെരഞ്ഞെടുപ്പ് ഫലത്തെ കാണുന്നത്.
